त्र्यंबकेश्वर येथे सिंहस्थ कुंभमेळ्यानिमित्त पिंपळद येथे जुना आखाड्याच्या महामंडलेश्वर नगराच्या पाइपलाइनचे भूमीपूजन करण्यात आले. या योजनेस दि. ५ मार्च २०१५ रोजी प्रशासकीय मान्यता मिळाली असून, ४४.४८ लाख रुपये खर्चाची ही योजना २५ मे २०१५ पर्यंत पूर्ण करण्यात येणार आहे.
महामंडलेश्वर आचार्य अवधेशानंदगिरी महाराज यांच्या हस्ते आणि सुमेरू काशीमठाचे शंकराचार्य नरेंद्रानंद महाराज, जुना आखाड्याचे राष्ट्रीय संरक्षक श्रीमहंत हरिगिरी महाराज, श्रीमहंत उमाशंकर भारती आदी साधू, महंतांच्या उपस्थितीत भूमीपूजनाचा कार्यक्रम झाला. पिंपळद येथील महामंडलेश्वर नगरपर्यंत रस्ता तयार होत आहे. पिण्याच्या पाण्यासाठी त्र्यंबकेश्वर बिल्वतीर्थ जलशुध्दीकरण प्रक्रिया केंद्र ते महामंडलेश्वर नगर स्वतंत्र पाइपलाइनची लांबी ३८५० मीटर आणि व्यास ११० मिलीमीटर आहे. या योजनेच्या भूमीपूजनप्रसंगी महाराष्ट्र जीवन प्राधिकरण यंत्रणेचे उपअभियंता डी. व्ही. सोनवणे, एस. आर. चौरे, पगार, मोरे आदींसह ठेकेदार एस. आय. घोलप उपस्थित होते.
या सिंहस्थात प्रथमच त्र्यंबकेश्वरपासून तीन किमी अंतरावर असलेल्या पिंपळद येथे जुना आखाड्याच्या ७० एकर जमिनीवर महामंडलेश्वर नगर तयार करण्यात आले आहे. येथे सिंहस्थ पर्वकालात जुना आखाड्याचे साधू, महंत, आचार्य, महामंडलेश्वर यांचा निवास राहणार आहे. जुना आखाड्याची साधुंची संख्या सर्वाधिक असून, सन्यांशींची संख्या देखील मोठी आहे.
महिला संन्याशिनींना माईवाडा म्हणून स्वतंत्र निवास व्यवस्था करण्यात आली आहे. निलपर्वत टेकडीवर आणि इतरत्र आठ धर्मशाळा बांधण्यात आल्या आहेत. साधू, महंत भाविक भक्त यांची पावसाळ्यात गैरसोय होणार नाही याकरिता आखाड्याचे श्री महंत हरिगिरी महाराज आणि सहकारी अथक प्रयत्न करीत आहेत. निवाराशेड, पाणीपुरवठा यासाठी प्रयत्न केले जात आहेत. तसेच भाविकांना स्नानासाठी घाटकामांचे काम वेगाने सुरू आहे. पावसाला सुरुवात झाल्यास सर्व कामांवर पाणी फिरण्याची शक्यता आहे.
गौतमी बेझे योजना महाराष्ट्र जीवन प्राधिकरण यंत्रणेचे उपअभियंता डी. व्ही. सोनवणे यांनी त्र्यंबक शहरासाठी असलेली गौतमी पाणीपुरवठा योजना पूर्णत्वास आल्याची माहिती दिली. त्याचबरोबर शहरामध्ये सध्या अहिल्या धरण जलकुंभास गौतमी बेझे धरणाचे पाणी पोहचविण्यात आले असून, त्याचा नियमित पुरवठा सुरू झाला आहे. गेल्या कही दिवसांपूर्वीच गौतमी बेझे पाणीपुरवठा योजनेची चाचणी घेण्यात आली होती. अथक प्रयत्नांनंतर ही योजना मार्गी लागली. येत्या आठवडाभरात बिल्वतीर्थ जलशुध्दीकरण प्रकल्प कार्यान्वित होणार आहे. त्यानंतर संपूर्ण शहरास गौतमी बेझे धरणाचे पाणी पुरविण्यात येणार आहे.
मोबाइल अॅप डाउनलोड करा आणि राहा अपडेट
