धनंजय मुंडे यांचे राजपूत समाजाच्या उपोषणकर्त्यांना आश्वासन
म. टा. वृत्तसेवा, सटाणा
राजपूत समाजाच्या जात पडताळणी संदर्भात येणाऱ्या प्रशासकीय अडचणींवरील मार्ग काढण्यासाठी राजपूत समाजातील राज्यभरातील नेते व मुख्यमंत्री यांची प्रत्यक्ष बैठक घेऊन मार्ग काढण्यात येईल, असे प्रतिपादन राज्याचे विधानपरिषदेतील विरोधी पक्षनेते धनंजय मुंडे यांनी केले. या आश्वासनानंतर देखील क्रांती दलाच्या पदाधिकारी व कार्यकर्त्यांनी बेमुदत उपोषण दुसऱ्या दिवशीही सुरूच ठेवले आहे.
येथील तहसील कार्यालयाच्या प्रांगणात बागलाण तालुका अखिल भारतीय महाराणा प्रताप क्रांतीदलाच्या वतीने बेमुदत उपोषण सुरू आहे. उपोषणस्थळी मुंडे यांनी भेट घेऊन आंदोलकांशी चर्चा केली. राजपूत समाज हा वि.जे.अ.(एन.टी) या प्रवर्गात मोडतो. पंरतु, त्यासाठी राजपूत भामटा जातीचे प्रमाणपत्र व जात वैधता प्रमाणपत्र या प्रवर्गतील आरक्षणसाठी गरजेचे ठरते. शासनस्तरावर राजपूत भामटा जात व वैधता प्रमाणपत्र उपलब्ध करण्यासाठी शासनाने १९६१ च्या आधाचे गुन्हेगारी पुरावे व अशा अनेक जाचक अटी लावल्यामुळे शालेय विद्यार्थ्यांचे व सर्वसामान्य समाजबांधवाचे नुकसान होत आहे. जात पडताळणी प्रमाणपत्र मिळण्यास अडचणी येत असल्याने क्रांती दलाच्या पदाधिकारी व कार्यकर्त्यांनी उपोषणाचा मार्ग अवलंबला आहे. रविवारी उपोषणस्थळी विरोधीपक्षनेते मुंडे यांनी भेट देऊन उपोषणकर्त्यांच्या समस्या जाणून घेतल्या. समाज कल्याण विभागाचे पडताळणी समितीचे अधिकारी जाधव यांच्याशी दूरध्वनीवर चर्चा केली.राजपूत समाजाच्या प्रश्नाबाबत संपूर्ण राज्यातील समाजातील प्रतिनिधींशी मुख्यमंत्र्यासमवेत बैठक घेऊन मार्ग काढण्याचे आश्वासन मुंडे यांनी दिले. याप्रंसगी माजी आमदार संजय चव्हाण, प्रांतधिकारी संजय बागडे, नायब तहसीलदार आबासाहेब तांबे, पंचायत समिती उपसभापती वंसत भामरे, शहराध्यक्ष राजेंद्र सोनवणे, संजय पवार, कृबाचे संचालक संजय वाघ, क्रांतीदलाचे अध्यक्ष संतोष पवार आदी उपस्स्थित होते.
उपोषणास राज्य कार्याध्यक्ष जितेंद्र सूर्यवंशी, प्रभाकर पवार, राजेंद्र जगताप, लखन पवार, भाऊसिंग पवार, गोकूळ पवार, तात्याभाऊ सोंळूखे, नथुसिंग ठोके, संग्रामसिंग सोळंखे, महेंद्र गिरासे, दगा मोरकर यांच्यासह कार्यकर्ते बसले असून मुंडे यांच्या भेटीनंतरही त्यांनी उपोषण सुरूच ठेवले आहे.
मोबाइल अॅप डाउनलोड करा आणि राहा अपडेट
