फणिंद्र मंडलिक
इंडोनिशिया बाली येथे होणाऱ्या इंटरनॅशनल स्टुडंट एनर्जी समिटमध्ये सहभागी होण्यासाठी नाशिकच्या आर्या मुकूंद कुलकर्णी हिची निवड झाली असून, ९ ते १३ जून या कालावधीत होणाऱ्या समिटमध्ये ती सहभागी होणार आहे. या समिटमध्ये संपूर्ण भारतातून फक्त दोन मुलींची निवड झाली आहे.
नैसर्गिक ऊर्जा स्त्रोताचा जास्तीत जास्त वापर व्हावा व त्यात जगभरातून संशोधन व्हावे यासाठी इंडोनिशिया सरकारतर्फे विद्यार्थ्यांसाठी दरवर्षी एक समिट आयोजित करण्यात येत असते. ही समिट इंडोनिशिया सरकारच्या पेट्रोलियम विभागाकडून आयोजित करण्यात येते. या समिटचे यंदाचे सहावे वर्ष आहे. या समिटमध्ये सहभागी होण्यासाठी जगभरातील विद्यार्थ्यांकडून शोध निबंध सादर केले जातात. यावर्षी जगभरातून ९०० च्यावर शोधनिबंध सादर झाले होते. ते शोधनिबंध अभ्यासून दोनशे विद्यार्थ्यांची निवड केली जाते. या समिटमध्ये सहभागी होण्यासाठी आर्या कुलकर्णी हिने हायड्रो इलेक्ट्रीक एनर्जी, सोलर एनर्जी व न्युक्लिअर पॉवर प्लॅँट याविषयी संशोधन करून शोधनिबंध सादर केला होता. आयोजकांनी आर्याने सादर केलेल्या शोधनिबंधाची दखल घेत या समिटमध्ये सहभागी होण्यासाठी ८९५ डॉलर्सची शिष्यवृत्ती जाहीर केली आहे. त्याच प्रमाणे बाली येथे होणाऱ्या समिटसाठी तिला तेथील सरकारकडून आमंत्रित करण्यात आले आहे. या समिटमध्ये भारतातून अवघ्या दोन मुलींची निवड झाली आहे. त्यातील एक तामीळनाडूची असून, दुसरी आर्या कुलकर्णी नाशिकची आहे. इंडोनिशिया सरकारच्यावतीने आयोजित या समिटमध्ये एनर्जी विषयावर तज्ञ मंडळींचे मार्गदर्शन आयोजित करण्यात येते. या आधीही जकार्ता येथे आयोजित सायन्स प्रोजेक्ट ऑलिम्पियाडमध्ये तिने दुसरा क्रमांक पटकावला होता. त्यावेळी तिला सिल्वर मेडलने गौरविण्यात आले. आतापर्यंत आर्याने इंटरनॅशनल सायन्स प्रोजेक्ट ऑलिम्पियाड २०१४ जकार्ता, इंटरनॅशनल सायन्स प्रोजेक्ट ऑलिम्पियाड २०१४ जॉर्जिया, काठमांडू सिम्पोसिया ऑन अॅडव्हान्स मटेरियल, नेपाळ या ठिकाणी आपले शोधनिबंध सादर करून मेडल्स मिळवली आहेत. त्याचप्रमाणे नागपूर, पुणे, मुंबई पुणे येथे झालेल्या विविध प्रकारच्या सायन्स ऑलिम्पियाडमध्ये सहभाग घेतला आहे. आर्याचे शालेय शिक्षण रंगुबाई जुन्नरे इंग्लिश मीडियममध्ये झाले असून, ती सध्या जोगेश्वरी येथील एच. के. कॉलेज ऑफ फार्मसी येथे बी.फार्मच्या तिसऱ्या वर्षात शिकत आहे.
मोबाइल अॅप डाउनलोड करा आणि राहा अपडेट
