पेठरोड येथील एसबीआय बँकेत गेलेल्या महिलेच्या पर्समधून ८१ हजार रुपये किमतीचे दागिने चोरट्याने लांबविले. ५ जून रोजी हा प्रकार घडला असून, पंचवटी पोलिसांनी १३ जून रोजी गुन्हा दाखल केला आहे. चोरट्याने ११७ ग्रॅम वजनाचे सोन्याचे दागिने लांबविल्याचे फिर्यादीत म्हटले आहे.
तरुणाची फसवणूक
तुमचे एटीएम बंद झाले आहे, ते सुरू करून देतो त्यासाठी मला सहा आकडी युनिक कोड सांगा असे सांगत तरुणाचा विश्वास संपादीत करीत त्यास ९० हजारांचा गंडा घालण्यात आला. उपनगर पोलिसांनी याप्रकरणी फसवणूक तसेच आयटी अॅक्ट अन्वये गुन्हा दाखल केला
आहे. संबंधित अज्ञात आरोपीने फिर्यादीस फोन केला. मी आयसीआयसीआय बँकेतून बोलतोय असे सांगून त्यांचा विश्वास
संपादन केला. तुमच्या मोबाइलवर मी एक संदेश पाठवितो. त्यातील सहा अंकी युनिक कोड सांगा असे त्यांना सांगितले. फिर्यादीच्या बॅँक
खात्यातून ९१ हजारांची रक्कम ऑनलाइन ट्रान्सफर करून घेतली.
तरुणीचा मृत्यू
राहत्या घरात १०० टक्के भाजलेल्या तरुणीचा मृत्यू झाला. देवळाली परिसरात १२ जून रोजी ही घटना घडली. हिना रज्जाक पठाण असे तिचे नाव आहे. उपचारादरम्यान तिचा मृत्यू झाला.
पुण्याचे दोन युवक ठार
नाशिकरोड : नाशिक-पुणे महामार्गावर पळसेनजीक अपघातात पुण्याचे दोन युवक ठार झाले. अक्षय पवार (वय २६) आणि रोहन चारुदत्त ओतारी (वय २४, रा. नंदू घाटेंच्या आफिससमोर, कसबा पेठ, पुणे) हे दोघे नाशिकच्या पोलिस प्रशिक्षण केंद्रात प्रशिक्षण घेत असलेल्या नातेवाईकांना भेटण्यासाठी शनिवारी (ता.१३) रात्री मोटरसायकलवर (एमएच १४ सीटी ७०८४) येत होते. पळसेनजीक बंगाली बाबा दर्ग्याजवळ स्वागत बिअर शॉपसमोर त्यांच्या मोटरसायकलची नाशिकरोडहून सिन्नरकडे जाणाऱ्या ट्रकशी (एमएच १५ एजी ५६९) धडक झाली. त्यात अक्षय जागीच ठार झाला. रोहनचा जिल्हा रुग्णालयात मृत्यू झाला. पोलिसांनी गुन्हा नोंदवून ट्रकचालकास ताब्यात घेतले. नंतर चौकशी करून सोडून दिले.
मोबाइल अॅप डाउनलोड करा आणि राहा अपडेट
