शहरामध्ये दिवसेंदिवस बनावट डेंटल मेकॅनिक्सचे प्रमाण वाढत असून, बहुतांश डेंटल रोगतज्ज्ञ बनावट मेकॅनिक्स मार्फत रुग्णांसाठी कृत्रिम दात बनवून घेत असल्याचा आरोप राज्याच्या डेंटल मेकॅनिक्स संघटनेच्या वतीने पत्रकार परिषदेत करण्यात आला आहे. याबाबत अनेकदा भारतीय डेंटल परिषदेकडे लेखी तक्रारी करूनही त्याकडे परिषदेकडून दुर्लक्ष केले जात असल्याचे संघटनेने म्हटले आहे.
शहरामध्ये मान्यता नसलेले बनावट डेंटल मेकॅनिक्स काही डेंटल चिकित्सकांच्या मदतीने सर्रासपणे कृत्रिम दात बनविण्याचा व्यवसाय करत असून, त्यांच्यावर कारवाई करण्याची मागणी यावेळी संघटनेचे अध्यक्ष संदीप नाईक, संदीप शाह, राजू भोई, प्रशांत गिरीपुंजे, सचिन बाड आदिंनी केली आहे. रुग्णाला गरज भासल्यास दातांच्या डॉक्टरांकडून सिरॅमिक किंवा मेटलचे दात, कवळी आदींचा सल्ला दिला जातो.
हे कृत्रिम दात बनविण्याचे विशेष प्रशिक्षण डेंटल परिषदेकडून डेंटल तज्ज्ञांना दिले जाते. अशा प्रशिक्षित डेंटल मेकॅनिक्सकडूनच कृत्रिम दात तयार करून घेणे परिषदेने बंधनकारक केले आहे. कारण त्यामुळे रुग्णाची कुठल्याही प्रकारची गैरसोय होत नाही व त्याच्या मुखाच्या आरोग्यालाही धोका निर्माण होत नाही; मात्र शहरात मागील काही वर्षांपासून प्रशिक्षण न घेतलेल्या बनावट डेंटल कारागिरांचा व्यवसाय तेजीत असल्याने डेंटल रुग्णांच्या आरोग्यालाही धोका निर्माण होतो. याबाबत परिषदेकडे वारंवार पाठपुरावा केला असून, महापालिकेच्या आरोग्य विभागाकडेही तक्रार केली आहे. मात्र अद्याप एकही बनावट डेंटल तज्ज्ञावर कारवाई करण्यात प्रशासनाला यश आले नाही, याकडे लक्ष वेधण्यात आले. ज्या रुग्णांना डॉक्टरांनी कृत्रिम दात तयार करून दिले त्या रुग्णांनी त्या दातांबाबत चौकशी करण्याच्या अधिकाराचा वापर करावा. जेणेकरून बनावट व्यवसायाला आळा बसण्यास मदत होईल, असे आवाहन संघटनेने केले आहे.
मोबाइल अॅप डाउनलोड करा आणि राहा अपडेट