म. टा. खास प्रतिनिधी, नाशिक
विमुक्त जाती व भटक्या जमाती कल्याण समितीने गुरूवारी महापालिकेतील कामकाजाचा आढावा घेतला. महापालिकेतील नोकरभरती आणि पदोन्नतीचा अनुशेषाचा संपूर्ण अहवाल येत्या दोन महिन्यांत सादर करण्याचे आदेश समितीने महापालिकेला दिला आहे. सोबतच महापालिकेच्या माध्यमिक शाळांच्या अनुदानासह आकृतीबंधानुसार रिक्तपदे भरायला आणि पदोन्नतीसाठीच्या अडचणींवर मदत करण्याची तयारी समितीचे अध्यक्ष बाळासाहेब सानप यांनी दर्शवली आहे.
विमुक्त जाती व भटक्या जमाती कल्याण समिती बुधवारपासून नाशिक जिल्ह्याच्या दौऱ्यावर आहे. समितीने शुक्रवारी महापालिकेला भेट देवून, महापालिकेतील विमुक्त जाती व भटक्या जमाती संदर्भातील योजनांचा आढावा घेतला. समितीचे अध्यक्ष बाळासाहेब सानप, सदस्य महादेव जानकर यांनी महापालिकेतील नोकरभरतीच्या अनुशेषाचा मुद्दा उपस्थित केला. सोबतच पदोन्नतीसंदर्भातील माहिती सादर करण्याचे आदेश दिले. नोकरभरतीचा मोठा अनुशेष पाहून सदस्यही चक्रावले. त्यामुळे महापालिकेतील नोकरभरतीच्या अनुशेषासह पदोन्नती संदर्भातील सर्व माहितीचा अहवाल दोन महिन्यांत समितीला सादर करण्याचे आदेश दिले आहेत. सोबतच रिक्त पदांच्या आकृतीबंधासाठी मदत करण्याचे आश्वासन त्यांनी दिले. महापालिकेच्या ९ माध्यमिक शाळांना अनुदानित करण्यासाठी मदत करण्याचे आश्वासन त्यांनी दिले.
कल्पना पांडेची घुसखोरी
समितीच्या वतीने महापालिकेतील लोकप्रतिनिधींना चर्चेसाठी बोलविण्यात आले होते. यासाठी उपमहापौर गुरूमीत बग्गांसह, सभागृह नेते सलिम शेख, राष्ट्रवादीच्या गटनेत्या कविता कर्डक, यांच्यास विविध पक्षाचे पदाधिकारी उपस्थित होते. या बैठकीला आमंत्रण नसतांनाही काँग्रेसच्या पदाधिकारी कल्पना पांडे यांनी घुसखोरी करीत समितीचा ताबा घेतला. म्हसरूळमधील एका झोपडपट्टीवरून त्यांनी नगरसेवकांसह महापालिकेवर आगपाखड केली. समितीच्या प्रोटोकॉलनुसार आमंत्रितानांच प्रवेश असतांनाही पांडे यांनी प्रवेश करून महापालिकेचे वाभाडे काढले. प्रोटोकॉल तोडला असतांनाही अधिका-यांनी आणि समितीने त्यांना रोखले नाही.
कर्डक यांची परतफेड!
कविता कर्डक यांनी बैठकीत समितीचे अध्यक्ष बाळासाहेब सानप यांचा बदला घेतला. सानप यांच्या पत्रावरच नगरविकास विभागाने कविता कर्डक यांचे विरोधी पक्षनेतपद निलंबित करण्यात आले होते. त्यामुळे कर्डक यांनी समितीत याचा बदला घेतला. आपली ओळख वादग्रस्त विरोधी पक्षनेता अशी करून देत आपल्या पत्रावर शासनाने निर्णय घेतल्याची आठवण त्यांनी करून दिली. त्यामुळे सानप यांची चांगलीच फजिती झाली होती.
मोबाइल अॅप डाउनलोड करा आणि राहा अपडेट
