म. टा. प्रतिनिधी, नाशिक
अनुत्साही मतदार आणि अपुरी जनजागृती यांमुळे राष्ट्रीय मतदार याद्या शुद्धीकरण व प्रमाणीकरण मोहीम फसल्याचे रविवारी दिसून आले. शहरातील नाशिकरोड, सातूपर, सिडको, जुने नाशिक आणि पंचवटीसारख्या परिसरात या मोहिमेला थंड प्रतिसाद मिळाला. विशेष म्हणजे अनेक केंद्रांवर मतदारांपेक्षा बूथ लेव्हल ऑफिसर्स (बीएलओ) अधिक असल्याचे चित्र पहावयास मिळाले.
मतदार याद्यांमधील नावांची पुनरावृत्ती टळावी तसेच आधार नंबर मतदार ओळखपत्राशी लिंक व्हावा या उद्देशाने हा कार्यक्रम हाती घेण्यात आला आहे. शहरात आणि जिल्ह्यातील प्रत्येक मतदारसंघातील मतदान केंद्रावर रविवारी ही विशेष मोहीम राबविण्यात आली. मात्र, प्रत्येक केंद्रावर मतदारांचा अल्प प्रतिसाद दिसून आला. ही मोहीम कशासाठी आहे याची माहिती नागरिकांपर्यंत पोहोचविण्यात जिल्हा प्रशासन अपयशी ठरल्याचे यावरून स्पष्ट झाले. ज्या व्यक्तींची नावे दोन किंवा त्याहून अधिक ठिकाणच्या मतदार याद्यांमध्ये आढळली अशा मतदारांना जिल्हा प्रशासनाने नोटीसा बजावल्या आहेत. त्यांनी परिसरातील मतदान केंद्रांवर जाऊन अन्य मतदार याद्यांमधून नाव वगळून घेणे आवश्यक होते. परंतु, असे मतदार केंद्रांकडे फिरकलेच नाहीत. एकाच व्यक्तीची नावे दोन किंवा तीन ठिकाणी असल्याने आधारकार्ड मतदार ओळखपत्राशी लिकिंग करण्याचे कामही त्यामुळे होऊ शकले नाही.
कर्मचारी अधिक
सातपूर : सिडको, सातपूर परिसरातील बहुतांश केंद्रांवर या मोहिमेला मतदारांचा अल्प प्रतिसाद मिळाला. आधार लिंकिंगसाठी फारशी गर्दी नव्हती. अनेक केंद्रांवर कर्मचारी अधिक मतदार कमी अशी परिस्थिती पहावयास मिळाली. मतदाराने मतदान कार्ड व आधारकार्डची साक्षांकित प्रत केंद्रावर जमा करणे आवश्यक होते. परंतु, याची सातपूर, सिडकोतील मतदारांना फारशी माहितीच नसल्याने मतदान केंद्रांवर अल्प प्रतिसाद होता.
कर्मचाऱ्यांचीच दांड‍ी
जुने नाशिक : जुन्या नाशकात सकाळी अकरा ते पाच या वेळेत राबविण्यात आलेल्या मोहिमेबाबत मतदारांमध्ये निरुत्साह दिसून आला. मतदारांच्या प्रतीक्षेतच नोंदणीचे काम संपले. काही मतदान केंद्रावर कर्मचारी गैरहजर होते. त्यामुळे नोंदणीसाठी आलेल्या मतदारांना माघारी फिरावे लागले. मतदारयादीत दुरुस्ती, नवीन मतदार नोंदणी, मृत मतदारचे नाव कमी करणे, दुबार मतदारांची नावे वगळण्यासाठी वेळोवेळी जिल्हा प्रशासनाच्या निवडणुक शाखेत अर्ज देऊनही कार्यवाही होत नसल्याने पुन्हा पुन्हा तेच का करावे अशा प्रतिक्रीया नागरिकांनी व्यक्त केल्या. आधार क्रमांक जोडण्यासाठी नावेच याद्यांमध्ये सापडत नसल्याचा अनुभवही नागरिकांना आला. दुबार नावे वगळण्यासाठी खटाटोप करूनही प्रतिसाद मिळत नसल्याने बीएलओंची देखील दमछाक होत आहे. जुन्या नाशकातील नॅशनल उर्दू हायस्कूल केंद्रावर ११ हजारपैकी केवळ २० मतदारांची नोंदणी झाली. मौलाना अबुल कलाम उर्दू शाळेत पाच हजारपैकी अवघे १०० मतदारच पोहोचले. बी. डी. भालेकर हायस्कूलमध्ये साडे सहा हजारपैकी सुमारे २०० मतदारांनी हजेरी लावली.
केंद्रांवर शुकशुकाट
पंचवटी : पंचवटी परिसरात निवडणूक आयोगाचा प्रयत्न असफल झाल्याचे दिसून आले. सर्व मतदान नोंदणी केंद्रांवर शुकशुकाट होता. अनेक ठिकाणी अधिकारी आणि कर्मचारी हजर नव्हते. के. के. वाघ, विडी कामगार वसाहत, मेरी शाळा, म्हसरूळ, पेठ रोड, मखमलाबाद नाका, कोणार्क नगर, सरस्वती नगर, हिरावाडी अशा सर्वच ठिकाणी थंड प्रतिसाद होता. स्थानिक लोकप्रतिनिधींनी यात लक्ष घालायला हवे अशी अपेक्षा कर्मचाऱ्यांनी व्यक्त केली. अनेकांचे मतदार कार्ड तयार असून नागरिकांनी ते अद्याप ताब्यात घेतलेले नाहीत. १२ जुलैला या मोहिमेची शेवटची मुदत असल्याने मतदारांनी मतदार ओळखपत्र ताब्यात घ्यावे असे आवाहन अधिकाऱ्यांनी केले आहे.
मतदारांची संख्या कमी
नाशिकरोड : परिसरातील पूर्व मतदारसंघात म्हसरुळ, आडगाव, नांदूर मानूर, दसक, पंचक, इंगळेनगर, कोठारी कन्या, शिखरेवाडी, नेहरुनगर, देवळाली गाव, सिन्नरफाटा, १२५ क्रमांकाची शाळा, गोसावीवाडी येथील शाळा तसेच महसूल प्रशिक्षण प्रबोधिनीत राबविलेल्या मोहिमेला अत्यल्प प्रतिसाद मिळाला.
मतदारांमध्ये निरुत्साह
लासलगाव : लासलगाव परिसरात मतदार नोंदणी अभियानास अल्प प्रतिसाद मिळाला. प्रशासनातर्फे लासलगावात १२ तर पिंपळगाव (न.) मध्ये तीन, वेळापूरला एक असे एकूण १६ बूथ परिसरात लावण्यात आले. लासलगावला आधारसाठी २३४ मतदारांनी नोंदणी केली. फॉर्म सहा साठी २६, फॉर्म सात साठी १०, फॉर्म आठ साठी पाच व फॉर्म आठ अ साठी आठ मतदारांनी नोंदणी केली. पिंपळगाव नजीकला आधारसाठी ११७ मतदार, फॉर्म सहासाठी सहा, फॉर्म सातसाठी १८, फॉर्म आठसाठी तीन तर आठ 'अ'साठी सात मतदारांनी नोंदणी केली. वेळापूरला आधारसाठी २२ मतदार तर फॉर्म सहासाठी पाच मतदारांनी नोंदणी केल्याची माहिती तलाठी गांगुर्डे यांनी दिली.
दसक केंद्रावर वाद
मतदारांच्या माहितीसीठी नगरसेवक शैलैश ढगे यांनी एसएमएसव्दारे जनजागृती केली होती. त्यास प्रतिसाद देत गुलाम मेहमूद या मतदाराने नगरसेवक ढगे यांच्याकडे फार्म जमा केला; परंतु त्याचे नाव मतदार यादीत आले नाही. मेहमूद हे सकाळी दसक केंद्रावर आले असता नगरसेवकाकडे फार्म का जमा केला असे विचारत तेथील अधिकाऱ्यांनी त्यांच्याकडून लेखी खुलासा घेतला. तो न दिल्यास गुन्हा दाखल करू असे धमकावल्याचा आरोप नगरसेवक ढगे यांनी केला. त्यामुळे काही काळ तणाव निर्माण झाला होता.
आधीच उल्हास...
बीएलओंनी मतदारांना घरोघरी जाऊन शुद्धीकरण फॉर्म वाटले. ते भरुन देण्याची विनंती केली. अनेकांनी ते दिले नाहीत. अनेक मतदार केंद्राकडे फिरकलेच नाहीत. अनेकांना अशी मोहीम असते हेच माहित नव्हते. या कामावर शिक्षकांनी बहिष्कार घातला. त्यामुळे पाटबंधारे, महापालिका, अंगणवाडी, जलसंपदा विभागाच्या कर्मचाऱ्यांनी बीएलओ म्हणून काम पाहिले. त्यातही अनेकांनी वैद्यकीय रजा टाकली. बीएलओंना वर्षाला पाच हजार असे तुटपुंजे मानधन मिळते हे देखील त्यामागे कारण असल्याचे कर्मचाऱ्यांनी सांगितले.
मोबाइल अॅप डाउनलोड करा आणि राहा अपडेट
