राज्यातील सर्व शासकीय, अशासकीय, अनुदानित व केंद्रीय प्रवेश प्रक्रियेत समाविष्ट अशासकीय विनाअनुदानित व कायम विनाअनुदानित कॉलेजेसच्या बी. एड व एम. एड. अभ्यासक्रमाच्या प्रवेशप्रक्रिया सुरू झाल्या असून त्यासाठी ऑनलाइन अर्ज देखील मागविण्यात आले आहेत. विद्यार्थ्यांना १७ जुलैपर्यंत अर्ज भरता येणार असून २५ जुलै रोजी केंद्रीभूत पद्धतीने या अभ्यासक्रमाची सीईटी घेण्यात येणार आहे.
बी.एड. अभ्यासक्रमास प्रवेशासाठी महाराष्ट्र ज्ञान महामंडळाच्या (एमकेसीएल) http://bed.mhpravesh.in या वेबसाईटवर तर एम. एड. ला प्रवेशासाठी http://med.mhpravesh.in या वेबसाईटवर अर्ज भरायचा आहे. बी. एड. प्रवेशासाठी मान्यता पात्र विद्यापीठाच्या कोणत्याही शाखेची तीन वर्षीय पदवी आवश्यक असून एम. एडसाठी एनसीटीई मान्यताप्राप्त अध्यापक कॉलेजमधून बी. एड, बी. ए. एम. एड, बी. एस्सी. बी. एड, बी. एल. एड., डी. एल. एड. यापैकी एका अभ्यासक्रमाची पदवी असणे आवश्यक आहे. बी. एड. प्रवेश अर्जासाठी ओपन संवर्गाला रुपये ६५० व मागासवर्गीयांसाठी रुपये ३५० फी असणार आहे. तर खुल्या संवर्गासाठी रुपये ८०० तर मागासवर्गीयांसाठी रुपये ४०० व राज्याबाहेरील विद्यापीठातील सर्व संवर्गांसाठी रुपये ८०० फी आकारण्यात येणार असल्याचे राज्य उच्च शिक्षण विभागाचे संचालक डॉ. धनराज माने यांनी कळविले आहे.
सप्टेंबरपर्यंत प्रवेशप्रक्रिया
राष्ट्रीय अध्यापक शिक्षा परीषदेने घेतलेल्या निर्णयानुसार बी. एड. व एम. एड. या दोन्ही अभ्यासक्रमांचा कालावधी दोन वर्षाचा करण्यात आला आहे. विद्यार्थ्यांना शिक्षकांकडून योग्य न्याय मिळणे आवश्यक असल्याने केलेल्या बदलामुळे प्रवेश प्रक्रियेला विलंब झाला आहे. एरवी मार्च-एप्रिलमध्ये पार पडणारी ही प्रवेशप्रक्रिया यावेळी सप्टेंबरपर्यंत चालणार आहे.
विद्यार्थ्यांनी या अभ्यासक्रमाकडे सकारात्मक दृष्टीकोनातून बघणे गरजेचे आहे. यातील अभ्यासक्रमात झालेला बदल ही महत्त्वपूर्ण बाब असून त्याआधारे तयार झालेला शिक्षक हा अधिक कौशल्याधिष्ठीत व गुणवत्तापूर्ण असणार आहे. त्यामुळे शिक्षणाचा दर्जा सुधारण्यासही मदत होईल.
- प्राचार्य डॉ. सूर्यभान वाजे, मविप्र शिक्षणशास्त्र महाविद्यालय
मोबाइल अॅप डाउनलोड करा आणि राहा अपडेट
