म. टा. वृत्तसेवा, पिंपळगाव बसवंत
पिंपळगाव बसवंत कृषी उत्पन्न बाजार समितीची निवडणूक २६ जुलै रोजी होत असून, उमेदवारी अर्ज छाननीनंतर साधारण १९९ उमेदवार वेगवेगळ्या गटातून निवडणुकीसाठी सज्ज दिसत आहेत. आमदार अनिल कदम, बाजार समितीचे विद्यमान सभापती दिलीप बनकर यांच्यासह माणिकराव बोरस्ते यांच्या गटामुळे निवडणूक चांगलीच रंगणार आहे.
सोसायटी मतदारसंघात ११ जागा असून, यातील महिला गटातील दोन जागेसाठी आठ उमेदवारी अर्ज आहेत. इतर मागास प्रवर्गातील एका जागेसाठी १५ उमेदवारी अर्ज आहेत. भटक्या विमुक्त जाती-जमाती गटातील एका जागेसाठी १६ उमेदवारी अर्ज आहेत. तर, सोसायटी गटातील सर्वसाधारण सात जागांसाठी तब्बल ८५ उमेदवारी अर्ज आहेत. ग्रामपंचायत मतदारसंघात चार जागा असून, यातील अनु. जाती-जमातीच्या एका जागेसाठी १२ अर्ज आहेत. सर्वसाधारण गटातील दोन जागांसाठी तब्बल ४३ आहेत. व्यापारी गटातील दोन जागांसाठी दहा तर हमाल-मापारी गटातील एका जागेसाठी चार अर्ज आहेत. इच्छुक उमेदवारांची संख्या जास्त असली तरी माघारीनंतर चित्र स्पष्ट होईल. माघारीसाठी पॅनलप्रमुखांना कसरत करावी लागणार आहे.
बाजार समितीची निवडणूक आमदार अनिल कदम आणि माजी आमदार दिलीप बनकर यांच्या पॅनलमध्ये होण्याचे संकेत मिळत आहेत. निसाकाचे माजी अध्यक्ष व ज्येष्ठ नेते माणिकराव बोरस्ते यांनी स्वतःसह अनेक समर्थकांचे उमेदवारी अर्ज दाखल केल्याने बोरस्ते गटाची भूमिका काय? ते कोणत्या गटाला पाठिंबा देतात व त्यांच्‍यासह त्यांच्या किती समर्थकांची कोणत्या पॅनलमध्ये वर्णी लागते यावर निवडणुकीचे ग‌णित ठरणार आहे. यामुळे बोरस्ते गटासोबत जुळवून घेण्यासाठी कदम व बनकर गटाचे प्रयत्न सुरू आहेत. या दोन्ही नेत्यांची पॅनल निर्मिती करताना दमछाक होणार आहे.
प्रतिष्ठा पणाला
तब्बल हजार कोटी रुपये उलाढाल असलेल्या व कोट्यवधी रुपयांची मालमत्ता असलेल्या पिंपळगाव बाजार समितीची सत्ता मिळविण्यासाठी आमदार अनिल कदम व विद्यमान आमदार यांची प्रतिष्ठा पणाला लागली आहे. आमदार कदम स्वतः निवडणूक लढणार असल्याने या निवडणुकीला चांगलाच रंग येणार आहे. दोन्ही गटाकडे तुल्यबळ उमेदवार असल्याने मतदारांची चांदी होणार आहे. विकासाच्या मुद्याबरोबरच बाजार समितीत असलेले अनेक प्रश्न, कर्मचाऱ्यांचे प्रश्न, आडतदार, व्यापारी यांच्या समस्या आदी मुद्यांभोवती निवडणुकीचा प्रचार रंगणार आहे.
मोबाइल अॅप डाउनलोड करा आणि राहा अपडेट
