कैद्यांच्या भाडणातून नाशिकरोड कारागृहात सलग दुसऱ्या आठवड्यात मोबाइल सापडला. गेल्या सोमवारी पाच-सहा कैद्यांनी मोबाइलवर संभाषण करण्यावरून दीपक अंबादास पोकळे या कैद्यावर कांदा कापण्याच्या पत्र्याने हल्ला करून गंभीर जखमी केले होते.
होमगार्ड अभिषेक चव्हाण यांनी नाशिकरोड पोलिस ठाण्यात फिर्यादीचा दिली आहे. मंगळवारी दुपारी साडेबाराच्या सुमारास सर्कल सहाच्या बॅरेक चारमधील न्यायालयीन बंदी माजीद हुसेन वाजीद हुसेन, निलेश चिवसे, समीर निजाम सैय्यद आणि सागर शिंदे यांच्यात वाद सुरू होते. तुरुंगाधिकारी बी. एस. चंदनशिव, सर्कल अमलदार भालचंद्र शिरसाठ आणि होमगार्ड चव्हाण तेथे गेले असता मोबाइलवरून हा वाद सुरू असल्याचे निष्पन्न झाले. कर्मचाऱ्यांनी झडती घेतली असता या बॅरेकीच्या शौचालयाशेजारील चौथ्या बिछान्याखाली काळा मोबाइल व चार्जर सापडले. सीमकार्ड गायब होते. हा बिछाना अशोक शेलार या कैद्याचा होता. त्याला सकाळी मालेगाव कोर्टात सुनावणीसाठी नेले होते. त्यामुळे मोबाइल कोणाचा हे स्पष्ट झाले नाही.
आठवड्यातील दुसरी घटना
कारागृहात मोबाइल वापरण्यास कैद्यांनी बंदी आहे. तरीही कैद्यांकडे मोबाइल सापडत असल्याने प्रशासन झोपले आहे का? असा प्रश्न उपस्थित होत आहे. गेल्या आठवड्यात दीपक अंबादास पोकळे या कैद्याला विशाल भालेराव, अजय बोरिला, अजय इंगळे, अविनाश एमके, निखील मराठे व किरण निकम यांनी हल्ला करुन त्याला गंभीर जखमी केले होते. तेव्हाही मोबाइलवरूनच वाद झाला होता. मोबाइलवरून दुसऱ्या टोळीविरोधात सुपाऱ्याही दिल्या जात आहेत. सरकारी वकील अजय मिसर यांना कारागृहातून मोबाइलवरून धमक्या आल्याचे उघड झाले होते. कारागृहाच्या अतिरिक्त पोलिस महासंचालक मीरा बोरवणकर यांनी काही महिन्यांपूर्वी येथे छापा घातला असता मोबाइल सापडले नव्हते.
मोबाइल अॅप डाउनलोड करा आणि राहा अपडेट
