दिल्ली येथे झालेल्या बैठकीत महाराष्ट्रातील २२ कृषी उत्पादनांना भौगोलिक मानांकन जाहीर झाले असून, या यादीमध्ये लासलगावच्या कांद्यानेही दमदार एंट्री मिळविली आहे. आपल्या खास झणकेदार चवेसाठी प्रसिध्द असलेल्या लासलगावच्या कांद्याने या महत्त्वाच्या यादीमध्ये स्थान पटकाविल्यामुळे जगभरात आता लासलगावची ओळख ही दर्जेदार व निर्यातक्षम कांद्याचे माहेरघर अशी यानिमित्ताने अधोरेखित झाली आहे.
या नव्या ओळखीमुळे येत्या काळात निर्यातदारांची पावलेही लासलगावच्या दिशेने पडू लागतील अशी आशा पल्लवित होऊ लागली आहे. याचा फायदा येथील कांदा उत्पादक शेतकरी, व्यापारी व एकूणच बाजारपेठेवर होईल, असा विश्वास लासलगाव कृषी उत्पन्न बाजार समितीचे सभापती तथा नाफेडचे संचालक नानासाहेब पाटील यांनी व्यक्त केला आहे. महाराष्ट्रातील कृषी उत्पादने जागतिक स्थरावर पोहोचावीत, त्यांची निर्यात वाढावी याकरिता कृषी उत्पादनांना भौगोलिक मानांकन मिळविण्यासाठी सादरीकरण करण्यात आले होते. या मानांकनामध्ये महाराष्ट्रातील २२ कृषी उत्पादनांना स्थान मिळाल्यामुळे देशासह परदेशातही राज्यातील कृषी उत्पादनांना एक वेगळे महत्त्व प्राप्त झाले आहे. येत्या काळात राज्यातील शेती व्यवसाय बहरण्याची संधी प्राप्त झाली आहे. लासलगावच्या मातीत व भौगोलिक परिस्थितीत उत्पादित झालेल्या कांद्याची चव, गंध, रंग हे इतर भागातून येणाऱ्या कांदा उत्पादनापेक्षा वेगळा असून, दर्ज्याच्या बाबतीत लासलगावचा कांदा इतर ठिकाणच्या कांद्यापेक्षा उच्चप्रतीचा असल्याचे यानिमित्ताने अधोरेखीत झाले आहे.
जीआयच्या यादीत लासलगावच्या कांद्याला मानांकन मिळाल्यामुळे कांद्याने लासलगावला सातासमुद्रापार स्वतंत्र अशी ओळख दिली आहे. या मानांकनामुळे कांद्याच्या निर्यातीला चालना मिळण्यासाठी मदत होणार असून, याचा फायदा कांदा उत्पादक शेतकऱ्यांसह, विक्रेते व प्रक्रिया उद्योगालाही होणार आहे.
- नानासाहेब पाटील, सभापती लासलगाव कृ.ऊ.बा., संचालक नाफेड.
लासलगावच्या कांद्याला भौगोलिक मानांकनाच्या यादीत स्थान मिळाल्यामुळे येथील कष्टकरी कांदा उत्पादक शेतकऱ्यांच्या मेहनतीचे खऱ्या अर्थाने चीज झाले आहे. लासलगावच्या शिरपेचात मानाचा तुरा खोवला आहे.
- विष्णू जाधव, कांदा उत्पादक
मोबाइल अॅप डाउनलोड करा आणि राहा अपडेट
