हिन्दुस्थान एअरोनॉटिक्स लिमिटेड अर्थात एचएएलच्या आडमुठ्यापणामुळे अखेर नाशिकची विमानसेवा जमिनीवर आली आहे. दुपारी अडीच वाजेनंतर सुविधा एचएएल देवू शकत नसल्याने अखेर मेहेर कंपनीने अनिश्चित काळापर्यंत सेवा रद्द करण्याचे घोषित केलेे. एचएएलच्या कारभाराचा फटका नाशिककरांना बसत आहे. ओझर विमानतळाच्या ठिकाणाहून विमानसेवा सुरू होण्याच्या नाशिककरांच्या अपेक्षांना पाने पुसण्याचा प्रकार सुरू असल्याचे दिसून येत आहे. प्रदीर्घ प्रतीक्षेनंतर नाशिकला सेवा सुरू झाली. मेरिटाईम हेलि एअर सर्व्हिल प्रा. लि. (मेहेर) या सीप्लेन कंपनीने नाशिक ते पुणे ही सेवा दिवसातून दोनदा देण्याची घोषणा केली. मात्र, वादळी पावसात या कंपनीच्याविमानामध्ये आर्द्रता आल्याने गेल्या महिन्यातील सेवेचा प्रारंभ पुढे ढकलण्यात आला. यादरम्यान, मेहेरला अनेक प्रवाशांना बुकिंगचे पैसे परत करावे लागले. अखेर गेल्या ६ जुलैला मेहेरने मोठ्या उत्साहात विमानसेवेला सुरुवात केली. मात्र, मेहेरला अत्यल्प प्रतिसाद लाभला. वाऱ्याचा वेग अधिक असल्याने दोन तास उशिराने पुण्याहून विमान नाशिकला आले. आता मात्र, ही सेवाच अनिश्चित काळासाठी बंद करण्यात येत असल्याचे मेहेरने जाहीर केले आहे. एचएएलने दुपारी अडीच वाजेनंतर सुविधा देण्यात असमर्थता दर्शविल्याचे मेहेरचे संचालक सिद्धार्थ वर्मा यांनी सांगितले आहे. दुपारी अडीच वाजेनंतर एअर ट्रॅफिक कंट्रोल (एटीसी)च्या विभागात काम करणाऱ्या कर्मचाऱ्यांना ओव्हर टाइम द्यावा लागतो. त्यामुळे प्रति तास ४ हजार रुपये देण्याची मागणी एचएएलने लेखी पत्राद्वारे केल्याचे वर्मा यांनी सांगितले.
एचएएलने किमान काही दिवस तरी चार्जेस माफ करावेत, अशी विनंती केंद्रीय संरक्षणमंत्री मनोहर पर्रीकर यांच्याकडे केली आहे. त्यांनी काही निर्देश एचएएलला दिले आहेत. त्यावर आता निर्णय होणे अपेक्षित आहे.
हेमंत गोडसे, खासदार
दररोज हजारो रुपयांचे चार्जेस देणे आम्हाला परवडणारे नाही. गंगापूर धरणाच्या ठिकाणीही संध्याकाळची सेवा देण्याचा विचार केला. मात्र, रात्रभर विमान पाण्यात ठेवणे शक्य नाही.
सिद्धार्थ वर्मा, संचालक, मेहेर
आमचे विमान हे दोन इंजिनचे आहे. तसेच, एचएएलने आम्हाला दुपारी ४.३० वाजेपर्यंत सेवा देण्याची लेखी पत्र दिले आहे. त्यामुळे आमची सेवा येत्या १३ जुलैपासून सुरू होईल.
गणेश निबे
संचालक, श्रीनिवास एअरलाईन्स
मोबाइल अॅप डाउनलोड करा आणि राहा अपडेट