म. टा. प्रतिनिधी, नाशिक
सिंहस्थ कुंभमेळ्यासाठी येणाऱ्या देश विदेशातील भाविकांसाठी महाकुंभ नाशिक २०१५ हे मराठी, हिंदी, इंग्रजी भाषेत माहिती देणारे ऑफलाइन मोबाइल अॅप विकसित करण्यात आले आहे. त्यासोबत हिंदू धर्माचा प्रचार व प्रसार व्हावा यासाठी संकेतस्थळ आणि 'कुंभमेळा महापर्व' हे फेसबुक पेज आकाराला आले आहे.
शिवसेना कार्याध्यक्ष उद्धव ठाकरे यांच्या हस्ते या अॅपचे लोकार्पण करण्यात आले. यामध्ये केवळ नाशिकच नाही तर प्रयाग, उज्जैन आणि हरिद्वार येथील सिंहस्थाची माहिती देण्यात आली आहे. नाशिक येथील सिंहस्थाचा इतिहास यात दिला असून त्यासोबत पर्वणी, तिथी, हॉटेल, प्रवास व्यवस्था, मध्यवर्ती ठिकाणे, प्रेक्षणीय स्थळे, मदत केंद्र, मार्ग कसा शोधाल, आदी माहिती या अॅपवर आहे.
पर्वणी तिथीमध्ये ध्वजारोहण आणि नाशिक आणि त्र्यंबकेश्वर येथील शाहीस्नानाच्या तारखांची माहिती देण्यात आली आहे. शहरात येणाऱ्या भाविकांसाठी सोयीच्या असणाऱ्या हॉटेल्सची माहिती असून, परिवहन व्यवस्थेमध्ये शहर बससेवा, रेल्वे, खासगी बस आणि सिंहस्थात नाशिकला विमानसेवा सुरू झालीच तर त्याच्या वेळाही दिल्या आहेत. सिंहस्थ काळात शहरापासून पाच ते सहा किलोमीटर अंतरावर वाहनतळे असणार आहे. तेथून भाविकांना चालत शहरात यावे लागणार आहे. ते भाविक शहरात आल्यानंतर आपण नेमके कोणत्या ठिकाणी आहोत याची माहिती कळण्यासाठी नाशिकमधील प्रमुख ठिकाणांचे वर्णन येथे असून निमाणी, पंचवटी, शालिमार, द्वारका, नाशिकरोड, मुंबई नाका, सातपूर या ठिकाणांचे परस्परांमधील अंतरही देण्यात आले आहे. मदत केंद्रांतर्गत आपत्कालीन सेवेची माहिती दिली असून यामध्ये पोलिस मदत केंद्र, इतर पोलिस स्टेशन, पोलिस कंट्रोल रूम, शासकीय रुग्णालय, रुग्णवाहिका, अग्निशामक केंद्र, रक्तपेढी, आणि आपत्कालीन मदतीची माहिती देण्यात आली आहे.
शहराची सखोल माहिती
नाशिक शहराच्या माहितीमध्ये शहराचा इतिहास, खरेदी, आकाशवाणी केंद्र, विमानतळ, मनोरंजन केंद्र, चित्रपट गृहे, प्रसिद्ध व्यक्ती यांचा उल्लेख करण्यात आला आहे. www.indiasculture.com हा संकेत स्थळाचा व https://www.facebook.com/sinhasthakumbhmela हा फेसबुकचा अॅड्रेस आहे.
मोबाइल अॅप डाउनलोड करा आणि राहा अपडेट
