सिंहस्थ कुंभमेळ्याच्या ध्वजारोहणादरम्यान रामकुंडावर भाविकांसोबत गर्दी पाहायला मिळत होती ती तरुणाईची. धर्मध्वजा फडकताच हा संपूर्ण घोळका आपल्या जल्लोषाने वातावरणातील उत्साह वाढवत होता.
एकीकडे अनेक शाळांनी ध्वजारोहणाच्या दिवशी खबरदारी म्हणून शाळांना सुटी दिल्याचे निदर्शनास आले तर दुसरीकडे कार्यालयांसोबत अनेक शैक्षणिक संस्थांचे कामकाज चालू होते. पण अनेकांनी कॉलेजला जाण्याचे टाळत कुंभमेळ्याचा माहोल जवळून जाणण्यासाठी गोदाघाटावर हजेरी लावल्याचे चित्र होते.
डोळस भक्ती
गोदावरीत डुबकी मारुन पुण्य कमावण्यापेक्षा गोदेची स्वच्छता करत देवाप्रती आपली श्रध्दा असल्याचे दाखवून देणे आजची तरुणाई अधिक पसंत करते. त्याचप्रमाणे इतरवेळी प्रशासन व्यवस्थेतील त्रुटी काढत रान उठवणाऱ्या तरुणाईने कुंभमेळ्याचे प्रशासनाने केलेले नियोजन पाहून त्यांच्या पाठीवर कौतुकाची थाप देत, प्रशासनाला सहकार्य केले पाहिजे अशी आशाही व्यक्त करते. अनेकांनी स्वत:पासून याचा श्रीगणेशा केला.
रात्रीपासून कारमध्ये
सचिन आणि दुर्गेशदेखील सकाळी साडेचारला गंगाघटावर ध्वजारोहणासाठी गेले होते. रविवार कारंजावर आपली गाडी पार्क करुन तिथून ते गंगेवर पायी गेले. बारा वर्षात येणारा हा सिंहस्थ अनुभवायाचा म्हणून हे दोघे मित्रांसोबत रात्री अकरापासून कारमध्ये बसून होते.
सेल्फी...
सेल्फीची क्रेझ ध्वजारोहणादरम्यानही दिसून येत होती. अनेक ग्रुप्सनी या सेल्फीच्या माध्यमातून सोशल मीडियावरही हा सोहळा हिट केला. गौरवने त्याच्या ग्रुपसोबत काढलेले सेल्फी फेसबूक, व्टिटर, इन्स्टाग्राम, व्हॉट्सअॅप, हाइक सगळीकडे पोस्ट केल्याचे सांगितले. अनेकांनी या सोहळ्याचे व्हिडिओजही सोशल साईट्सवर उपलब्ध करुन दिले.
कट्ट्यावर भाव
सिंहस्थाच्या ध्वजारोहणप्रसंगी काढलेले सेल्फी, व्हिडिओ, फोटोज याचे शेअरिंग कट्ट्यांवर होत होते. 'आज मी गेलो होतो, जाम मज्जा आली. कसली भारी पुष्पवृष्टी केली राव, झक्कास...' असे संवाद तरुणाईमध्ये रंगले होते. शाही स्नानाचा अनुभव घेण्याचे प्लॅनिंगही आतापासूनच यंगर्स्टर्समध्ये सुरू झाल्याचे दिसून आले.
मोबाइल अॅप डाउनलोड करा आणि राहा अपडेट
