विनोद पाटील, नाशिक
सिंहस्थ कुंभमेळ्यात साधुग्रामसह शाहीमार्ग आणि रामकुंडावर अतिरेकी हल्ल्याचा धोका लक्षात घेऊन सुरक्षा यंत्रणांनी आता या परिसराला चौपदरी सुरक्षा देण्याची तयार केली आहे. दहशतवाद प्रतिबंधक उपाययोजने अंतर्गत चार टप्प्यात ही सुरक्षा प्रणाली राबवली जाणार असून, त्यासाठी पंधरा हजार पोल‌िसांचे सुरक्षाकडेच तयार करण्यात आले आहे. गर्दीचे नियंत्रण आणि दक्षता यावर सुरक्षा यंत्रणाचा विशेष भर दिला जाणार आहे. पोलिस, सीआयडी, एटीएस, बाँम्बशोधक पथक, क्युआरटी, राज्य राखीव दलासह केंद्रीय सुरक्षा पथकांच्या जवानांचा यात समावेश आहे. नाशिकसोबतच त्र्यंबकेश्वरहीमध्येही हीच रचना ठेवण्यात येणार आहे.
सिंहस्थातील पर्वणी काळात एक कोटी भाविक नाशिकमध्ये येण्याचा अंदाज आहे. एवढ्या मोठया प्रमाणावर येणाऱ्या भाविकांच्या सुरक्षेचे मोठे आव्हान सुरक्षा यंत्रणांवर आहे. त्यासाठी आयबी, एनआयसह राज्यातील सुरक्षा एजन्सीजचे पथक नाशिकमध्ये सध्या कार्यरत असून, सुरक्षेचे इनपूट गोळा करीत आहेत. सिंहस्थ काळात साधुग्राम, रामकुंडाचा परिसर, शाही मार्ग, देवळाली कॅम्प, पोलिस ट्रेनिंग सेंटर यांना अतिरेकी कारवायांचा धोका आहे. त्यामुळे या सर्व ठिकाणांचा दहशतवाद प्रतिबंधक उपाययोजने अतंर्गत सुरक्षा पुरवण्याचे नियोजन आहे. यासाठी पहिल्या टप्प्यात सुरक्षा कशी पुरवायची यासंदर्भातील तयारी झाली आहे. साधूग्राम, शाहीमार्ग, रामकुंडावर पहिल्या टप्प्यात पोल‌िसांचे कडे राहणार आहे. यात गर्दीच्या नियंत्रणाला प्राधान्य दिले जाणार आहे. तर दुसऱ्या टप्प्यात सशस्र रायफलधारी पोल‌िसांची पोस्ट तयार करण्यात आल्या आहेत. तिसऱ्या आणि चौथ्या टप्प्यात क्युआरटी आणि कमांडो पथक तैनात राहणार आहेत. यासोबतच सीसीटीव्ही कॅमऱ्याचीही करडी नजर असणार आहे.
नाराजी चालेल; पण दुर्घटना नको
'रामकुंडासह साधुग्रामच्या सुरक्षेसाठी राजकीय नेत्यांची नाराजी परवडेल, पण दुर्घटना नको' अशी भूमिका पोल‌िसांनी घेतली आहे. राजकीय नेत्यांना प्रवेश नाकारल्यावरून पोल‌िसांना दूषणे दिली जात असली तरी, या नेत्यांसोबत असलेल्या कार्यकर्त्यांमुळे सुरक्षा यंत्रणांवर ताण येतो. यातून सुरक्षेत त्रुटी राहून मोठी दुर्घटना होण्याची शक्यता आहे. त्यामुळे राजकीय नेत्यांसह कार्यकर्त्यांना आवर घालण्यासाठी कठोर उपाययोजनाही करण्यात आल्या आहेत. पर्वणी काळात
सर्वांना समान वागणूक दिली जाणार आहे. त्यामुळे राजकीय नेत्यांची आरडाओरड सहन करण्याची तयारी पोल‌िसांनी केली आहे.
मोबाइल अॅप डाउनलोड करा आणि राहा अपडेट
