अरविंद जाधव, नाशिक
साधुग्राममधील जागांचा घोळ अजूनही सुरूच आहे. जागांचे, सुविधांचे वाद कुंभमेळ्याच्या आयोजनाला जुळलेले असतात. यापार्श्वभूमीवर वैदिक शास्त्रावर आधारित 'आगम खेडा प्रशासना'ची स्थापना झाल्यास प्रशासनाच्या टोलवाटोलवीला पायबंद बसण्याची शक्यता आहे.
वैदीक धर्मात प्राचीन काळात 'आगम खेडा प्रशासन' ही संकल्पना होती. यात सर्व व्यवहारांना धर्माकडून बंधने घालण्यात आलेली होती. समाजातील नागरिकांच्या कर्तव्यानुसाराच समाजाची रचना असल्याने अनाचार आणि व्याभिचाराला जागा नव्हती. भारतात सध्या लोकशाही नांदते. लोकशाहीची रचना तकलादू असल्याने अनाचाराने कळस गाठला आहे. यापार्श्वभूमीवर आगम खेडा प्रशासन ही संकल्पना महत्त्वाची ठरू शकते.
किमान हरिद्वार, अलाहाबाद, उज्जैन आणि नाशिक या कुंभमेळा आयोज‌ति होणाऱ्या चार शहरांमध्ये 'आगम खेडा प्रशासन' ही संकल्पाना व्यापक स्वरूपात सुरू करण्यासाठी प्रयत्न करणार असल्याचे साधुग्राममध्ये वास्तव्यास असलेल्या दबंगगुरू टायगर स्वामी यांनी स्पष्ट केले. जर्मनीतून वैदिक शास्त्रावर पीएच.डी केलेल्या आणि सध्या साधुग्राममध्ये वास्तव्यास असलेल्या टायगर स्वामी यांना साधुग्राम ही संकल्पनाच मान्य नाही. प्राचिन काळापासून होत गेलेल्या परकीय आक्रमणांमुळे वैदीक धर्माची ओळखच बदलली. ती प्राचीन नव्याने करून देण्याची सुरूवात आगम खेडा प्रशासनापासून होणार असल्याचा दावा, टायगर स्वामींनी केला. प्राचीन वेदांमध्ये आगम खेडा प्रशासनाचा उल्लेख असून आगम म्हणजे प्रथम तर खेडा म्हणजे शेत असा त्याचा अर्थ होतो, असे टायगर स्वामींनी स्पष्ट केले.
आजही साधु महंत साधुग्रामचा 'खेत' म्हणूनच उल्लेख करतात. धन, नदी, शस्त्र यासारख्या दैंनदिन बाबींचा वापर कसा करावा, याचेही सुत्र या प्रशासनात बांधले जाते. वैदीक धर्म पध्दतीत शिक्षणाच्या अनेक शाखा असून वैदीक गणित पध्दती त्यातील एक छोटासा भाग आहे. वैदीक धर्म पध्दतीचा प्रसार करण्यासाठी आगम खेडा प्रशासनाचा उपयोग होईल, असा दावा त्यांनी केला.
संवाद ददाती ईति नारदः
मोबाइलचा शोध अलीकडे लागला. मात्र, सनातन वैदीक पध्दतीमध्ये हा प्रकार फार जुना असल्याचा दावा टायगर स्वामींनी केला. 'सुदूर नर नारायाणाम संवाद ददाति ईति संवाद:' हा श्लोक मोबाइल या शब्दाचा अर्थ स्पष्ट करतो. दूरवरून संवाद साधण्याची कला प्राचीन होती. मात्र, परकीय आक्रमणांमध्ये हे दस्ताऐवज लोप पावले. महाभारतात शेवटच्या पर्वांत मोसल हा शब्द येतो. ऋषी मोसल यांचा तो उल्लेख असून त्यांनीच मिसाईलचा शोध लावला होता. पाश्चात्यांच्या हातात ऋषी मोसल यांनी लावलेला अनमोल शोध सापडला आणि त्यांनी मिसाईलचा शोध लागल्याचा दावा केला. याबरोबर, लोहपथ गमाव्रत (रेल्वे), आमृश्या (कम्प्युटर), विमान हे शब्द आणि त्यांचे शोध वैदिक धर्मातील वैज्ञानिकांनी हजारो वर्षापूर्वी लावल्याचे टायगर स्वामी यांनी स्पष्ट केले.
मोबाइल अॅप डाउनलोड करा आणि राहा अपडेट
