म. टा. प्रतिनिधी, नाशिक
खालशांसाठी पुरेशी जागा नसणे, हा वादाचा विषय ठरू पहात आहे. उशिराने साधुग्राममध्ये दाखल होणारे खालसे जागेसाठी आक्रमक भूमिका घेत असून, वादाचा मुद्दा गुद्द्यावर पोहचला आहे. अपुऱ्या जागेमुळे काही साधू-महंत आपसात भिडत असून, आखाड्याच्या ध्वजारोहणापर्यंत हमरी-तुमरीच्या घटनांमध्ये वाढ होण्याची शक्यता साधू व्यक्त करीत आहेत.
नाशिकमधील साधुग्राममध्ये तीन अनी आखाडे, ७५० खालसे, ४०० पेक्षा अधिक धार्मिक संस्था, तीन ते चार जगदगुरू यांच्यासाठी सुविधा निर्माण केल्या आहेत. निर्वाणी, निर्मोही आणि दिगंबर या तीन आखाड्यात एकूण १८ आखाड्यांचा समावेश असून तिन्ही अनी आखाडे, चर्तुसंप्रादाय आणि जगदगुरूंसाठी आवश्यक ती जागा दिली. मात्र, दिगंबर अनी आखाड्यासाठी पुरेशी जागा नसल्याचा दावा मध्येच करण्यात येतो. त्यातच खालशांना पुरेशी जागा नसल्याचा वाद अनेकदा उद्भवला आहे. औरंगाबादरोडवरील नव्याने निर्माण केलेल्या सेक्टर तीनमधील खालशांच्या जागा वाटपावरून दिगंबर आखाड्याचे श्री महंत रामकृष्णदास शास्त्री आणि निर्मोही अनी आखाड्याचे महामंत्री गौरीशंकर महाराज यांच्यात तू तू में में झाली होती. यानंतर, दिंगबर अनी आखाड्याच्या अन्नछत्रात खुसघोरी झाल्यावरून काही त्यागी व विश्वंभरदास यांच्यात वाद झाला. १९ ऑगस्ट रोजी आखाड्यांचे ध्वजारोहण पार पडणार आहे. त्यापूर्वी शतप्रतिशत खालसे साधुग्राममध्ये दाखल होणार असून, त्यांना जागा कोठे द्यायची असा प्रश्न आखाड्यांच्या प्रमुखांना पडला आहे. आखाड्याची ही भूमिका असताना आखाडा परिषदेचे अध्यक्ष महंत ग्यानदास हे मात्र सर्व आलबेल असल्याचा दावा करतात. दोन चार खालशांच्या जागेचा प्रश्न असून लवकरच त्यावर तोडगा निघेल, असे ग्यानदास म्हणतात. प्रत्यक्षात ९० ते १०० खालशांना पर्याप्त जागा नसून, जस जसे खालशांचे प्रमुख साधुग्राममध्ये दाखल होत आहेत, तसे नवनवीन वाद उद्भवत असल्याचे दिसते. प्रत्येक खालसा आपल्यासाठी मुबलक जागा मागत असल्याने सर्वांचीच पंचाईत होत आहे. यामुळे जागा वाद पेटणार आहे.
नाशिकमधील सुविधा उत्तम
देशात चार ठिकाणी कुंभमेळ्याचे आयोजन होते. मात्र, नाशिकमध्ये मिळणाऱ्या सुविधा खूपच चांगल्या असून, याचमुळे १०० टक्के खालसे साधुग्राममध्ये दाखल होण्याची शक्यता वर्तवली जाते. गेल्या वेळेस ४५० च्या जवळपास खालशांनी साधुग्राममध्ये मुक्काम केला होता. यावेळेस हा आकडा ७५० पर्यंत जाईल, असा दावा एका महंतांनी केला. रोड फ्रंटसाठी सगळा आटापिटा असून, पैशांचे वजन महत्त्वाचे असल्याचा दावा सदर महतांनी नाव न छापण्याच्या अटीवर केला. यामुळे जागेचा मुद्दा सर्वाथाने कळीचा ठरणार असून प्रशासन व आखाडा प्रमुखांना डोकुदुखी ठरणार आहे.
मग, जागा गेली कुठे?
सिंहस्थ कुंभमेळ्यासाठी किती आखाडे, खालसे आणि धार्मिक संस्था येणार याची माहिती प्रशासनाला होती. त्यामुळेच नवीन १२५ एकर जागा तात्पुरती संपादन करीत साधुग्रामसाठी एकूण ३२५ एकर जमीन वापरण्यात आली. जमीन वाढली म्हणजे खालशांना जागा मिळणे अपेक्षित होते. मात्र, तसे झालेले नाही. खालशांच्या जमीन वाटपात नक्कीच काळेबेरे झाले असून, त्यावर प्रशासनाने प्रकाश टाकण्याची मागणी जोर धरू लागली आहे.
मोबाइल अॅप डाउनलोड करा आणि राहा अपडेट
