म. टा. प्रतिनिधी, नाशिक
दहशतवादी हल्ला, गुन्हेगारी, बंडखोरांचा वावर अशा पार्श्वभूमीवर पोलिस यंत्रणा सजग झाली आहे. परराज्यातील गुन्हेगार डोकेवर काढत असून त्यांच्या मुसक्या आवळण्यासाठी पोलिसांनी बंदोबस्तात वाढ केली. सिंहस्थ कुंभमेळ्यात परराज्यातील गुन्हेगारांना रोखण्यासाठी २४ ऑगस्ट रोजी परराज्यातील पोलिस (स्पॉटर) दाखल होणार असल्याची माहिती सूत्रांनी दिली.
साधूग्राममध्ये वास्तव्यास असलेल्या साधू महंताकडे चारचाकी वाहने आहेत. भाविकांची वर्दळ वाढली असून त्यांच्या वाहनांच्या काचा फोडून आतील रक्कम पळवण्याच्या एक दोन घटना नुकत्याच घडल्या आहेत. या प्रकरणात पोलिसांनी परराज्यातील टोळी जेरबंद केली. कुंभमेळ्याच्या बंदोबस्तासाठी १० हजारापेक्षा जास्त पोलिस अधिकारी आणि कर्मचारी तैनात असून त्यांना त्यांच्या भागातील गुन्हेगारांची माहिती आहे. मात्र, परराज्यातील गुन्हेगारांबाबत स्थानिक पोलिस अनभिज्ञ असून त्यांना रोखण्यासाठी त्याच राज्यातील पोलिसांची मदत पोलिसांना घ्यावी लागणार आहे. अशा पध्दतीने मदतीला येणाऱ्या परराज्यातील पोलिसांना स्पॉटर म्हणतात.
हे स्पॉटर २४ ऑगस्टपर्यंत येतील, अशी अपेक्षा स्थानिक पोलिसांना आहे. स्पॉटरच्या मदतीने परराज्यातील गुन्हेगारांना ओळखणे, त्यांच्यावर कारवाई करणे शक्य होईल, असा दावा एका वरिष्ठ पोलिस अधिकाऱ्याने केला. सध्या, पर्यटक, साधू, साधूंचा भक्त म्हणून येणाऱ्या प्रत्येकाची चौकशी करणे शक्य नाही. संशयित नेमकी याचाच फायदा घेत असून स्पॉटरच्या मदतीने त्यांना रोखू, असेही या अधिकाऱ्याने सांगितले. दरम्यान, सिंहस्थ कुंभमेळ्यासाठी कोट्यवधी भाविक एकत्र जमले असून दहशतवादी हल्ला, समाजकंटकाचा वावर, बंडखोरांची उपस्थिती आदी मुद्यांवर पोलिसांनी लक्ष केंद्रीत केले आहे. सुरक्षेच्या दृष्टीकोनातून सर्व उपाययोजना राबवण्यात आल्या असून केंद्र व राज्य सरकारच्या सर्व इंटलेजिन्स संस्था काम करीत असल्याचे अन्य एका अधिकाऱ्याने स्पष्ट केले.
सुरक्षेची तालीम
कुंभमेळ्यानिमित्त भाविकांसाठी नाशिकरोड रेल्वे स्टेशनवर उपलब्ध केलेल्या सुविधांची पाहणी भुसावळ रेल्वे मंडळाचे अप्पर प्रबंधक जनककुमार गर्गे यांनी बुधवारी केली. कुंभमेळ्यासाठी दाखल झालेल्या विशेष रेल्वे अम्ब्युलन्स व्हॅनमध्ये जखमी अथवा आजारी भाविकांवर उपचाराची रंगीत तालीम यावेळी सादर करण्यात आली. वरिष्ठ मंडल प्रबंधक (वाणिज्य विभाग) मनोजकुमार गांगेय, दूरसंचार वरिष्ठ मंडल प्रबंधक अनुपकुमार सोनी, वरिष्ठ वैद्यकीय अधिकारी डॉ. पिंप्रीकर, विद्युत विभागाचे वरिष्ठ मंडल प्रबंधक एन. जे. निमजे, डी. के. गजभिये, मंडल सुरक्षा आयुक्त चंद्रमोहन मिश्र, स्टेशन प्रबंधक सक्सेना, रेल्वे सुरक्षा बलाचे निरीक्षक बी. डी. इप्पर, चंद्रशेखर भाबल आदी उपस्थित होते. गर्ग यांनी चौथा प्लॅटफार्म, नवीन पादचारी पूल, मालधक्का, तिकीट बुकींग कार्यालय, रेल्वे अम्ब्युलन्स व्हॅन आदींची पाहणी केली. सुरक्षा व अन्य गोष्टींबाबत त्यांनी विशेष सूचना केल्या.
कनकरत्नमांचा आज दौरा
लोहमार्ग पोलिसांचे अप्पर पोलिस महासंचालक कनकरत्नम हे बुधवारी (दि. १९) हे सकाळी अकराच्या सुमारास रेल्वे स्टेशनवरील सुरक्षा व्यवस्थेची पाहणी करणार आहेत. पोलिस अधक्षक अनंतकुमार रोकडे (नागपूर), उपअधीक्षक नारायण खैरे, ए. झेड. खान, माधुरी कांगणे आदींसह वरिष्ठ अधिकारी उपस्थितीत राहणार आहेत.
कुंभ भाविकांसाठी व्हील चेअर्स
नाशिकमधील सतरा रोटरी क्लबनी मिळून नाशिकरोड रेल्वे स्टेशनला ८ व्हील चेअर्स भेट दिल्या. कुंभमेळ्यासाठी येणाऱ्या वृद्ध, अपंगसारख्या भाविकांना त्यांचा मोठा आधार होणार आहे. नाशिक नॉर्थचे अध्यक्ष डॉ. आवेश पलोड यांच्या मदतीने या व्हील चेअर्स देण्यात आल्या. यावेळी रोटरीच्या पदाधिकारी रुपाली जायखेडकर, रेल्वे स्टेशनचे मुख्य वाणिज्य निरीक्षक गोसावी, डॉ. आवेश पलोड, विवेक जायखेडकर आदी उपस्थित होते.
नाशिक-नांदेड दरम्यान १२ विशेष जनरल रेल्वे
नाशिकच्या सिंहस्थ कुंभमेळ्यानिमित्त मध्य रेल्वेने नाशिकरोड-नांदेड दरम्यान १२ जनसाधारण विशेष रेल्वेगाड्या सुरू करण्याचा निर्णय घेतला आहे. या गाड्यांना द्वितीय श्रेणीचे कोचेस असतील. मध्य रेल्वेने कुंभसाठी सोमवारी १२८ अतिरिक्त रेल्वेगाड्या सोडण्याचे जाहीर केले होते. नाशिकरोड-नांदेड दरम्यान ०७९२६ ही गाडी नांदेडहून २५ व २८ ऑगस्ट तसेच १२, १७ व २४ सप्टेंबरला २२ वाजता सुटेल. या गाडीच्या सहा फेऱ्या होतील. नाशिकरोडला ही गाडी दुसऱ्या दिवशी १०.५० वाजता पोहोचेल. ०७९२७ ही गाडी नाशिकरोडहून १९, २६ व २९ ऑगस्ट आणि १३, १८ व २५ सप्टेंबरला २२.५० वाजता सुटेल. या गाडीला ओढा, लासलगाव, मनमाड, नगरसूल, रोटेगाव, लासूर, औरंगाबाद, जालना, परतुर, सेलू, मानवटरोड, परभणी आणि पूर्णा येथे थांबा मिळेल.
व्हायरल फिव्हरने साधू-महंत हैराण
वातावरणातील बदलाचा फटका साधू महंताना बसतो आहे. अनेक साधू- पर्यटक व्हायरल फिव्हरने हैराण असून दिवसभरात १ हजारापेक्षा जास्त साधूंना तसेच त्यांच्या अनुयायींना तपासले जाते आहे. महापालिकेने साधूग्राममध्ये एक हॉस्पिटल तसेच सेक्टरनुसार तपासणी केंद्र उभारले आहेत.
ध्वजारोहण संपन्न
साध्वी त्रिकाल भवंता यांच्या परी आखाड्याचे ध्वजारोहण मंगळवारी पार पडले. यावेळेस अवघ्या ४० साध्वी हजर होत्या. महंत ग्यानदास यांच्याशी वाद झाल्यानंतर भवंता यांनी ध्वजारोहण थाटामाटात करण्याची घोषणा केली होती. प्रत्यक्षात अत्यंत साध्या पध्दतीने हा सोहळा पार पडला. महिला साध्वींना कमी दाखवण्यासाठी सर्व प्रयत्न होत असून याविरोधात आपण आंदोलन करू, असे भवंता यांनी स्पष्ट केले.
परप्रांतीयांचा ओघ वाढला
ध्वजारोहणासाठी वेगवेगळ्या राज्यातील साधू महंत साधूग्राममध्ये दाखल झाले आहेत. या साधू महंतासोबत त्यांचे अनुयायी, भक्त सुध्दा येत असून यानिमित्ताने साधूग्राममध्ये परप्रांतीयांचा ओघ वाढल्याचे दिसते. आखाड्यांच्या ध्वजारोहणानंतर साधूग्राममधील निवासींच्या संख्येत वाढ होईल.
धार्मिक संस्थांमध्ये गर्दी
आखाडे, खालसे यांच्यासमवेत धार्मिक संस्थामधील महंतांची उपस्थिती लक्षणीय वाढली आहे. धार्मिक संस्थांसाठी औरंगाबाद हायवेलगत जागा देण्यात आली असून जेजूरकर मळे परिसरात सुध्दा धार्मिक संस्थांचे तंबू उभे राहिले आहेत. मारुती वेफर्सच्या कॉर्नर लगत मोकळ्या जागेत सेक्टर चार असून तेथेही अनेक धार्मिक संस्था सोयी सुविधा निर्माण केल्या जात आहेत.
कार्यक्रमांची रेलचेल
आखाड्याच्या ध्वजारोहण कार्यक्रमानंतर लागलीच प्रवचने, धार्मिक विधी, महंताई, यज्ञ असे कार्यक्रम सुरू होणार आहेत. या कार्यक्रमांना येणाऱ्या भाविकांसाठी अन्नक्षेत्र उघडले जातील.
शाही मार्गावर बॅरिकेडींग
शाही मार्गावरील रस्त्यावर बॅरकेडींग करण्याचे काम प्रशासनाने सुरू केले आहे. सध्या काट्या मारुती चौकातील रस्ता बल्ली बॅरिकेडींगने बंद करण्यात आला आहे. जाण्याच्या आणि परतीचा मार्ग वेगवेगळा ठेवण्यासाठी उपाय करण्यात आल्याचे सूत्रांनी सांगितले.
मोबाइल अॅप डाउनलोड करा आणि राहा अपडेट
