नाशिक शहराचा झपाट्याने विस्तार होत असल्याने गरजाही वाढत आहेत. शहराची संभाव‌ित पाण्याची गरज दूर करण्यासाठी महापालिकेने स्मार्ट पावले उचलण्याची गरज आहे. नव्याने विकस‌ित होणाऱ्या भागांमध्ये पाणी पोहाचविण्याचे मोठे आव्हान आहे. सद्यस्थितीतील १८८५ किलोमीटर पाइपलाइन्सपैकी निम्म्या बदलण्याची गरज आहे. वेळी अवेळी तसेच कमी दाबाने होणारा पाणीपुरवठा सुरळीत करावा लागणार आहे. यासाठी जलकुंभांची व जलवाहिनींची संख्या वाढवावी लागणार आहे.
जुने नाशकात पाण्याचा दाब कमीच
जुने नाशिक परिसरात पाणीटंचाई पाचवीला पुजलेली आहे. पाणीटंचाई काळात तर नानावलीसह इतर काही भागात पाण्याचे टँकरला पैसे मोजावे लागतात. खडकाळी भागातील खालच्या भागात पाण्याचा मुबलक तर वरच्या गैबनशहा भागात अतिशय कमी दाबाने होणाऱ्या पाणीपुरवठ्यामुळे नागरिकांना पाणीटंचाईला तोंड द्यावे लागते. हिच परिस्थिती पिंजारघाट, जोगवाडा, काझीपुरा कोठ, बागवानपुरा, श्रमिक नगर भागात कायम आहे. संजरीनगर, इगतपुरीवाला चाळ परिसरात तर नळांना विजेच्या मोटारी लावून देखील पुरेसे पाणी मिळत नाही, ही वस्तुस्थिती आहे.
पंचवटीकरांची अजूनही भागेना तहान
पंचवटीत काही भागात दोन वेळा तर काही भागात एक वेळही सुरळीत पाणीपुरवठा होत नाही.
महापौर आणि उपमहापौर यांच्या प्रभागात पिण्याचे पाणी दोन वेळा आणि अन्य ठिकाणी एक वेळ असूनही पुरेशा दाबाने मिळत नसल्याने रहिवाशी नागरिक नाराज आहेत. मेरी, म्हसरूळ, बोरगड, पेठरोड, दिंडोरी रोड या भागात कमी दाबाने पाणी मिळत आहे. बऱ्याच ठिकाणी तर पाणीच येत नाही. त्यामुळे नागरिकांची कुचंबना होते. धात्रक फाटा या ठिकाणच्या जलकुंभावरून परिसरातील हॉटेल जत्रा, कोणार्क नगर, हनुमान नगर, विडी कामगार भागासह सरस्वती नगर, वृंदावन नगर, अमृतधाम परिसर भागात एक वेळ पाणीपुवठा केला जातो. काही ठिकाणी अतिशय काम दाबाने पाणी येते, असे नागरिक सांगतात.
त्रिकोणी बंगला जवळील जलकुंभावरून साई नगर, आयोध्या नगर, रासबिहारी शाळा आदी परिसरात पाणीपुरवठा केला जातो. परंतु, कमी दाबाने पाणीपुरवठा होतो, अशी नेहमीच या भागातील लोकांची तक्रार आहे. गोरक्ष नगर, बोरगड भागातील रहिवाशांचे खूपच हाल आहेत. येथे दुपारी, कधी सकाळी तर कधी सायंकाळी पाणीपुरवठा केला जातो. पंचवटीतील पेठ रोडवरील अश्वमेध नगर, मेहेर धाम आणि शरद पवार मार्केट परिसरात तर पाणी अतिशय कमी दाबाने येते. अनेक ठिकाणच्या जलकुंभांची दुरवस्था झाली आहे. जलकुंभ बांधताना प्रभागवार बांधावेत आणि तसे नियोजन करावे. कोणार्क नगर आणि जत्रा हॉटेल मागील स्वामी समर्थ नगर येथेही पाणी कमी दाबाने येते. या ठिकाणची लाइन निलगीर बाग जलकुंभाला जोडावी, अशी मागणी केली आहे.
सिडकोवासीयांना
रात्री मिळते पाणी
महापालिकेच्या सिडको, नवीन नाशिक भागात पिण्याचा पाणीपुरवठा सुरळीत होत असला, तरी मात्र काही भागात रात्री, अपरात्री होणाऱ्या पाणीपुरवठ्याने रहिवाशी हैराण झाले आहेत. यावर कायमस्वरुपी तोडगा काढण्याची गरज आहे.
नवीन नाशिक सिडको भागासाठी सातपूरच्या पपया नर्सरीपासून स्वतंत्र पिण्याची लाइन नुकतीच करण्यात आली. यामुळे सिडकोवासीयांना सुरळीत पाणीपुरवठा होत आहे. यामध्ये अवजड वाहनांमुळे पाण्याच्या लाइनीचे लिकेजेचे प्रमाण बऱ्याच ठिकाणी वाढले आहे. पार्थडीफाटा भागातील वासननगर, पोलिस वसाहत, मुरलीधरनगर, ज्ञानेश्वरनगर, म्हाडा वसाहत, नरहरीनगर, बालकृष्णनगर व निर्मल कॉलनी आदी भागात महापालिकेकडून रात्री, अपरात्री होणाऱ्या पाण्याच्या पुरवठ्यामुळे महिला हैराण झाल्या आहेत. यामुळे महिलांच्या आरोग्याचे प्रश्न निर्माण झाले आहेत. आंदोलने करूनही यावर महापालिकेकडून तोडगा निघू शकलेला नाही.
सातपूरमध्ये अद्यापही टँकर सुरूच
सातपूरला जलवाहिनीत होत असलेल्या लिकेजेसमुळे पाणीपुरवठा विभाग हैराण झाला आहे. त्यातच सातपूरच्या काही भागात आजही टँकरने पाणीपुरवठा होत आहे. पिण्याच्या पाइपलाइन अवजड वाहनांमुळे लिकेज होत असल्याचे अधिकारी सांगतात.
सातपूरच्या मळे परिसरात आजही पिण्याचा पाण्याचा पुरवठा टँकरनेच होत आहे. स्लम भागात कधीच पाण्याचा तुटवडा भासत नाही. अंबड लिंकरोड भागात व सातपूच्या मुख्य रस्त्यांवर एमआयडीसीत येणाऱ्या अवजड वाहनांमुळे जलवाहिनीत सतत लिकेज होत असतात.
गंगापूररोड भागात देखील काही ठिकाणी पिण्याच्या पाण्याची समस्या रहिवाशांना भेडसावत आहे. लोकवस्ती वाढली परंतु, नवीन जलकुंभ न झाल्याने कमी-अधिक प्रमाणात पिण्याचा पाण्याचा पुरवठा होत असतो. यावर महापालिकेने गंगापूररोड भागात वाढलेली लोकवस्ती बघता नवीन जलकुंभ उपलब्ध करून देण्याची मागणी रहिवाशी करीत आहेत.
जुने नाशिक परिसरात अतिशय कमी दाबाने होणाऱ्या पाणीपुरवठ्याची कारणे शोधून त्यावर महापालिकेने उपाययोजना करण्याची गरज आहे. यासाठी नगरसेवकांनी पुढाकार घ्यावा.
- नाझमिन पिंजारी, जुने नाशिक
कमी दाबाने तसेच दूषित पाणीपुरवठ्याची मुख्य समस्या आहे. जुने नाशिकला पाणीपुरवठा करणाऱ्या जुन्या जलवाहिन्यांना बदलून अधिक व्यासाच्या टाकणे गरजेचे आहे.
- शरयू डांगळे, जुने नाशिक
परिसरात कोठेही पिण्याचे पाणी पुरेसे मिळत नाही. अतिशय कमी दाबाने पाणीपुरवठा होतो. अनेकांच्या घरात पाणी अजून चढलेच नाही. पुरेसे पाणी देण्याची महापालिकेने व्यवस्था करावी.
- शरद लभडे, पंचवटी
पाणी व घरपट्टी नियमित भरूनही पाणी मिळत नाही. नाशिक शहरात राहून खेड्यात राहण्याचा नक्कीच अनुभव आला. दररोज अधिक दाबाने पाणी येईल हे स्वप्न कधी पूर्ण होईल याची वाट पाहत आहे.
- नामदेव मधे, पंचवटी
सिडको भागातील काही ठिकाणी रात्रीच्या वेळी पाणीपुरवठा करण्यात येतो. यामुळे लवकरच सिडको भागात जलकुंभ उभारण्याचे काम हाती घेण्यात येणार आहे. यामुळे रात्री होणारा पाणीपुरवठा दिवसा करता येईल. नागरकांची गैरसोय दूर होईल.
- संजय बच्छाव, उपअभियंता, सिडको, पाणीपुरवठा विभाग
पाथर्डी गावातील शिवारात नव्याने वसलेल्या अनेक वसाहतींमध्ये रात्री होणाऱ्या पिण्याच्या पाणीपुरवठ्यामुळे महिलांनी अनेकदा आंदोलन केले. परंतु, महापालिका लक्षच घालत नसल्याने महिलांचे आरोग्यच धोक्यात आले आहे.
- ज्योती गायकवाड, रहिवासी, सिडको
सातपूरला नियमितपणे पिण्याच्या पाण्याचा पुरवठा महापालिकेकडून केला जातो. परंतु, अवजड वाहनांमुळे जलवाहिनींच्या लिकेजेमुळे त्रास सहन करावा लागत आहे. मुख्य जलवाहिनीला लिकेज झाल्यास पाणीपुरवठा विस्कळीत होत असतो.
- ए. व्ही. जाधव, उपअभियंता, पाणीपुरवठा विभाग सातपूर
गंगापूररोड भागात अनियमितपणे पाणीपुरवठा होत असतो. गेल्या अनेक
वर्षांपासून नवीन पाण्याची टाकीच गंगापूररोड भागात झालेली नाही. याकडे महापालिका आयुक्तांनी लक्ष घालत महापालिकेचे सर्व कर वेळेवर भरणाऱ्या रहिवाशांकडे लक्ष देण्याची गरज आहे.
- राजू मोरे, रहिवाशी, गंगापूररोड
मोबाइल अॅप डाउनलोड करा आणि राहा अपडेट
