त्र्यंबकेश्वर : यंदाच्या सिंहस्थाचे ब्रॅ‌ण्डिंग करून प्रशासनाने पहिल्या शाही पवणीला त्र्यंबकेश्वरमध्ये किमान दहा ते पंधरा लाख भाविक येतील, असे वर्तवले होते. मात्र, अतिरिक्त बंदोबस्तामुळे प्रशासनाचे नियोजनतर चुकलेच शिवाय गर्दीचा आकडाही घटला. त्र्यंबकचे रस्ते भाविकांनी फुलेलेच नाहीत. काही अनूचित प्रकार घडला नाही म्हणून स्वतःची पाट थोपटून घेणाऱ्या प्रशासनाला भाविकांना आकर्षित करण्यात साफ अपयश आले. यामुळे किमान दुसऱ्या पर्वणीत तरी प्रशासन योग्य नियोजन करून भाविकांची सोय करण्याचा प्रयत्न करेल.
त्र्यंबकेश्वरमध्ये पोलिसांनी गर्दी व सुरक्षेचा खूपच बाऊ केला. यामुळे खंबाळे गावापासूनच बॅरिकेड्स लावण्यात आले. त्र्यंबकचे रस्ते साधू व भाविकांनी फुलण्याऐवजी बॅरिकेड्स, पोलिस प्रशासनाने गजबजले होते. सर्वत्र पोलिसांची वाहनेच वाहने होती. असा एकही रस्ता नव्हता जिथे बॅरिकेड्स नव्हते. यामुळे बॅरिकेड्सचे अतिक्रमण झाले होते. यामुळे ही पर्वणी साधू व भाविकांपेक्षा पोलिसांनीच खऱ्या अर्थाने साधली आहे. अतिरिक्त बंदोबस्ताचा पर्वणीला मोठा फटका बसला. शुक्रवारीच पोलिसांनी रस्ते बंद केल्याने हॉटेल बूक करूनही पर्यटक व भाविक नियोजित स्थळी पोहोचू शकले नाहीत. यामुळे हॉटेल व्यावसायिकांना मोठा फटका सहन करावा लागला. बुकिंगचे पैसे परत करावे लागले. इतर व्यावसायिकांचीही हीच स्थिती होती. भाविकांची संख्या कमी असल्याने त्र्यंबक रस्त्यावरील हॉटेल व्यावसायिकांनाही आर्थिक फटका बसला.
स्थानिक नागरिकांनी शाही मिरवणुका पाहण्यासाठी गर्दी करू नये म्हणून त्यांना हुसकावण्यात येत होते. स्वतःच्या घराच्या ओट्यालाही नागरिक परके झाले होते. गल्ली बोळ्यांमध्ये बॅरिकेड्स लावून घराबाहेर पडणेही मुश्किल केले होते. यामुळे ही शाही पर्वणी नेमकी कोणासाठी आहे, असा सवाल स्थानिक नागरिक उपस्थित करीत होते.
पोलिस भाविक व पर्यटकांना रस्त्यावरही उभे देत नव्हते. पोलिसांनी व्हीव्हीआयपींना बंदी घातलेली असताना एका पोलिस अधिकाऱ्याला त्याच्या परिवारासह कुशावर्तापर्यंत गाडीवर नेऊन सोडण्यात आले. नियम फक्त आम भाविक व पर्यटकांसाठीच लावण्यात येतात, अशी भावना बोलून दाखवली जात होती.
निरंजनी व आनंद आखाडा यांच्या शाही मिरवणुकीवेळी कुशावर्ताजवळ नागा साधूंसोबत भाविकांनी गर्दी केली होती. जमावाला अटकाव घालण्यात शीघ्र कृती दल व पोलिसांचे बळही अपुरे पडले. जिल्हाधिकारी दीपेंद्रसिंह कुशवाह स्वतःच मैदानात उतरल्यानंतर इतर अधिकाऱ्यांना स्फूरण चढले.
मोबाइल अॅप डाउनलोड करा आणि राहा अपडेट
