vinod.patil@timesgroup.com
नाशिक : मुंबई-पुणे शहरातील वैद्यकीय सेवा सुविधा आता नाशिकमध्ये उपलब्ध होऊ लागल्याने वैद्यकीय क्षेत्रासाठी नाशिक नवीन डेस्ट‌िनेशन म्हणून उदयास येत आहे. शहरात कमी खर्चातील शासकीय उपचार सुविधांसोबतच राष्ट्रीय व आंतरराष्ट्रीय दर्जाची कार्पोरेट स्पेशालिस्ट हॉस्पिटल्स व सुपर स्पेशालिटी हॉस्प‌िटल्सची साखळीच उभी राहिली आहे. तर आरोग्य विज्ञान विद्यापीठ, वैद्यकीय महाविद्यालये, आयुर्वेद महाविद्यालय, नर्सिग कॉलेजेसचेही जाळे उभे राहिल्याने आता नाशिकचा प्रवास मेडिकल टूरिझमच्या दिशेन सुरू झाला आहे. सद्यस्थितीत शहरातील विविध प्रकारच्या स्पेशालिस्ट अशा १२७५ हॉस्पीटल्समधून उत्तम दर्जाची वैद्यकीय सुविधा रुग्णांना मिळत आहे. वाढती लोकसंख्या आणि देश परदेशातून येणाऱ्या रुग्णांवर प्रभावी उपचार करण्यासाठीची आरोग्य यत्रंणा नाशिकमध्ये उभी राहत आहे. त्यामुळे नाशिकचा प्रवास स्मार्टसिटीच्या सुरू झाला आहे.
केंद्र सरकारने जाहीर केलेल्या स्मार्ट सिटी योजनेत नाशिकचा समावेश केला असून, स्मार्ट सिटीच्या दिशेने झेपावणाऱ्या नाशिकला वैद्यकीय सुविधांचाही निकष पूर्ण करावा लागणार आहे. वैद्यकीय सुविधांचा हा निकष पूर्ण करण्यासाठी नाशिकचे वातावरण अनुकूल असून, त्या दृष्टीने नाशिकने अगोदरच पावले उचलली आहेत. सद्यस्थितीत शहरात ९० टक्के आरोग्यसेवा ही खाजगी हॉस्प‌िटल्समधून पुरविली जाते. त्यामुळेच देशात आरोग्य सुविधांबाबत उदयोन्मुख शहर बनल्याचा निष्कर्ष एका सर्व्हेक्षणातून समोर आल्यानंतर नाशिकला हेल्थ केअरमधील 'बेस्ट इमर्जिंग सिटी इन हेल्थ केअर' हा किताबही लाभले आहे. मल्टी फॅसिलिटी हॉस्पिटल्स, मर्क्युरी सुपर स्पेशालिटी, सुपर स्पेशालिटी हॉस्पिटल्स पाठोपाठ मोठ्या आरोग्य क्षेत्रातील उद्योग समूहांची कोट्यवधी रुपयांची गुंतवणूक करून शहरात एका छताखाली सर्व आरोग्य सुविधा उपलब्ध करणारी साखळी पद्धतीची हॉस्पिटल्स शहरात आता उभी राहत आहेत. मोठ्या प्रमाणावर हॉस्प‌िटल्सची साखळी उभी राहत असल्याने सर्वसामान्यांच्या आवाक्यात काही प्रमाणात चांगल्या आणि उत्तम दर्जाच्या वैद्यकीय सुविधा आता येताना दिसत आहेत.
सद्यसिस्थितीत नाशिकची लोकसंख्या ही १८ लाखाच्या आसपास आहे. २०१५ मध्ये नाशिकची लोकंसख्या ही ५२ लाखाच्या आसपास जाणार आहे. त्यासाठीचे वैद्यकीय सोयी सुविधा उभारण्यावरही महापालिकेने भर दिला आहे. वाढत्या लोकसंख्येच्या सामना करण्यासाठी आरोग्य सुविधा उपलब्ध करणे आवश्यक आहे. शहरात सद्यस्थितीत पाचशे लोकांमागे सरासरी एक डॉक्टर आहेत. त्यांची संख्या वाढविणे आवश्यक असून, त्यासाठी वैद्यकीय महाविद्यालयांची संख्या वाढविणे आवश्यक आहे. जिल्ह्यातील एकूण डॉक्टरांपैकी ५४ टक्के डॉक्टर्स शहरात आहेत. जिल्ह्यात सुमारे १४ हजार रुग्णखाटा असून, ४६९ लोकांमागे एक खाट असे प्रमाण. रुग्णखाटांपैकी ६१ टक्के नाशिक शहरात, २८ टक्के सार्वजनिक क्षेत्रात आहेत. शहरातील खासगी रुग्णालयांमध्ये ५-२० खाटांची रुग्णालये सर्वाधिक आहेत. आरोग्य विज्ञान विद्यापीठाचा बराचसा फायदा शहराला होत आहे. एक शासकीय सुपर स्पेशालिटी रुग्णालयही आहेत. शिवाय मविप्रचे भव्य रुग्णालयही आहे. त्यासोबतच सहा नर्सिंग कॉलेज, दंत महाविद्यालय, तीन आयुर्वेद महाविदयालय असल्याने वाढत्या लोकसंख्येची गरज पूर्ण करण्यासाठी लागणारे मनुष्यबळ उपलब्ध करणारी यंत्रणा शहरात उभी राहिली आहे. शहरातील अनेक हॉस्प‌िटल्समधून महाराष्ट्र आरोग्य विज्ञान विद्यापीठाचे कोर्सेस राबविले जात असून, सुपर हॉस्प‌िटल्सला आवश्यक मनुष्यबळाची कमतरता भरून काढण्याचा प्रयत्न होत आहे. डिप्लोमा, बॅचरल डिग्री ते अगदी पीजीपर्यंतचे कोर्सेस आता हॉस्प‌िलमध्ये राबविले जात आहेत.
शहराला वैद्यकीय सेवा सुविधा पुरवण्यासाठी खासगी कंपन्या या क्षेत्रात उतरत आहेत. क्रिटिकल आजार, ह्दयविकार, बायपास, किडनी ट्रान्सप्लान्टेशन, न्यूरोसह मानसोपचारपर्यंत अन् गंभीर अपघातग्रस्तांना उपचारासाठी मुंबई, पुण्यात घेवून जाण्याची प्रथा आता बंद झाली आहे. आधुनिक तंत्रज्ञानाचा वापर करून वैद्यकीय सेवा अद्ययावत केल्या जात आहेत. आता वातानुकुलीत अतिदक्षता विभाग, डायलिसीस युनिट, पेरीटोनिअल डायलिसीस, किडनी बायोप्सी, प्लासमाफेरसीस, अँजिओग्राफी, अँजिओप्लास्टी, बायपास सर्जरी, एमआरआय, हायस्प‌‌िड सिटी स्कॅन, सांधे प्रत्यारोपण, टेस्ट ट्यूब बेबी यासारख्या सुविधा देणारे मल्ट‌ि स्पेशालिटी, मर्क्युरी सुपर तसेच सुपर स्पेशालिटी हॉस्पिटल नाशिकमध्ये उभी राहिली आहेत. अपघातग्रस्तांसाठी अॅक्सिडेंट हॉस्पिटल ट्रॉमाकेअर, क्रिटीकेअर सेंटरही सज्ज झाली आहेत. या सोबतच शासकीय रुग्णालयामध्येही आधुनिक तंत्रज्ञान उपलब्ध झाल्याने गोरगरिबांनाही कमी खर्चात आरोग्यसेवा उपलब्ध होत आहेत.
हॉस्प‌िटल्सच्या संख्येत वाढ
अपोलो ,सिक्स सिग्मा, वोक्हार्ट हॉस्पिटल, शताब्दी हॉस्पिटल , सह्याद्री हॉस्पिटल, मॅग्नम, क्युरी मानवता कॅन्सर सेंटर्स, ही साखळी हॉस्पिटल्स नाशिकमध्ये सध्या कार्यरत आहेत. अजूनही काही मोठ्या ग्रुपची स्पेशालिस्ट हॉस्पीटल्स नाशिकमध्ये येऊ घातली आहे. या कॉर्पोरेट हॉस्प‌िटलसोबत सुयश हॉस्पीटल, सोपान हॉस्पिटल, विभागीय संदर्भ सेवा रुग्णालय, नामको हॉस्पिटल, राजे बहादूर हार्ट फाउंडेशन, नाशिक बर्न हॉस्पिटल, लोटस हॉस्पिटल, जेनेटिक हेल्थकेअर अॅण्ड रिसर्च सेंटर, सिटीकेअर हॉस्पीटल्स, अश्विनी हॉस्पिटल, श्री साईबाबा हार्ट इन्स्टिट्यूट, श्री गुरूजी हॉस्पिटल, मॅग्नम हार्ट इन्स्टिट्यूट, ऋषिकेश हॉस्पिटल, श्री गुरूजी हॉस्पीटल्स अशी आधुनिक हॉस्पिटल्स दर्जेदार आरोग्यसेवा पुरवत आहेत. तर शहर गेल्या चार-पाच वर्षात शहर मेडिकल टूरिझमच्या दिशेने झेपावतांना दिसत आहे. अनेक हॉस्प‌िटल्समध्ये मेडिकल टूरिझमचा स्वतंत्र विभागही चालवितो.
नाशिकमधील हॉस्पीटल्स
वैद्यकीय महाविद्यालये २
आयुर्वेद महाविद्यालय ३
नर्सिग कॉलेज ६
फार्मसी महाविद्यालये ११
शहरातील हॉस्पीटल्स १२४५
स्पेशालिस्ट हॉस्पीटल्स ३
सुपरस्पेशालीटी हॉस्पीटल्स २४
शासकीय हॉस्पीटल्स २
महापालिकेची हॉस्पीटल्स ५
पॅथॉलॉजी लॅब २८
मोबाइल अॅप डाउनलोड करा आणि राहा अपडेट
