म. टा. खास प्रतिनिधी, नाशिक
डॉ. बाबासाहेब आंबेडकर यांनी केलेले धर्मांतराची ऐतिहासिक घोषणा ही जगातील मानवी इतिहासातील सर्वात मोठी अहिंसक क्रांती असून अखंड विश्वातील तमाम प्रकारच्या गुलामीतून मानवास मुक्त करणारी अभूतपूर्व क्रांती होती. त्यांनी लिहिलेल्या संविधानाचा स्वीकार म्हणजे धम्माचा स्वीकार असे म्हटल्यास वावगे ठरू नये, असे प्रतिपादन पत्रकार संजय आवटे यांनी केले.
भारतरत्न डॉ. बाबासाहेब आंबेडकर यांची १२५ वी जयंती आणि ऐतिहासिक धर्मांतर घोषणेच्या वर्धापनदिनानिमित्त लोककवी वामनदादा कर्डक प्रतिष्ठान नाशिक यांच्या वतीने धर्म, धम्म आणि भारतीय संविधान या विषयावरील व्याख्यानात आवटे बोलत होते.
जगातील सर्व धर्म देव-ईश्वर दैवताला देवालयात शोधत असताना तथागत बुध्दाने तो समस्त गणराज्यात संघ शासनात असल्याचे सांगून धम्म आणि भारतीय संविधान हेच जगाला तारक असल्याचे सांगितले. मानवतावादी, समतावादी कार्यकर्ते, विचारवंतांनी डॉ. बाबासाहेब आंबेडकरांशी नाते सांगणाऱ्यांनी त्यांच्या विचार कार्याशी इमान राखा, असे आवटे म्हणाले.
यावेळी प्रमुख पाहुणे म्हणून प्रतिष्ठानचे संस्थापक कार्याध्यक्ष शरद शेजवळ, सल्लागार प्रकाश वाघ, प्रा. कविता कर्डक, शिवाजी भोसले उपस्थित होते. कार्यक्रमाच्या अध्यक्षस्थानी प्रा. अर्जुन कोकाटे होते. प्रारंभी बोधी वृक्षाला पाणी देत मुक्ती काव्य संमेलन व आंबेडकरी प्रबोधन शाहिरी जलशा व जाहीर व्याख्यान कार्यक्रमाचे उदघाटन करण्यात आले. शंकर जाधव यांनी सूत्रसंचलन केले. काव्य संम्मेलनाच्या अध्यक्षस्थानी कवी शिवाजी भालेराव होते. लक्ष्मण बारहाते, सचिन साताळकर, राहुल आढांगळे, महेश शेटे, रतन पिंगट, भास्कर चव्हाण यांनी सामाजिक प्रबोधनपर कविता सादर केल्या. लोककवी वामनदादा कर्डक प्रतिष्ठान कला पथक नाशिकच्या कलावंतांनी प्रबोधनपर शिवाजी, फुले, आंबेडकरी शाहिरी जलशा सादर केला.
मोबाइल अॅप डाउनलोड करा आणि राहा अपडेट
