जायकवाडीला पाणी देण्याविरोधात तब्बल सहा तास चाललेल्या महासभेत सर्वपक्षीय नगरसेवकांनी भाजपला कोंडीत पकडत आमदारांसह पक्षाचे वस्रहरण केले. हक्काच्या पाण्यासाठी नगरसेवकांनी पक्षभेद विसरत एकत्रित येऊन लढा उभारण्याचा पवित्रा घेतला. सभागृहात नगरसेवकांनी एकमेकांची उणीदुणी काढण्याची संधी सोडली नाही. पाण्याच्या प्रश्नावर राजकारण करू नका असे सांगत सर्वानीच एकमेकांचे चेहरे उघडे पाडण्याचे प्रयत्न केले. त्यामुळे सभागृहाला आखाड्याचे रूप मिळाले होते.
पाणीप्रश्नावर भाजपने ऐनवेळी नरो वा कुंजरोची भूमिका घेतल्याने भाजपला उघडे पाडण्याची एकही संधी नगरसेवकांनी सोडली नाही. महापौर अशोक मुर्तडक, शिवसेना गटनेता अजय बोरस्ते व शिवसेना आमदार अनिल कदम यांचे जाहीर कौतुक करीत भाजपला दुषणे दिली. पाण्याची दाहकता दाखवत भाजपवर आरोपाची एकही संधी नगरसेवकांनी सोडली नाही. शिवसेनेच्या अजय बोरस्ते यांनी सर्वपक्षभेद विसरून या अन्यायाविरोधात राजकीय व न्यायालयीन लढाई लढू असे सांगत वर्धापन दिनालाचा आंदोलनाची दुर्दैवी वेळ आल्याची टीका केली.
कौतुकाची थाप
पाण्याच्या प्रश्नावर प्रथम नागरिक म्हणून पुढाकार घेणाऱ्या महापौर अशोक मुर्तडक यांचे सभागृहातील सर्वच नगरसेवकांनी कौतुक केले. बोस्टनवरून परत येताच त्यांनी पाण्यासाठी रस्त्यावर उतरून सर्वपक्षीयांना सोबत घेऊन आंदोलन उभे केले. पाणी आंदोलनासाठी त्यांनी केलेली धावपळ ही निश्चित कौतुकास्पद असल्याचे उद्गार सर्वच सदस्यांनी काढले. शहरवासीयांच्या पाण्यासाठी महापौरांचा पुढाकार हा भूषणावाह असल्याचा दावा नगरसेवकांनी केला तर, दुसरीकडे भाजपसह आमदारांचा निषेध केला.
भुजबळ फार्महाऊसवर जाणाऱ्या शिवसेनेच्या नेत्यांवर टीका करणाऱ्या आमदार देवयानी फरांदे यांनी नगरसेवक सचिन महाजन यांना चांगलेच सुनावले. तसेच आपण बराच काळ आमच्या सोबत होता. आमच्या घरातही तुम्ही यायच्यात असे सांगत तुमच्या पोटात आता का दुखते असा सवाल महाजन यांनी उपस्थित केला. छगन भुजबळांच्या नावाने बोटे मोडण्यापेक्षा भुजबळांना जे जमले नाही ते भाजप आमदारांना का जमत नाही, असा सवाल त्यांनी केला.
मराठवाड्याची सुपारी!
या महासभेत बोलताना काँग्रेसचे नगरसेवक शाहू खैरे यांनी मराठवाड्यात हजारो शेतकरी पाणी वापरत आहेत. मात्र दिवाळीत आपल्यावर पाणीकपातीचे संटक आले आहे. हा आमचा गुन्हा झाला आहे. गोदावरी प्रदूषणात कधी उच्च न्यायालयाचे आदेश पाळले नाहीत. मात्र, आताच आदेश पाळले जात आहेत, असे सांगत कोणीतरी पाणी सोडण्यासाठी मोठी सुपारी वाजवल्याचा आरोप त्यांनी सभागृहात केला.
मंत्रिमंडळ विस्ताराची भीती
महासभेत स्थायी समिती अध्यक्ष शिवाजी चुंभळे यानी भाजपच्या आमदारांवर चांगलेच टीकास्र सोडले. आमदार आपल्या कर्तव्यापासून दूर गेल्याने त्यांनी जनतेचा मनस्ताप ओढवून घेतला आहे. आगामी काळात मंत्रिमंडळाचा विस्तार आहे. त्यामुळे कदाचित पद मिळावे यासाठी ते गप्प बसल्याची टीका त्यांनी केली. आता तुम्ही २०१७ ची स्वप्ने पाहू नका, असा टोला लगावत तुम्हाला जनता माफ करणार नाही असा इशारा दिला.
अन् शेवट ३८ ने!
पाण्याच्या ज्वलंत प्रश्नावर महासभा बोलावली असताना नगरसेवकांनी त्यातही उदासीनता दाखवली. महासभेत १२७ नगरसेवक आहेत. प्रत्यक्षात हजेरी ८९ नगरसेवकांनी लावली, तर शेवटपर्यंत निम्मेच म्हणजे ३८ नगरसेवक उपस्थित राहिले. महासभेत ३९ नगरसेवकांनी आपली भूमिका मांडली. काहींनी काढता पाय घेतला. महापौरांनी चाप लावला तरी नगरसेवकांचे पलायन सुरूच होते.
भाजपची गोची
सभागृहात सर्वाधिक हल्लाबोल झाला तो भाजप आमदार व सरकारवर. त्यामुळे या आक्रमणाचा सामना करताना भाजपचे गटनेते संभाजी मोरूस्कर यांची तारांबळ उडाली. ज्या आमदारांना निवडून दिले, त्यांनीच पाठ फिरवल्याने नगरसेवक आक्रमक झाले होते. थेट भाजपचेच धिंडवडे नगरसेवकांनी काढत पालकमंत्री, मुख्यमंत्री यांनाही टीकेचे धनी केले. मात्र, आम्ही महापौरांसोबत असल्याचे सांगत पाणी आंदोलनावर सोबत असल्याचे सांगण्याचा केविलवाणा प्रयत्न केला.
पालकमंत्री कुंभकर्ण
मनसे जिल्हाध्यक्ष सुदाम कोंबडे यांनी पालकमंत्र्यांवरच हल्लाबोल केला. पालकमंत्री कुंभकर्णासारखे झोपी गेल्याचा आरोप करीत पालकमंत्री उपरा मिळाल्याने व त्यांनी झोपेचे सोंग घेतल्यानेच हाल झाल्याचा आरोप सुदाम कोंबडे व वंदना बिरारी यांनी केला. या वक्तव्यावरून सभेत वादंग झाला..
पाटलांचे आंदोलन
सभागृहात भाजपचे नगरेसवक दिनकर पाटील यांनी सभागृहातच भाजपविरोधात भूमिका घेत थेट आंदोलन करण्याची सूचना केली. सभागृहात आंदोलन करून सरकारला जाग आणून देऊ, अशी विनंती त्यांनी केली. शिवसेनेच्या नेत्यांनी चांगले केले असे सांगत आमच्या आमदारांचे आता विचारूच नका असा टोलाही त्यांनी स्वपक्षीयांना लगावला. जनतेचा कळवळा असेल तर थेट आंदोलन करा, असे आव्हानच त्यांनी सर्वांना दिले. सभागृहात आंदोलन करण्याची केलेली घोषणा त्यांनी मागे घेतली.
मोबाइल अॅप डाउनलोड करा आणि राहा अपडेट
