धात्रक फाटा येथे युवकावर गोळीबार करून फरार झालेले आरोपींचा कोणताही माग लागलेला नसताना रविवारी पहाटे अज्ञात आरोपींनी याच परिसरातील राज आनंद मंगल कार्यालयामागे असलेल्या रो हाऊसमध्ये राहणाऱ्या अविनाश कृष्णराव सवई (वय ४२) यांच्यावर प्राणघातक हल्ला केला. ही घटना पहाटे साडेतीन वाजेच्या सुमारास घडली.
गंभीर जखमी असलेल्या सवई यांना खासगी हॉस्पिटलमध्ये दाखल करण्यात आले असून, त्यांची प्रकृती गंभीर असल्याने पोलिस तपास थंडावला आहे. सवई रात्रीच्या सुमारास घराबाहेर का पडले याचेच उत्तर पोलिसांना अद्याप मिळालेले नाही. हाणामारी झाल्यानंतर स्थानिक नागरिकांनी या घटनेची माहिती पोलिसांना दिली. या प्रकरणी औरंगाबाद येथे राहणाऱ्या रमेश कृष्णराव सवई यांनी दिलेल्या फिर्यादीनुसार आडगाव पोलिस स्टेशनमध्ये गुन्हा दाखल करण्यात आला.
तरुणीस मारहाण
कौटुंबीक कारणावरून एका तरुणीचे अपहरण करून बेदम मारहाण करण्यात आली. या प्रकरणी भद्रकाली पोलिस स्टेशनमध्ये विवाहितेसह सहा संशयितांविरोधात अपहरण, मारहाणीचा गुन्हा दाखल करण्यात आला. याबाबत गडकरी चौक परिसरात राहणाऱ्या तरुणीने दिलेल्या फिर्यादीनुसार शुक्रवारी रात्री नऊ वाजेच्या सुमारास शताब्दी हॉस्पिटलच्या आवारातून संशयित सविता छगन विधाते आणि प्रशांत यांनी कौटुंबीक कारणावरून बेदम मारहाण केली. तसेच, संशयितांनी तिचे दुचाकीवरून अपहरण करीत गोविंदनगर परिसरातील अनमोल शिल्प अपार्टमेंट नेले. संशयित सविताच्या घरच्यांनीदेखील सोनलला शिवीगाळ करीत बेदम मारहाण केली.
भिंत मालकांवर गुन्हा
घराची भिंत कोसळून जखमी झालेल्या महिलेने दिलेल्या फिर्यादीनुसार भद्रकाली पोलिसांनी काझीगढी येथील घरमालकावर गुन्हा दाखल केला आहे. अशा पध्दतीचा गुन्हा प्रथमच दाखल झाला असून, यामुळे जुन्या घरांमध्ये किंवा वाड्यांमध्ये राहणाऱ्या नागरिकांचे धाबे दणाणले आहेत.
गेल्या महिन्यात जुन्या घराची भिंत कोसळून एक महिला जखमी झाली होती. या प्रकरणी सतरा दिवसांनंतर महिलेने भद्रकाली पोलिस स्टेशनमध्ये संबंधित घरमालकाविरोधात तक्रार दाखल केली. २० ऑक्टोबर रोजी दुपारी एक वाजेच्या सुमारास काझीगढी, कुंभारवाडा येथे राहणाऱ्या कुसुमबाई सोमनाथ वासनकर (वय ५०) या थकवा लागल्याने काझीची गढी येथील घर क्रमांक १५१६ च्या पायरीवर बसल्या होत्या. त्याचवेळी अचानक घराची भिंत त्यांच्या अंगावर कोसळल्याने त्यांना गंभीर दुखापत झाली होती. या प्रकरणी सविता सुदाम उखाडे (कुंभारवाडी) यांनी दिलेल्या फिर्यादीनुसार पोलिसांनी घर नंबर १५१६ आणि १५१७ क्रमाकांच्या घराच्या मालकांविरोधात गुन्हा दाखल केला आहे.
आठ लाखाची चोरी
सातपूर परिसरातील पवन ठाकूरदास चांदवाणी यांची बाबासाई बेकरीचे छत उचकटून चोरट्याने सुमारे आठ लाखांचा ऐवज चोरून नेला. चोरट्यांनी शनिवारी रात्री साडेदहा वाजेच्या सुमारास बेकरीच्या छताचा पत्रा उचकटून आणि पीओपी सिलिंग तोडून बेकरीत प्रवेश केला. त्यानंतर चोरट्याने बेकरीच्या कार्यालयातील लॉकर तोडून तेथून ७ लाख ९५ हजार रुपयांची रोकड चोरून नेली. या प्रकरणी सातपूर पोलिस ठाण्यात घरफोडीचा गुन्हा दाखल केला आहे.
मोबाइल अॅप डाउनलोड करा आणि राहा अपडेट