चैतन्याचे पर्व घेऊन येणाऱ्या दीपावलीने घराघरांसह बाजारातही उत्साह निर्माण केला आहे. सोमवारच्या धनत्रयोदशीच्या निमित्ताने नाशिककरांनी बाजारपेठांमध्ये मोठ्या प्रमाणात खरेदीसाठी गर्दी केली होती. त्यामुळेच सोने, होम अप्लायन्सेस, वाहने, कपडे, घरे यांच्या खरेदीने वेग घेतला आहे. तर सोन्याचे घटलेले दर आणि ग्राहकांचा प्रतिसाद यामुळे शहरात किमान १० कोटी रुपयांहून अधिक उलाढाल झाल्याचे सराफ व्यासायिकांकडून सांगण्यात येत आहे.
यंदाचे दुष्काळी सावट आणि शहरातील सातपूर व अंबड एमआयडीसीतील उद्योगांमध्ये दिवाळी बोनस अल्प प्रमाणात असला तरी दिवाळीच्या उत्साहावर परिणाम झालेला नाही. सोमवारी धनत्रयोदशीच्या मुहूर्तावर नाशिककरांनी शहरातील सराफी पेढ्या आणि सुवर्ण शोरुम्समध्ये खरेदीला पसंती दिली. सोन्याचे दरही कमी झाल्याने ग्राहकांमध्ये उत्साह होता. सराफी पेढ्यांनीही दिवाळीच्या निमित्ताने लकी ड्रॉचे आकर्षण ग्राहकांमध्ये ठेवल्याने सुवर्णालकांरांना मागणी वाढली होती.
होम अप्लायन्सेस, स्मार्ट फोन्स, लॅपटॉप या डिजीटल वस्तू आणि उपकरणांना मोठी मागणी असल्याचे दिसून आले. त्यामुळेच एमजी रोड, मेनरोड, कॅनडा कॉर्नर, कॉलेज रोड येथील बाजारपेठांमध्ये मोठी गर्दी होती. दिवाळीनिमित्ताने देण्यात आलेल्या खास ऑफर्स आणि सोयी-सवलतींचा ग्राहकांनी लाभ घेतला. शहरातील मॉल्समध्येही ग्राहकांचा मोठा प्रतिसाद लाभल्याचे निदर्शनास आले. डिजिटल वस्तू, उपकरणे आणि होम अप्लायन्सेस यांच्या खरेदी-विक्रीची किमान १०० कोटी रुपयांची उलाढाल शहरात झाल्याचे व्यावसायिकांचे म्हणणे आहे.
दिवाळीच्या शुभमुहूर्तावर शहरातील रिअल इस्टेट क्षेत्रालाही बूस्ट मिळाली आहे. शहर परिसरात सुरु असलेल्या अनेकविध गृह प्रकल्पांना भेटी देण्यासाठी आणि सॅम्पल फ्लॅट पाहण्यासाठीही ग्राहकांनी गर्दी केली होती. काही व्यावसायिकांनी ग्राहकांसाठी खास बसेसचीही व्यवस्था केली होती. दसऱ्याच्या तुलनेत यंदा फ्लॅट बुकिंगचा उत्साह चांगला आहे. किमान १०० फ्लॅटचे बुकिंग दिवाळीच्या प्रारंभीच झाले समजते.
सोन्याच्या मागणीत वाढ
सोन्याचे उतरत असलेले भाव व धनत्रयोदशीचा मुहूर्त असा दोन्हींचा मेळ साधत नाशिककर नागरिकांनी सोमवारी मोठ्या प्रमाणात सोनेखरेदीचा आनंद लुटला. काही दिवसांपासून सोन्याच्या दरात सातत्याने घसरण सुरू आहे. या घसरणीचा फायदा घेत सराफ बाजार व इतर ठिकाणच्या दुकांनांमध्ये ग्राहकांची गर्दी झाल्याने व्यावसायिकांमध्ये चैतन्याचे वातावरण होते.
भाव कमी असल्याने मागणी जास्त होती त्याच प्रमाणात पुरवठा झाल्याने सोमवारी कोट्यवधीची सोने आणि चांदीची खरेदी झाल्याचा अंदाज व्यापाऱ्यांनी व्यक्त केला आहे. दोन महिन्यापासून सोन्याच्या भावात घसरण सुरू झाल्याने सोमवारच्या दिवशी अनेक ग्राहकांनी सराफ बाजारातील पेढ्यावर भाव आणखी उतरणार का, याची विचारपूस केली. मात्र, सोमवारी बाजार उघडल्यानंतर भाव २६ हजार ५०० वर स्थिरावला. नाशिकमध्ये अनेकांनी लग्नसराईसाठी दागिन्यांची खरेदी केली तर अनेकांनी गुंतवणूक म्हणून खरेदी केली.
धनत्रयोदशीनिमित्त कुबेर, धन्वंतरीचे पूजन
दिवाळीचा तिसरा दिवस अर्थात अश्विन कृष्ण त्रयोदशीला धनत्रयोदशी व धन्वंतरी पूजन साजरी करण्यात आले. रांगोळी, फुलांची तोरणे, विद्युत रोषणाई अशा प्रसन्न वातावरणात घरा-घरांमध्ये व दवाख्यानांमध्ये सण साजरा करण्यात आले. तसेच धनाची म्हणजेच लक्ष्मी व कुबेराची व तसेच हॉस्पिटलमध्ये धन्वंतरी देवतेचे पूजन करण्यात आले.
सोन्या-चांदीची नाणी, कुबेर, धन-धान्य यांची पूजेचे महत्त्व या दिवशी असल्याने सायंकाळी पूजा करण्यात आली. धने व गुळ यांचा नैवेद्य दाखवित लक्ष्मीची, कुबेराची विधीवत पूजा करून दीपदान करण्यात आले. घरात सुख नांदण्यासाठी व अपमृत्यू टाळण्यासाठी म्हणून घराबाहेर दिवा लावून त्याचे टोक दक्षिण दिशेस करून ठेवण्याची प्रथा आहे. ही प्रथा प्रामुख्याने पाळली गेल्याचे चित्र दिसून आले. तसेच यादिवशी सोन्याची खरेदी केल्यास त्यात भर पडते, असेही म्हटले जात असल्याने सोनेखरेदीलाही प्राधान्य देण्यात आले.
व्यापाऱ्यांनी सायंकाळी वर्षभर वापरात येणारी चलने, चोपडी, सोने-चांदीच्या नाण्यांचे पूजन केले. यादिवशी धन्वंतरी जयंती असल्याने दवाखान्यांमध्ये धन्वंतरी पूजन, पुण्यवाचन, गणेशपूजन यांना विशेष महत्त्व देण्यात आले. धन्वंतरी हे आयुर्वेदाचे जनक असल्याने तसेच दीर्घायुष्य आणि आरोग्य लाभण्यासाठी वैद्यांमार्फत धन्वंतरीची पूजा करण्यात आली. आयुर्वेदिक औषधे तयार करण्यासाठी आवश्यक असलेल्या खलाची पूजाही यावेळी करण्यात आली. पूजनानंतर साळीच्या लाह्या, बत्तासे, धने, गूळ असा प्रसाद वाटण्यात आला. अनेक ठिकाणी आयुर्वेदाचे महत्त्व अधोरेखित करणारे व्याख्यानेही पार पडले.
मागील २४ वर्षांपासून शास्त्रोक्त पद्धतीने धनत्रयोदशी व धन्वंतरी पूजन आम्ही साजरे करतो. यज्ञ, देवतांचे पूजन, प्रसादाचे वाटप अशा अनेक गोष्टींनी हा दिवस साजरा केला. - वैद्य विक्रांत जाधव
मोबाइल अॅप डाउनलोड करा आणि राहा अपडेट