नाशिक : चेन स्नॅचिंगचे गुन्हे उघडकीस येण्याचे प्रमाण तुलनेत फारच कमी आहे. चालू आणि गत वर्षातील पहिल्या आठ महिन्यात स्नॅचिंगच्या तब्बल १४० घटना घडल्या. यातील अवघ्या ४६ गुन्ह्यांतील आरोपींपर्यंत पोलिस पोहोचू शकले. गुन्हे उघडकीस येण्याचे प्रमाण कमी असल्याने गुन्हेगारांचे मनोधैर्य वाढल्याचे चित्र निर्माण झाले आहे.
यावर्षी पहिल्या आठ महिन्यात चोरट्यांनी उपनगर, इंदिरानगर आणि नाशिकरोड, पंचवटी पोलिस स्टेशन हद्दीत उच्छाद मांडला. विविध हायवेशी असलेली इतर रस्त्यांची संलग्नता आणि पोलिसांचे दुर्लक्ष यामुळे स्नॅचर्स घटनेनंतर काही मिनिटातच बेपत्ता होतात. अचानक होत असलेल्या स्नॅचर्सच्या हल्ल्यांमुळे सर्वसामान्यांच्या मनात दहशतीचे वातावरण निर्माण झाले. बहुतांश स्नॅचर्स काळ्या रंगाच्या पल्सरवर येऊन पायी जाणाऱ्या महिलेच्या गळ्यातील चेन ओरबडून नेतात. गुन्ह्यात वापरलेली दुचाकी सुध्दा चोरीची असते. त्यामुळे गुन्हेगारांपर्यंत पोहचताना पोलिसांच्या नाकीनव येते. त्यातच गुन्हा उघडकीस येण्याचे प्रमाण खूपच कमी आहे. या सर्व नकारात्मक परिस्थितीमुळे वयस्कर महिलांनी दागिने घालून घराबाहेर पडताना विशेष सावधगिरी बाळगणे अपेक्षित आहे.
याबाबत बोलताना परिमंडळ दोनचे पोलिस उपायुक्त श्रीकांत धिवरे यांनी सांगितले की, स्नॅचर्सला रोखण्यासाठी पोलिस आपल्यापरीने उपाययोजना राबवत असतात. काही महिन्यांपूर्वी स्नॅचिंगच्या घटनांचा वेग काहीसा वाढला होता. त्यामुळे आम्ही थेट नागरिकांशी संवाद साधण्यास सुरुवात केली. आज आमचे पोलिस अधिकारी व कर्मचारी विविध कॉलनी परिसरांना भेट देऊन चेन स्नॅचिंगसह घरफोडी व इतर गुन्हे कसे रोखता येतील, याचे मार्गदर्शन देत आहेत. यास नागरिकांचा चांगला प्रतिसाद मिळाला असून हळूहळू परिमंडळ दोनमधील नाशिकरोड, उपनगर, इंदिरानगर या पोलिस स्टेशन हद्दीतील गुन्हे कमी झाले आहेत. साधारणतः स्नॅचर्स आपले सावज शोधताना होणाऱ्या प्रतिकाराचा विचार करतो. त्यामुळेच गुन्हेगार वयस्कर व्यक्तींना टार्गेट करतात. तोतया पोलिस प्रकरणात सुध्दा वयस्करांनाच लक्ष केले जाते. चेन स्नॅचिंगच्या गुन्ह्यात स्थानिकांसह परजिल्ह्यातील गुन्हेगारांचा सहभाग असल्याचे अनेकदा स्पष्ट झाले आहे. तपासाच्या दृष्टीने हाच कळीचा मुद्दा ठरतो. झालेल्या गुन्ह्याचा तपास करण्यापेक्षा गुन्हा होऊ नये, यासाठी आम्ही प्रयत्नशील असल्याचे धिवरे यांनी सांगितले.
मोबाइल अॅप डाउनलोड करा आणि राहा अपडेट