मोबाइल अॅप डाउनलोड करा आणि राहा अपडेट
म. टा. प्रतिनिधी, नाशिक जिल्ह्यातील सहा नगरपंचायतींच्या नगराध्यक्ष आणि उपाध्यक्षपदाच्या निवडणुकीचा कार्यक्रम जिल्हाधिकाऱ्यांनी जाहीर केला आहे. त्यानुसार येत्या २४ नोव्हेंबरला अर्ज दाखल करण्याची मुदत असून ३० नोव्हेंबरला अध्यक्षपदाची निवड करण्यात येणार आहे. नाशिक जिल्ह्यातील सुरगाणा, निफाड, कळवण, पेठ, चांदवड आणि देवळा या सहा गावांमध्ये प्रथमच नगरपंचायतींची स्थापना होऊन सार्वत्रिक निवडणुका गेल्या महिन्यात पार पडल्या आहेत. दिवाळीचा उत्सव सरल्यानंतर आणि जिल्हाधिकारी दीपेंद्रसिंह कुशवाह रजेववरुन कामावर आता रुजू झाल्याने नगरपंचायतींच्या अध्यक्ष आणि उपाध्यक्षांच्या निवडणुकीचा कार्यक्रम जाहीर करण्यात आला. अध्यक्षपदासाठीचे अर्ज २४ नोव्हेंबरला सकाळी १० ते दुपारी २ या वेळेत दाखल केले जातील. त्याच दिवशी दुपारी २ वाजता या अर्जांची छाननी केली जाणार आहे. अवैध अर्जांची यादी २४ नोव्हेंबरला सायंकाळी ५ वाजता जाहीर हाोईल. वैध अर्जांची यादी २७ नोव्हेंबरला सायंकाळी ५ वाजेनंतर प्रसिद्ध केली जाईल. माघार घेण्याची मुदत २७ नोव्हेंबर रोजी सायंकाळी ५ वाजेनंतर राहील. त्यानंतर ३० नोव्हेंबरला दुपारी २ वाजता होणाऱ्या विशेष सभेत अध्यक्षपदाची निवड केली जाईल. उपाध्यक्षपदासाठी ३० नोव्हेंबर रोजीच्या सभेतच उपाध्यक्षपदाचा अर्ज स्विकारुन त्याची छाननी केली जाईल. तसेच वैध व अवैध नावेही जाहीर केली जातील. त्याचवेळी माघारी आणि निवड केली जाईल, असे जिल्हा प्रशासनाने जाहीर केले. निफाडला राजकारण तापले निफाड नगरपंचायतीच्या अध्यक्षपदासाठी राजकारणाने वेग घेतला आहे. अध्यक्ष व उपाध्यक्षपदाची निवडणूक जाहीर होण्यापूर्वीच शिवसेनेच्या तीन नगरसेवकांचा वेगळा गट तयार करण्यात भाजपचे पदाधिकारी आणि निफाडचे माजी सरपंच राजाभाऊ शेलार यांना यश आले आहे. तर, निफाडचे विद्ममान शिवसेना आमदार अनिल कदम यांना शह देण्यासाठीच शेलार यांनी व्युहरचना केल्याचे बोलले जात आहे. तर, गुरुवारीच मुकुंदा होळकर, सुनिता कुंदे आणि अपक्ष नगरसेवक किरण कापसे यांनी स्वतंत्र गट स्थापन केला आहे. हा गट आमदार कदम यांच्याशी संलग्न नसला तरी तो शेलार यांच्या विरोधी आहे.
