म. टा. प्रतिनिधी, नाशिक जिल्ह्यातील पाण्याचे वाटप करताना जिल्ह्यातील शेतकऱ्यांवर अन्याय होऊ नये म्हणून विविध राजकीय पक्षाच्या बॅनरखाली शेकडो शेतकरी र‌विवार जिल्हाधिकारी कार्यालयात आणि बाहेर जमा झाले. यात, काँग्रेस-राष्ट्रवादी, शेतकरी संघटना, शिवसेना असे गट एकाच कामासाठी वेगवेगळ्या मार्गाने लढताना दिसून आले. जायकवाडीला पाणी सोडण्यात आल्यापासून नाशिक विभागातील शेतकऱ्यांमध्ये खदखद निर्माण झाली आहे. सत्ताधारी शिवसेना, शेतकरी संघटना, काँग्रेस -राष्ट्रवादी आपआपल्या पध्दतीने सरकारचा निषेध नोंदवण्याचे काम करीत आहेत. पालकमंत्र्याच्या उपस्थितीत त्यास चांगलीच धार लागली. जिल्हाधिकारी कार्यालयाच्या मुख्य गेटवर काँग्रेस राष्ट्रवादीच्या कार्यकर्त्यांनी ठिय्या दिला. आमदार अनिल कदम, अजय बोरस्ते यांच्या मार्गदर्शनाखाली शिवसैनिक तसेच शेतकरी संघटनेचे सदस्य जिल्हाधिकारी कार्यालयात हजर होते. या दरम्यान, काँग्रेस राष्ट्रवादीच्या पदाधिकाऱ्यांनी पालकमंत्र्यांच्या निषेधाच्या घोषणा दिल्या. यावेळी पालकमंत्र्यांना काळे झेंडे दाखविण्यात आले. दुपारी, दीड वाजण्याच्या सुमारास आमदार कदम काही शिवसैनिकांसमवेत येथे पोहचले. काँग्रेस-राष्ट्रवादीचे कार्यकर्ते रस्ता रोको आंदोलन करीत असताना कदम दोन मिन‌िटातच तेथून निघून गेले. दुपारी दोन वाजण्याच्या सुमारास जिल्हाधिकारी कार्यालयावर पोहचला. यावेळी राष्ट्रवादीच्या कार्यकर्त्यांनी त्यांच्या वाहनाखाली झोपण्याचा प्रयत्न केला. पोलिसांनी बळाचा वापर करीत त्यांना तेथून हटवले. मात्र, जिल्हाधिकारी कार्यालयात पालकमंत्री गिरीश महाजन पोहचताच शेतकरी संघटना व शिवसेना आक्रमक झाली. त्यांनी थेट शेतकऱ्यांशी चर्चा करण्याची मागणी त्यांनी केली. यामुळे जिल्हाधिकारी कार्यालयात काही काळ तणाव निर्माण झाला होता. आमदार कदम यांनी समजूत घातल्याने हा तणाव निवाळला. या आंदोलनात, आमदार कदम यांच्यासह अजय बोरस्ते, आमदार नरहरी झिरवाळ, शिवाजी सहाणे, शोभा बच्छाव, माजी आमदार दिलीप बनकर, वत्सला खैरे, कविता कर्डक, सत्यभामा गाडेकर, नाना महाले, रविंद्र पगार, रंजना पवार, रविंद्र देवरे, शरद आहेर, छबु नागरे, सचिन मराठे यांच्यासह निफाड, सिन्नर, येवला, चांदवड आणि जिल्ह्यातील इतर भागातील शेकडो शेतकरी उपस्थित होते. रात्री उशिरापर्यंत शेतकरी जिल्हाधिकारी कार्यालयात ठिय्या मांडून बसल्याने पोलिस बंदोबस्त कायम ठेवण्यात आला.
मोबाइल अॅप डाउनलोड करा आणि राहा अपडेट
