पाणी आंदोलनावरून गेल्या अनेक दिवसांपासून भाजपला कोंडीत पकडणाऱ्या शिवसेनेवर वचपा काढण्याची संधी पालकमंत्री गिरीश महाजन जिल्हा नियोजन समितीच्या बैठकीत घेतली. जिल्ह्यात वाघ व बिबट्यांचा बंदोबस्त करा अशी मागणी करणाऱ्या आमदारांना उत्तर देण्याऐवजी महाजन यांनी दादा भुसे यांच्याकडे पाहत 'दादा तुमच्या वाघांना आवरा किंवा त्यांचा कायमचा बंदोबस्त करा' असा टोमना मारला. त्यांच्या उपरोधीक टोल्याने सेनेचे पदाधिकारी व नेतेही गायब झाले.
राज्यपातळीप्रमाणेच जिल्ह्यातही गेल्या अनेक दिवसांपासून सेना भाजपचे संबंध तणावाचे बनले आहेत. पाणी प्रश्नावर तर सेनेचे आमदार अनिल कदम यांनी भाजपच्या आमदारांच्या घरावर आंदोलने केली. भाजपविरोधी आंदोलनाचे नेतृत्व सेनेच्याच नेत्यांनी केले. त्यामुळे पालकमंत्र्यांच्या मनात याबद्दल सलगी होती. हा वचपा काढण्याची संधी पालकमंत्र्यांनी डीपीडीसीच्या बैठकीत साधली. 'जिल्ह्यातील वाघ व बिबटे शेतकऱ्यांना त्रास देत असल्याने त्यांचा बंदोबस्त करा' अशी मागणी आमदार नरहरी झिरवाळ यांच्यासह सदस्यांनी दिली.
त्यावर महाजन यांनी सहकार राज्यमंत्री दादा भुसे यांच्याकडे बघून 'दादा या वाघांना आवरा जरा असा टोमना मारला. शक्य झाल्यास कायमचा बंदोबस्त करा' अशी विनंती त्यांनी सेनेच्या आमदारांकडे बघून भुसे यांना केली. त्यांच्या या उपहासात्मक टोल्याने सभागृहातील काही नेत्यांना गुदगुल्या झाल्या. तर सेनेच्या पदाधिकारी गडबडले.
पालकमंत्र्यांना अपशकून
तब्बल दीड महिन्यानंतर नाशिकमध्ये येणाऱ्या पालकमंत्र्यांना नाशिकमध्ये येताच शनिवारी अपशकून झाला. घोटीकडून त्र्यंबकेश्वरकडे जाताना त्यांच्या वाहन पंक्चर झाले. त्यामुळे त्यांना दुसऱ्या वाहनातून त्र्यंबकेश्वर व्हाया नाशिकमध्ये यावे लागले. नाशिकमध्ये पालकमंत्र्यांच्या विरोधात तीव्र आंदोलन उभे राहिले होते. जनतेच्या रोषाला सामोरे जावे लागणार होते. त्यामुळे गाडी जाऊ देऊ नका असा अपशकून त्यांना रस्त्यात झाला होता.
मोबाइल अॅप डाउनलोड करा आणि राहा अपडेट