नदीतील पाण्यावर तरंगणारे निर्माल्य, प्लास्टिक पिशव्या व इतर कचरा साफ करण्यासाठी महापालिका तीन महिन्यांच्या कालावधीसाठी फ्लोटिंग ट्रॅश स्किमर मशिन भाडेतत्त्वावर घेणार आहे. यासाठी दिवसाला एक लाख १० हजार रुपये प्रतिदिन याप्रमाणे ठेकेदाराला ९९ लाख रूपये भाडे देण्यात येणार आहे. सिंहस्थात हे काम अगदी किरकोळ खर्चात करण्यात आले होते. त्यामुळे या प्रस्तावाबाबत स्थायी समिती काय निर्णय घेते याकडे सर्वांचे लक्ष लागले आहे.
गोदावरी नदीच्या धार्मिक महत्त्वामुळे लाखो भाविक दरवर्षी याठिकाणी स्नान व धार्मिक विधीसाठी येतात. यातून नदीपात्रात निर्माल्यासह इतर प्रदूषण मोठ्या प्रमाणावर होते. हा कचरा साफ करण्यासाठी महापालिका प्रशासनाने फ्लोटिंग ट्रॅश स्किमर मशिन भाडेतत्त्वावर घेण्याचा निर्णय घेतला आहे. यासाठी ९ जून रोजी ई-निविदा सूचना प्रसिध्द करण्यात आली. मात्र, दोनच ठेकेदार पुढे आल्याने प्रशासनाने २४ जून रोजी पुन्हा हीच सूचना प्रसिध्द केली. त्यानुसार क्लिनटेक प्रा. लि. मुंबई, जे. एम. इन्व्हायरो प्रा. लि. मुंबई आणि अमिन प्रा. लि. अहमदाबाद या कंपन्यांनी ई-निविदा सादर केल्या. १६ जुलै रोजी कागदपत्रांची पडताळणी केली असता, अमिन एक्युपमेंट कंपनीच्या कागदपत्रांमध्ये पूर्तता आढळून आली नाही. उर्वरित दोन कंपन्यांपैकी क्लिनटेक प्रा. लि. कंपनीचे काम चांगले असल्याचा निष्कर्ष महापालिका अधिकाऱ्यांनी प्रत्यक्ष पाहणीनंतर काढला. तीन महिन्यांच्या करारासाठी तब्बल ९९ लाख रूपये यासाठी खर्ची पडणार असून, पैशांच्या उधळपट्टीनंतरही गोदा स्वच्छ होण्याची कोणतीही शक्यता दिसून येत नाही. सिंहस्थ कुंभमेळ्यादरम्यान महापालिका प्रशासनाने अगदी किरकोळ खर्चात नदी स्वच्छतेसाठी यंत्रणा उभारली होती. सिंहस्थ संपताच ही यंत्रणा दूर सारत आता खर्चिक मशिनरी तीही भाडेतत्त्वावर चालवण्याचा घाट घातला जातो आहे. प्रशासनाच्या या प्रस्तावावर स्थायी समिती काय निर्णय घेते याकडे महापालिका वर्तुळाचे लक्ष लागले आहे.
मोबाइल अॅप डाउनलोड करा आणि राहा अपडेट