शेती क्षेत्र नैसर्गिक संकटांनी त्रस्त असल्याने शेतकरी आत्महत्या करीत आहेत. शेती व्यवसाय करणाऱ्यांमध्ये नैराश्याचे वातावरण असल्याने त्यांना शासनाकडून मदत केली जाणार आहे. एक लाख हेक्टर क्षेत्रावर फळबागांमधून शासनाने फलोत्पादन वाढीसाठी १०० टक्के अनुदान देण्याचा निर्णय घेतल्याची माहिती राज्याचे कृषी व महसूलमंत्री एकनाथ खडसे यांनी दिली.
ह्यूमन सर्व्हिस फाऊंडेशन व मीडिया एक्झिबिटर्स यांच्या विद्यमाने आयोजित कृषीथॉन-२०१५ या प्रदर्शनाला कृषिमंत्री एकनाथ खडसे यांनी भेट दिली. त्यावेळी ते बोलत होते. ना. खडसे पुढे म्हणाले, की एकीकडे शेती व्यवसाय करणाऱ्या शेतकऱ्यांमध्ये नैराश्याचे वातावरण असताना दुसरीकडे युवा वर्ग कृषीतील उच्च शिक्षण घेण्यासाठी कल दर्शवित आहे. शेतीत नवनवीन संशोधन होत आहे. त्याचे प्रतिबिंब कृषीथॉनसारख्या प्रदर्शनातून व्यक्त होत आहे. त्यामुळे शेतकऱ्यांनी येथे येऊन त्याचा अभ्यास, तंत्र अवगत करून शेतीत उत्पन्न, नफावाढ करावी.
कृषीथॉनबाबत ना. खडसे म्हणाले की, आजच्या आणि उद्याच्या शेतीचे स्वरूप कसे असावे, भविष्यातील शेती कशी असू शकते, त्याला कोणते तंत्र पुरक आहे आणि शेतकरी आत्महत्या करणार नाही, यासाठी काय उपाययोजना आखता येऊ शकते याचे परिपूर्ण मार्गदर्शन कृषीथॉन या कृषी प्रदर्शनामुळे मिळते. कारण या प्रदर्शनात शेतकऱ्यांना प्रोत्साहन देऊन त्यांच्यातील नैराश्य कमी करणारे सर्व उपक्रम, चर्चासत्रे, तंत्रज्ञानाची माहिती शेतीतील नवनवीन प्रयोग आणि युवा, महिला शेतकऱ्यांकडून केले जात असलेले नवीन प्रयोग यांची माहिती या प्रदर्शनातून अवगत होत असल्याचे त्यांनी सांगितले.
दरम्यान, महसूल मंत्री एकनाथ खडसे यांच्या हस्ते कृषी विद्यापीठातील गुणवंत विद्यार्थ्यांचा सत्कार करण्यात आला. त्याचप्रमाणे अॅग्रो डिलर्स असोसिएशन (नाडा) च्या बोधचिन्हाचे अनावरण करण्यात आले. तसेच, राज्यातील प्रयोगशील युवा शेतकरी, गुणवंत कृषी विद्यार्थी सूची असलेल्या फेअर कॅटलॉग या पुस्तिकेचे प्रकाशन करण्यात आले. यावेळी प्रास्तविकात आयोजक संजय न्याहारकर यांनी कृषीथॉन-२०१५ या प्रदर्शनाची रुपरेषा स्पष्ट केली. साहिल न्याहारकर यांनी आभार मानले.
या सोहळ्यात आमदार बाळासाहेब सानप, आमदार देवयानी फरांदे, आमदार सिमा हिरे, गटनेते संभाजी मोरूस्कर, भाजपा शहराध्यक्ष लक्ष्मण सावजी, नाडाचे अध्यक्ष विजय पाटील, कृषीथॉन प्रदर्शनाचे आयोजक संजय न्याहारकर, साहिल न्याहारकर, अश्विनी न्याहारकर आदी मान्यवर उपस्थित होते.
मोबाइल अॅप डाउनलोड करा आणि राहा अपडेट
