खान्देशवासीयांसह नाशिककरांना प्रतिक्षा असलेली नाशिक-भुसावळ लोकलचा केवळ फार्सच ठरणार असल्याचे दिसत आहे. लोकल आज सुरु होणार, उद्या सुरु होणार अशा केवळ वावड्याच उठवल्या जात असल्याने प्रवाशांमध्ये तीव्र नाराजी व्यक्त होत आहे.
नाशिक-भुसावळ दरम्यान दररोज हजारो प्रवासी प्रवास करतात. त्यामध्ये नाशिक आणि खान्देश पट्ट्यातील नागरिकांचा समावेश लक्षणीय आहे. नाशिकमध्ये सातपूर, नाशिकरोड, सिडको भागात खान्देशचे बांधव मोठ्या संख्येने स्थायिक झालेले आहेत. काम आणि नातेसंबंधानिमित्ताने त्यांचे जळगाव-धुळे जिल्ह्यात नियिमित जाणे-येणे असते.
लोकलची तीव्र गरज
भुसावळला जाण्यासाठी सध्या पहाटे पाच वाजता पॅसेंजेर आहे. काशी एक्स्प्रेससह लांब पल्ल्याच्या अनेक गाड्या आहेत. परंतु, त्यांना नेहमी गर्दी असते. काही गाड्या फक्त भुसावळला थांबतात. जळगाव, चाळीसगाव, पाचोरासह अन्य स्टेशनवर उतरणाऱ्या प्रवाशांची पंचाईत होते. भुसावळ पॅसेंजेर तर नाशिकरोड स्टेशनवरच फुल्ल होते. पुणे-लोणावळ लोकल सेवेच्या धर्तीवर नाशिक-भुसावळ लोकल सुरू केल्यास तिला चांगला प्रतिसाद मिळण्याची शक्यता आहे.
जन्माआधीच हत्या
भुसावळ लोकल सुरू होणार, असे रेल्वेच्या अधिकाऱ्यांनी यापूर्वी अनेकदा स्पष्ट केले होते. लोकलचे टाईमटेबलही अनेकांच्या व्हॉटसअॅपवर आले. काही वृत्तपत्रांमधून लोकल सुरू होणार असल्याचे वृत्तही प्रसिद्ध झाले. परंतु, तीन महिने झाले तरी अद्याप काहीच हालचाल दिसत नाही. रेल्वेचे नाशिकरोडचे अधिकारी, कर्मचारी छाती ठोकपणे सांगायला तयार नाही. आता तर ही लोकल रद्द झाल्याचेच वृत्त येत आहे.
पाचोरा, चाळीसगाव, जळगावसह महत्त्वाच्या सर्व स्टेशनवर लांब पल्ल्याच्या रेल्वेगाड्या थांबत नाहीत. त्यामुळे प्रवाशांचे हाल होतात. तेव्हा प्रवाशांच्या सोयीसाठी नाशिक-भुसावळ लोकल त्वरित सुरू करावी. नोकरदारांसह विद्यार्थ्यांनाही या लोकलचाही फायदा होऊ शकेल.
- आबासाहेब धामणे
निश्चित सांगता येत नाही हो!
नाशिकरोड रेल्वे स्टेशन व्यवस्थापक एम. बी. सक्सेना यांच्याशी 'मटा'ने संपर्क साधला असता त्यांनी अशी गाडी सुरू होणार असल्याचा सध्यातरी प्रस्ताव नसल्याचे स्पष्ट केले. ते म्हणाले की, व्हॉटसअॅपवरील टाईमटेबल विश्वासहार्य नसते. ही गाडी कधी सुरू होईल ते सांगता येत नाही.
मोबाइल अॅप डाउनलोड करा आणि राहा अपडेट
