मालेगाव महानगरपालिकेच्या आज (१७ डिसेंबर) होणाऱ्या महासभेत स्वच्छता, भ्रष्ट कारभाराचा मुद्दा आणि पाणीप्रश्न गाजण्याची शक्यता आहे. तसेच गैरव्यवहाराविरोधात उपोषण सुरू केल्याने याबाबतही जनता दल आक्रमक पवित्रा घेण्याची शक्यता आहे.
महापौर हाजी मोहम्मद इब्राहीम यांच्या अध्यक्षतेखाली महासभा होणार आहे. महासभेत विषयपत्रिकेवरील एकूण आठ विषयांवर चर्चा होणे अपेक्षित आहे. यात शहराचा पाणीप्रश्न, स्वच्छता आणि आरोग्य तसेच, भ्रष्ट कारभार हे विषय महासभेत असणार आहेत. गेल्या काही दिवसात मालेगाव शहराचा पिण्याचा पाणीप्रश्न गंभीर झाला आहे. शहरात सध्या दोन दिवसाआड पाणीपुरवठा केला जात आहे. भविष्यात पाणीकपातीचा देखील निर्णय घ्यावा लागू शकतो. मात्र, पाणीप्रश्न बिकट होत असताना शहरातील संगमेश्वर कलेक्टर पट्ट्यातील काही भागात दिवसातून चार वेळा पाणी येत असल्याचे निदर्शनास आले आहे. नगरसेवक सखाराम घोडके यांनी अशा बेजबाबदार ढिसाळ पाणी नियोजनावर आक्षेप घेतला आहे. प्रस्तावाच्या माध्यमातून पालिका सभागृहात चर्चेसाठी आणला आहे. शहरात दोन दिवसाआड पाणीपुरवठा असताना संगमेश्वर महात्मा ज्योतिबा फुले चौक ते मोतीबागपर्यंत कलेक्टर पट्ट्याच्या बाजूने जुना आग्रा रोडलगत संगमेश्वरसाठी मुख्य जलवाहिनी टाकण्यात आली आहे. मात्र, या मुख्य जलवाहिनीवर नळजोडण्या दिल्याने काही भागात चार ते पाच वेळा पाणीपुरवठा होत आहे. परिणामी कलेक्टरपट्टा संगमेश्वरच्या काही भागात कमी दाबाने पाणीपुरवठा होता. त्यामुळे मनपाच्या पाणीपुरवठ्याच्या या ढिसाळ नियोजनाबाबत थेट महासभेत चर्चेचा प्रस्ताव ठेवण्यात आला आहे. तसेच, नगरसेवक घोडके यांनीच शहरात एकात्मिक गृहनिर्माण व झोपडपट्टी विकास कार्यक्रम अंतर्गत घरकुल योजनेची कामे सुरू असून, अद्याप ती पूर्ण झालेली नाहीत. या कामांची गती अत्यंत संथ असल्याने त्यासंबंधी सभेत चर्चा करून चौकशी करण्याचा प्रस्ताव देखील ठेवला आहे. नगरोत्थान योजनेंतर्गत नगरसेवक मदन गायकवाड यांनी जिल्हा नियोजन समितीकडे केलेल्या मागणी वरून सदस्यांनी सुचविलेल्या कामांचा प्रस्ताव महासभेत सादर केला जाणार असून, त्यात मनपाने ५० टक्के हिस्सा देण्याबाबत विचारविनिमय करून निर्णय घेण्यासचा प्रस्ताव चर्चेत असणार आहे. दरम्यान, सत्ताधारी तिसरा महाजला याबाबत जनता दल व अन्य सहकारी पक्ष कोंडीत पकडण्याची शक्यता आहे. त्यामुळे या मुद्द्यावरून महासभेत खडाजंगी होण्याची चिन्हे आहेत.
महासभेपुढील विषय
नगरोत्थान योजनेंतर्गत कामांचा प्रस्ताव सादर करून निर्णय घेणे.
मनपा वाहन दुरुस्ती करणाऱ्या एजन्सीच्या खर्चासह मुदतवाढ मिळणे.
घरकुल योजना कामांची चौकशी करणे.
डी.पी प्लॅनमधील पूररेषा काढणे. याबाबत शासनाकडे मागणी करणे.
पाणीपुरवठ्याबाबत नियोजन करणे.
जिमखाना नामकरण व कमानी गेट तयार करणे.
मोबाइल अॅप डाउनलोड करा आणि राहा अपडेट