म. टा. वृत्तसेवा, सिन्नर
सिन्नर तालुक्यातील सोनेवाडी ग्रामपंचायत हद्दीत झालेल्या कामात १३ लाख रुपयांचा अपहार झाल्याची तक्रार सरपंच, उपसरपंच यांच्यासह अन्य कार्यकर्त्यांनी केली आहे. विद्यमान सदस्यांनी पदभार स्वीकारण्यापूर्वी झालेल्या भ्रष्टाचार प्रकरणाची चौकशी करण्याची मागणी केली आहे. सरपंच आशा रावळे, उपसरपंच मंदाकिनी देशमुख तसेच सुधीर रावळे यांनी या प्रकरणी पत्रकार परिषदेत ही माहिती उघड केली.
विद्यमान सदस्यांनी ११ जुलै २०१५ रोजी पदभार स्वीकारल्यानंतर ग्रामपंचायत कार्यालयात झालेल्या बैठकीत सदस्यांनी या पूर्वीचे व्यवहारांची माहितीसाठी चेकबुक, कॅशबुक व बँक पासबुकची मागणी ग्रामसेवक प्रदीप काशीद यांच्याकडे केली. मात्र, त्यांनी ही कागदपत्रे देण्यास टाळाटाळ केली. त्यानंतर माहितीच्या कायद्यांतर्गत माहिती मागितली असता मोठा अपहार झाल्याचे दिसून आल्याची माहिती सुधीर रावळे यांनी दिली. यामध्ये सार्वजनिक पाणीपुरवठा योजनेत १९ लाख रुपयांची अंदाजपत्रकीय किमत असताना केलेल्या कामांतर्गत आठ लाख ३२ हजार रुपये प्रत्यक्ष खर्च झाला. या कामात विहिरीपासून पाण्याच्या टाकीपर्यंत दोन कि. मी. अंतराची पाइपलाइन दाखवण्यात आली. मात्र, हे अंतर फक्त ५७० मीटर असून, खोटे अंदाजपत्रक दाखवून मोठा अपहार झाला असल्याचा आरोप रावळे यांनी केला आहे. या पाइपलाइन दुरुस्तीसाठी एक लाख ३५ हजार खर्च ही दाखवण्यात आला. मात्र, येथे कोणतेही दुरुस्तीचे काम झाले नाही. अंगणवाडी बांधकामात ६ लाख ३२ हजार खर्च झाला असून, आणखी १ लाख ८२ हजार रुपये येणे बाकी दाखविले आहेत. प्रत्यक्षात खिडक्या, स्वच्छतागृह, सिंक, पाण्याची व्यवस्था, इलेट्रिक फिटिंगचे कामे अजून अपूर्ण आहे.
सोनेवाडी गाव १०० टक्के हगणदारी मुक्त दाखवले असताना ११३ लोकांनी अद्याप शौचालय बांधलेले नाही. सन २०१३-१४ मध्ये पर्यावरण व ग्रामसमृद्धी योजनेंतर्गत रेडिमेड स्वच्छतागृह, कचराकुंड्या, खरेदीसाठी ९१ हजारांचा खर्च दाखवण्यात आला. प्रत्यक्षात गावात पाच कचरा कुंड्या वगळता एकही रेडीमेड स्वच्छतागृह नाही. पाधी रस्त्यावर मुरूम टाकण्यासाठी ४९ हजार रुपयांचा खर्च दाखवण्यात आला असून, या रस्त्यावर एकही पाटी मुरूम टाकला नाही. घन कचरा व्यवस्थापन, प्रचार व प्रसार करण्यासाठी एक लाख चार हजार रुपये खर्च दाखवण्यात आला असून, कुठलेही काम झालेले नाही. तसेच संगणक खरेदीसाठी वेळोवेळी ७९ हजार रुपयांचे चेक दिलेले असताना संगणक दिसत नाहीत. सहाणे आळीसाठी रस्त्याचे काँक्रिटीकरणास एक लाख खर्च तसेच, दुसऱ्या वर्षी पुन्हा रस्ता दुरुस्तीसाठी पन्नास हजार रुपये खर्च दाखवण्यात आला.
सौर दिवे ८० हजार, संगणकीय दुरुस्ती १५ हजार, संगणकीय खर्च ५ हजार, पुन्हा रस्ते दुरुस्ती ९२ हजार असा चार लाख ८१ हजार रुपयांचा अपहार झाला असल्याचा आरोप रावळे यांनी केला आहे. तसेच सेल्फ चेकच्या नावे १ लाख ४० हजार, रोपवाटिका १ लाख ८१ हजार असे खर्च दाखवण्यात आले आहेत. प्रत्यक्षात कुठलेही कामे झालेली नाही. या प्रकरणी जिल्हाधिकारी, जिल्हा परिषद, पंचायत समितीकडे तक्रार केली असून, या प्रकरणी सखोल चौकशी करण्याची मागणी सरपंच आशा रावळे, उपसरपंच मंदाकिनी देशमुख तसेच सुधीर रावळे यांनी केली आहे. यामुळे कामे झाली आहेत की नाहीत, याची चौकशी झाल्यास संबंधित अडचणीत येणार आहेत.
मोबाइल अॅप डाउनलोड करा आणि राहा अपडेट