भारतनगर झोपडपट्टी येथे जागेच्या वादातून झालेल्या दंगलीच्या घटनेनंतर पोलिसांनी सोमवारी रात्री राबवलेल्या कोम्बिंग ऑपरेशन दरम्यान सहा संशयितांना अटक केली. पोलिसांनी त्यांच्याकडून धारदार शस्त्रे जप्त केली.
अलीम करीम शेख, मोसीन अलियार पठाण, शेख बशीर पिरजाद यांना धारदार शस्त्रासह पोलिसांनी अटक केली. अलीम शेख व त्याचे दोन साथिदार हातात लोखंडी कोयता घेऊन दमबाजी करीत होता. याचवेळी आलेल्या पोलिस कर्मचाऱ्यांनी त्यांना ताब्यात घेतले. यानंतर, पोलिसांनी सर्फराज हसीन शेख, मुझ्झफर कादीर शेख, अर्शद मुक्तार मंसुरी यांनाही शस्त्रासह अटक केली. भारतनगरमध्ये अजूनही शांतता प्रस्थापित झाली नसल्याचे या घटनेवरून स्पष्ट होते. दरम्यान, जागेच्या वादातून दाखल झालेल्या दंगलीनंतर पोलिसांनी संशयित आरोपी नगरसेवक संजय साबळेसह इतरांची शोध मोहीम हाती घेतली असून, साबळे यांच्या संपर्क कार्यालयाची झडती घेण्यात आली. हे काम इतर ठिकाणी सुरू असून, लवकरच संशयितांना अटक करण्यात येईल, असा विश्वास पोलिस अधिकाऱ्यांनी व्यक्त केला.
कोम्बिंगमध्ये ६६ गुन्हेगारांवर कारवाई
नाशिक : शहर पोलिसांनी सोमवारी रात्री कोम्बिंग ऑपरेशन राबवत ६६ गुन्हेगारांवर प्रतिबंधात्मक कारवाई केली. पोलिस उपायुक्त एन. अंबिका आणि श्रीकांत धिवरे यांच्या मार्गदर्शनाखाली शहरात रात्री साडेनऊ ते ११ वाजेच्या दरम्यान ही कारवाई करण्यात आली. ठिकठिकाणी नाकाबंदी करीत पोलिसांनी सर्व झोपडपट्टींची पाहणी केली. याशिवाय हॉटेल तसेच लॉजची पाहणी करीत संशयित गुन्हेगारांचा शोध घेण्यात आला. यावेळी पोलिसांनी रेकॉर्डवरील गुन्हेगारांचा शोध घेतला. त्यात एकूण १३५ पैकी ६६ गुन्हेगार पोलिसांना सापडले. प्रबुद्ध नगर झोपडपट्टी, संतोषी माता नगर झोपडपट्टी, श्रमिक नगर, विश्वास नगर या झोपडपट्ट्यांमध्ये ३० गुन्हेगार तपासून १३ जणांवर प्रतिबंधकात्मक कारवाई करण्यात आली. तर, दोन जणांना जामीनपात्र आणि एकाविरोधात अजामीनपात्र वॉरंट बजावण्यात आले. लेखानगर, शांतीनगर, रमाबाई आंबेडकर झोपडपट्टी परिसरातून पाच जणांना ताब्यात घेतले होते.
वडाळा गाव, भगसिंग नगरमधून सात गुन्हेगारांना ताब्यात घेत पोलिसांनी तीन वाहनचालकांवर कारवाई केली. समता नगर, पंचशीलनगर, आम्रपाली झोपडपट्टी, फर्नांडिसवाडी, रोकडोबावाडी इत्यादी ठिकाणाहून चौघांना ताब्यात घेण्यात आले. तर, १७ जणांवर प्रतिबंधात्मक कारवाई करण्यात आली. कोम्बिंग ऑपरेशन दरम्यान नाकाबंदी करून ३५३ वाहने तपासण्यात आली. त्यातील ४१ वाहनांवर दंडात्मक कारवाई झाल्याची माहिती पोलिसांनी दिली.
दोघांचा मृत्यू
पंचवटीत वेगवेगळ्या ठिकाणी झालेल्या अपघातात दोघा जणांचा मृत्यू झाला. रविवारी सायंकाळी साडेसात वाजेच्या सुमारास मुंबई-आग्रा रोडवरील उड्डाणपुलावर दुचाकी स्लीप झाल्याने महेश दयाराम तिवारी (वय ४४) यांचा मृत्यू झाला. ओझरमिग येथील तांबटलेन परिसरातील गोकुळ कॉम्प्लेक्स तिवारी व्यंकटराव हिरे कॉलेजसमोरील उड्डाणपुलावरून दुचाकीने जात असताना त्यांची दुचाकी स्लीप झाली. अन्य एका घटनेत वाहनाच्या चाकात हवा भरताना वाहनसमोर उभे असलेल्या भगाभाई गणपतभाई चक्काभाई परमार यांच्या अंगावरून वाहन गेल्याने त्यांचा मृत्यू झाला. गुजराथ राज्यातील खेडा जिल्ह्यातील कळवण येथे राहणारे परमार रासबिहारी चौकात सोमवारी दुपारी दीड वाजेच्या सुमारास जीजे 0७ व्हीडब्ल्यू २९७९ क्रमांकाच्या वाहनात हवा भरत असताना वाहन पुढे सरकले. परमार नेमके चाकाखाली सापडल्याने मृत्युमुखी पडले. या दोन्ही घटनांबाबत पंचवटी पोलिस स्टेशनमध्ये नोंद करण्यात आली.
मोबाइल अॅप डाउनलोड करा आणि राहा अपडेट