म. टा. खास प्रतिनिधी, नाशिक
नाशिकच्या रंगकर्मींनी ५५ व्या महाराष्ट्र राज्य अंतिम हौशी मराठी नाट्यस्पर्धेत तीन पारितोषिके पटकावली. ही तिन्ही पारितोषिके लोकहितवादी मंडळाच्या 'या ही वळणावर' या नाटकातील सहभागी कलावंतांना मिळाली. माणिक कानडे यांना रंगभूषेसाठी तृतीय, उत्कृष्ट अभिनयासाठी मिलिंद भणगे यांना तर अभिनयासाठी गुणवत्ता प्रमाणपत्रांमध्ये रसिका पुंड यांचा समावेश आहे.
दिग्दर्शनाचे प्रथम पारितोषिक सुनील हरिश्चंद्र (असूरवेद), द्वितीय दयानंद नाईक (वृंदावन) तर दिग्दर्शनाचे तृतीय क्रमांकाचे पारितोषिक हेमंत कुलकर्णी (नाना भोळे १२ शनिपेठ, जळगाव) यांना जाहीर झाले. नेपथ्य प्रथम वैभव देशमुख, द्वितीय सचिन कदम, तृतीय प्रदीप पाटील यांना पारितोषिक जाहीर झाले आहे. प्रकाशयोजना प्रथम राजेश पंडीत, द्वितीय शशांक लिमये तर तृतीय पारितोषिक संजय तोडणकर यांना मिळाले आहे. रंगभूषेत प्रथम कविता दिवेकर, द्वितीय प्रदीप पेडणेकर तर तृतीय पारितोषिक नाशिकच्या लोकहितवादी मंडळाच्या 'या ही वळणावर' या नाटकासाठी माणिक कानडे यांना जाहीर झाले. संगीत दिग्दर्शनाचे प्रथम नंदलाल रेळे, द्वितीय विशाल गोळे तर तृतीय चंद्रकांत जाधव यांना जाहीर करण्यात आले आहे.
उत्कृष्ट अभिनयासाठी पुरूष कलाकारांमध्ये आरावसू, नाना (नाना भोळे १२ शनिपेठ, जळगाव), विनोद राऊत, श्रीकांत भिडे, वैजनाथ गमे, किशोर पुराणिक, सुशील इनामदार, संतोष साळुंखे, मिलिंद भणगे (नाशिक), ओमकार पाटील यांना पारितोषिके जाहीर झाली आहेत. स्त्री कलाकारांमध्ये किरण पावसे, नूतन पवने, सोनल आव्हाड, अपूर्वा कुलकर्णी (नाना भोळे १२ शनिपेठ, जळगाव), सोनल शिंदे, मृणाल वरणकर, संस्कृती रांगणेकर, वैभवी सबनिस, कविता गडकरी व धनश्री गाडगीळ यांना पारितोषिक जाहीर झाले.
अभिनयासाठी गुणवत्ता प्रमाणपत्रे पुढील रंगकर्मींना जाहीर झाली
आहेत. श्रृती कुलकर्णी, प्राजक्ता दशपुत्रे (नाना भोळे १२ शनिपेठ, जळगाव), प्रिती जाटे, रसिका पुंड (नाशिक), श्रृती कुलकर्णी, सुरेश जाधव, अनंत अभ्यंकर, सुरेश पवार, यशोधन गडकरी व नारायण खराडे यांना जाहीर झाली आहेत. आद्य क्रांतिवीर वासुदेव बळवंत फडके नाट्यगृह, पनवेल येथे २ ते २१ फेब्रुवारीदरम्यान झालेल्या या अंतिम फेरीत एकूण १९ नाट्यप्रयोग सादर झाले. परीक्षक म्हणून दत्त भगत, बाबा पार्सेकर, विजयकुमार नाईक, अनिल गवस, सुरेंद्र केतकर यांनी काम पाहिले. नािशकमधील कानडे, भणगे व पुंड या तीनही विजेत्यांचे रंगकर्मींकडून अभिनंदन करण्यात येत आहे.
असूरवेद नाटकाला प्रथम पारितोषिक
अंतिम स्पर्धेत बृहन्मुंबई महानगरपालिका, मुंबई संस्थेच्या 'असूरवेद' नाटकाने प्रथम क्रमांक पटकावला. या नाटकासाठी तीन लाखाचे पारितोषिक जाहीर करण्यात आले. द्वितीय क्रमांक सांगली येथील अॅक्टिव्ह ग्रुपच्या 'वृंदावन' नाटकाला जाहीर झाला. हे पारितोषिक दोन लाखाचे आहे. तर, जळगावच्या मूळजी जेठा महाविद्यालय संस्थेच्या 'नाना भोळे १२ शनिपेठ' या नाटकाला तृतीय क्रमांक प्राप्त झाला असून, एका लाखाचे पारितोषिक जाहीर झाले आहे.
मोबाइल अॅप डाउनलोड करा आणि राहा अपडेट