म. टा. प्रतिनिधी, नाशिक
शहरातील ६ आणि साडेसात मीटर रस्त्यालगत वापरण्यात येणारे विकास हक्क हस्तांतरण (टीडीआर) यापुढे वापरता येणार नसल्याने नाशकातील बांधकाम उद्योग संकटात येणार आहे. राज्य सरकारने १८ महापालिकांसाठी जाहीर केलेल्या टीडीआर धोरणामुळे येत्या काळात विकासनासाठी येणाऱ्या जुन्या बांधाकमांनाही फटका बसणार आहे.
राज्यातील महापालिका क्षेत्रात टीडीआरचे स्वतंत्र धोरण असावे या उद्देशाने राज्य सरकारने गेल्यावर्षी ३० एप्रिल रोजी एक मसुदा प्रसिद्ध केला होता. त्यावर सूचना आणि हरकती मागविण्यात आल्या होत्या. त्यावरील जनसुनावणी झाल्यानंतर सरकारने टीडीआर धोरण गुरुवारी जाहीर केले आहे. या धोरणाचा मोठा परिणाम शहरातील बांधकाम क्षेत्रावर होणार असल्याचे सांगण्यात येत आहे. सद्यस्थितीत ६ ते ७.५ मीटर रस्त्यालगत होणाऱ्या बांधकामांना ०.४ टीडीआर वापरला जातो. नव्या धोरणामुळे हा टीडीआर वापरावर गदा आली आहे. ६ ते ७.५ मीटर रस्त्यालगत टीडीआर लागू होणार नसल्याचे धोरणात म्हटले आहे. महापालिकेच्या विकास नियंत्रण नियमावलीनुसार (डीसीआर) शहरात ६ ते ७.५ मीटर रस्त्यालगतच बांधकामे सुरू आहेत. तसेच, येत्या काळात बांधकामे होणार आहेत. मात्र, आता टीडीआर वापरता येणार नसल्याने या रस्त्यालगत असलेल्या जागा विकसनासाठी घेण्यात येणार नाहीत. यातून स्वस्तात घरे उपलब्ध होण्यावरही परिणाम होणार असल्याचे बांधकाम क्षेत्रातील सूत्रांचे म्हणणे आहे. तसेच, ९ मीटरपुढील रस्त्यालगतही टीडीआर वापरावर निर्बंध घालण्यात आले आहेत. गावठाण सोडून आरक्षित जागांवर २ टीडीआर वापरता येणार. त्यातही या जागांना कंपांऊंड करुन द्यावे लागणार आहे. टीडीआर वापरल्यास ५ टक्के वेगळे चार्जेस द्यावे लागणार आहे. तसेच, सध्या ६ आणि ७.५ मीटर लगत असलेल्या जुन्या इमारती नव्याने विकसनासाठी येणार आहेत. तेथे टीडीआर लागू होणार नसल्याने या इमारतींचे काय, असा प्रश्नही उपस्थित झाला आहे. एकंदरीतच, टीडीआर धोरणातील अनेक तरतुदींमुळे शहरातील बांधकाम क्षेत्र अडचणीत येणार असल्याचे दिसून येत आहे.
६ आणि ७.५ मीटर ररस्त्यालगत टीडीआर वापरता न येणे हे अन्यायकारक आहे. एकप्रकारे हा टीडीआर स्वातंत्र्यावरच गदा आहे. याचा विपरित परिणाम शहरातील बांधकामांवर होणार आहे.
अविनाश शिरोडे
माजी अध्यक्ष, क्रेडाई
९ मीटर पुढील रस्त्यांलगत टीडीआर वापरण्यासही सरकारने विविध बंधने घातली आहेत. याचा मोठा परिणाम बांधकाम क्षेत्रावर होणार आहे.
विजय सानप
अध्यक्ष, आर्किटेक्ट अँड सिव्हिल इंजि. असो.
मोबाइल अॅप डाउनलोड करा आणि राहा अपडेट