म. टा. प्रतिनिधी, नाशिक
शहरातील वाढत्या लोकवस्त्यांत अनेक ठिकाणी अवैध धंदे व जुगार अड्ड्यांचा सुळसुळाट झाला आहे. ठिकठिकाणचे अवैध धंदे व जुगार अड्ड्यांवर पोलिसांकडून कारवाईदेखील करण्यात येत आहे. परंतु, हे अवैध धंदे कायमस्वरूपी बंद करण्यासाठी पोलिस धडक कारवाई केव्हा करणार, असा सवाल सर्वसामान्य नागरिकांकडून उपस्थित होत आहे. शहरात अलीकडे फोफावणाऱ्या गुन्हेगारीचे मूळ असलेले जुगार अड्डे व अवैध धंदे पोलिसांनी समूळ नष्ट करावेत, अशी मागणीही त्रस्त नागरिकांकडून करण्यात येत आहे.
झपाट्याने वाढत असलेल्या नाशिक शहरात अवैध धंदे व जुगाराचे अड्डे फोफावले आहेत. कुठल्याही प्रकारची भीडभाड न ठेवता अवैध धंदे व जुगारांचे अड्डे खुलेआम सुरू असल्याचे चित्र शहरात अनेक ठिकाणी दिसून येत आहे. कामधंद्याएेवजी मोठ्या संख्येने तरुणांचा जुगार अड्ड्यांवरच मुक्काम अधिक असल्याचे दिसून येत आहे. अवैध धंदे व जुगार अड्ड्यांवर गुन्हेगारी प्रवृत्तीच्या व्यक्तींचा वावर अधिक असल्याने गेल्या काही वर्षांत गुन्ह्यांचे प्रमाणदेखील वाढले आहे.
पोलिसांकडून सातत्याने अवैध धंदे व जुगार अड्ड्यांवर कारवाई होते खरी, परंतु जागेच्या मालकावर कारवाई होत नसल्याने अवैध धंदे व जुगार अड्डे पुन्हा सुरू होताना दिसत आहेत. शहरातील नाशिकरोड, पंचवटी, जुने नाशिक, सिडको व सातपूर भागासह अनेक ठिकाणी राजरोसपणे सुरू असलेले जुगार अड्डे व अवैध धंद्यांची ठिकाणे गुन्हेगारांसाठी हक्काच्या जागा बनली आहेत. त्यामुळे पोलिसांनी धडक कारवाई करावी, तसेच जागामालकांवरही गुन्हा दाखल करावा, अशी मागणी नागरिकांकडून केली जात आहे.
आयुक्तांकडून कारवाईची अपेक्षा
दरम्यान, 'मटा'ने जुगार अड्ड्यांचा सुळसुळाट या शीर्षकाखाली वृत्त प्रसिद्ध केल्यानंतर नव्याने पदभार स्वीकारणारे पोलिस आयुक्त रवींद्र सिंगल यांनी अवैध धंदे व जुगार अड्ड्यांवर कारवाईचा बडगा उगारला आहे. परंतु, अवैध धंदे व जुगार अड्डे कायमस्वरूपी कसे बंद होतील याबाबत आयुक्त सिंगल यांनी धडक कारवाई केली पाहिजे, अशी अपेक्षा नागरिकांकडून व्यक्त केली जात आहे.
पोलिसांनी अवैध धंदे व जुगार अड्डे कायमस्वरूपी बंद करण्याबाबत ठोस निर्णय घेण्याची गरज आहे. तसेच, जुगार खेळणाऱ्या ठिकाणांच्या जागामालकांवर फौजदारी गुन्हे दाखल करण्याचीही गरज आहे.
-शेखर निकुंभ, नागरिक
मंत्रभूमीकडून यंत्रभूमीकडे प्रवास करणाऱ्या नाशिक शहराला जुगार अड्ड्यांनी वेढले आहे. पोलिसांकडून कारवाई होताना ती केवळ काही ठराविकच वेळेपुरतीच असते. जुगार अड्डे कामयस्वरूपी बंद करण्यासाठी पोलिसांनी धडक कारवाई करायला हवी.
-नीलेश लोखंडे, नागरिक
मोबाइल अॅप डाउनलोड करा आणि राहा अपडेट
