म. टा. प्रतिनिधी, नाशिक
दहावीच्या गुणपत्रिकेवरीलच नाव आधारकार्डवर सक्तीचे करण्यात आल्याने जेईईच्या विद्यार्थ्यांची पंचाईत झाली आहे. मुदतीत ऑनलाइन अर्ज भरणे आवश्यक असले तरी आधार अपडेशनअभावी विद्यार्थ्यांचा जीव टांगणीला लागला आहे. या प्रकरणाची जिल्हाधिकाऱ्यांनी याची नोंद घेतली आहे. शहरात सोमवारपासून १४ नवीन आधार सेंटर्स कार्यान्वित होणार असून, त्यापैकी चार आधार सेंटर्स केवळ जेईईच्या विद्यार्थ्यांसाठी काम करतील अशी ग्वाही जिल्हाधिकारी राधाकृष्णन बी. यांनी दिली.
नवीन आधार काढण्यासाठी, आहे त्या आधारकार्डचे अपडेशन करण्यासाठी नागरिकांना अनंत अडचणींचा सामना करावा लागत आहे. ज्येष्ठ नागरिक, विद्यार्थी आणि महिला वर्गाची त्यामध्ये अधिक फरफट सुरू आहे. याबाबतच्या तक्रारी वाढू लागल्याने आमदार देवयानी फरांदे यांनी काही नगरसेवक आणि भाजप पदाधिकाऱ्यांसह शनिवारी सकाळी जिल्हाधिकारी राधाकृष्णन बी. यांची भेट घेतली. यावेळी त्यांच्यापुढे तक्रारींचा पाढा वाचत शहरात आधार केंद्रांची संख्या वाढवा, अशी मागणी करण्यात आली. याखेरीज पेन्शनरांची तसेच जेईईच्या विद्यार्थ्यांची गैरसोय टाळण्यासाठी त्यांच्याकरिता स्वतंत्र आधार सेंटर्स सुरू करा, अशी मागणी करण्यात आली. ज्येष्ठ नागरिकांच्या बोटांचे ठसे उमटत नसल्याने त्यांना अधिक अडचणींचा सामना करावा लागत असल्याकडेही लक्ष वेधण्यात आले. या सर्व विषयाकडे प्रशासनाचे लक्ष असून उपाययोजना देखील सुरू असल्याची माहिती यावेळी राधाकृष्णन बी. यांनी फरांदे यांच्यासह उपस्थ‌तिांना दिली. आयआयटी आणि एनआयटीमधील प्रवेशांसाठी इच्छुक असलेल्या विद्यार्थ्यांसाठी ‘जेईई-मेन’ या परीक्षेसाठी ऑनलाइन अर्ज भरण्यासाठी ३१ डिसेंबर ही अंत‌मि मुदत आहे. आधारकार्ड व शैक्षणिक कागदपत्रांमध्ये नावात थोडाही बदल असला तरी अर्ज स्वीकारला जात नाही. आधारकार्ड दुरुस्तीसाठी विद्यार्थ्यांना आधार केंद्रांची शोधाशोध करावी लागत आहे. या परीक्षार्थींसाठी स्वतंत्र केंद्र सुरू करावे अशी मागणी आमदार फरांदे यांनी जिल्हाधिकाऱ्यांकडे केली. जिल्हाधिकाऱ्यांनी चार स्वतंत्र केंद्र सुरू करावीत असे आदेश महाऑनलाईनच्या समन्वयकांना दिले.
ऑनलाईन नोंदणी करा
युआयडीच्या सकेतस्थळावरही आधारकार्ड अद्यावत करता येते. युआयडीएआयडॉटइन या संकेतस्थळावर त्याबाबतची सविस्तर माहिती देण्यात आली आहे. आवश्यक कागदपत्रे स्कॅन करून संकेतस्थळावर सांगितल्याप्रमाणे अपलोड केल्यास अपडेशनचे काम ऑनलाइन करता येणार आहे. अपलोड करण्यापूर्वी प्रत्येक कागदपत्रे स्वतःच्या सहीने सांक्षाकित करणे आवश्यक आहे.
…तर आमच्याकडे करा तक्रार
शहरात सर्वत्र नवीन आधार कार्ड मोफत काढून दिले जाते तर आधार कार्डमधील दुरुस्तीसाठी २५ रुपये शुल्क आहे. त्याहून अधिक पैशांची मागणी कोणी केली तर १९४७ या टोल फ्री क्रमांकावर संपर्क साधावा, असे आवाहन जिल्हाधिकाऱ्यांनी केले. सोमवारपासून शहरात १४ नविन केंद्रे सुरू करण्यात येतील. प्रत्येक नागरिकाचे कागदपत्र स्कॅन करून युआयडीकडे अपलोड करावे लागते. त्यामुळे एका केंद्रावर दिवसभरात ३० ते ३५ नागरिकांची नोंदणी होते. मात्र नागरिकांची गैरसोय टाळण्यासाठी यापूढे टोकन द्यावा, अशी सूचनाही जिल्हाधिकाऱ्यांनी संबंधित
यंत्रणेला केली. तसेच शहरात आधार केंद्र सुरू करण्यासाठी नाशिक महानगरपालिकेकडून सहकार्य मिळत नसल्याबद्दल जिल्हाधिकाऱ्यांनी नाराजी व्यक्त केली.
मोबाइल अॅप डाउनलोड करा आणि राहा अपडेट
