Quantcast
Are you the publisher? Claim or contact us about this channel


Embed this content in your HTML

Search

Report adult content:

click to rate:

Account: (login)

More Channels


Showcase


Channel Catalog


Articles on this Page

(showing articles 1 to 25 of 25)
(showing articles 1 to 25 of 25)


Channel Description:

News from India by India number one website
    0 0

    मालेगाव सुरळीत, बंदचा परिणाम नाही

    म. टा. वृत्तसेवा, मालेगाव

    नागरिकत्व सुधारणा कायदा केंद्र सरकारने मागे घ्यावा, या प्रमुख मागणीसाठी वंचित बहुजन आघाडीच्या प्रकाश आंबेडकर यांनी शुक्रवारी (दि. २४) महाराष्ट्र बंदची हाक दिली होती. या बंदचा परिणाम मालेगावी पाहायला मिळाला नाही तसेच कोणतही अनुचित प्रकार घडला नाही. वंचित बहुजन आघाडीतर्फे मोर्चा काढून अपर जिल्हाधिकारी यांना निवेदन देण्यात आले.

    शहरातील कॅम्प, सोयागाव, कलेक्टर पट्टा, संगमेश्वर तसेच पूर्व भागात देखील जनजीवन सुरळीत होते. बस, रिक्षासेवा सुरळीत सुरू होत्या. शाळा, महाविद्यालय, व्यापारी संकुल, दुकाने सुरळीत सुरू असल्याचे पाहायला मिळाले.

    वंचितचा मोर्चा

    दुपारी वंचित बहुजन आघाडीतर्फे एकात्मता चौक ते अपर जिल्हाधिकारी कार्यालय असा मोर्चा काढण्यात आला. यावेळी मोर्चात बिपीन पटाईत, किरण खरे, शैलेन्द्र गायकवाड, मुकीम मीनानगरी, विशाल खरे, संतोष अहिरे, रुपेश पटाईत, मनोज अहिरे आदींसह वंचित बहुजन आघाडीचे पदाधिकारी, कार्यकर्ते सहभागी झाले होते.

    मोबाइल अॅप डाउनलोड करा आणि राहा अपडेट


    0 0

    म. टा. प्रतिनिधी, नाशिक

    'या भारतात बंधुभाव नित्य वसू दे, दे वरचि असा दे, हे सर्व पंथ संप्रदाय एक दिसू दे, मतभेद नसू दे..', 'खरा तो एकचि धर्म जगाला प्रेम अर्पावे..', 'विजयी विश्व तिरंगा प्यारा..' अशा देशभक्तिपर गीतांचे शब्द आसमंतात गुंजले अन् अवघे वातावरण देशभक्तिमय झाले.

    निमित्त होते, झेप सांस्कृतिक कला व क्रीडा मंडळ व तपोवन ब्रह्मचारी आश्रम यांच्या संयुक्त विद्यमाने आयोजित राष्ट्रभक्तिपर समूहगान कार्यक्रमाचे. शहरातील अकरा हजार शालेय विद्यार्थ्यांनी एकसुरात राष्ट्रभक्तिपर समूहगान व राज्यघटनेच्या उद्देशिकेचे वाचन केले. शुक्रवारी (दि. २४) सकाळी पंचवटीतील श्रीराम विद्यालयात हा कार्यक्रम पार पडला.

    विद्यार्थ्यांमध्ये राष्ट्राभिमान जागृत व्हावा, यासाठी झेप सांस्कृतिक कला व क्रीडा मंडळाच्या वतीने दरवर्षी विद्यार्थ्यांमध्ये राष्ट्रभक्तिपर गीतांच्या समूह गायनाच्या कार्यक्रमाचे आयोजन करण्यात येते. हजारो विद्यार्थी मोठ्या उत्साहाने या कार्यक्रमात सहभाग घेतात. यंदाचा कार्यक्रम राष्ट्रसंत तुकडोजी महाराज यांना जन्मशताब्दी वर्षानिमित्त हा कार्यक्रम समर्पित केला जाणार आहे. 'भारत हमको प्यारा है, विजयी विश्व तिरंगा प्यारा, खरा तो एकचि धर्म जगाला प्रेम अर्पावे, तू नव्या जगाची आशा, या भारतात बंधूभाव नित्य असू दे' अशा गीतांचे सादरीकरण यावेळी विद्यार्थ्यांनी केले. यावेळी झेप संस्थेचे संस्थापक तथा नगरसेवक गुरुमीत बग्गा, जिल्हाधिकारी सूरज मांढरे, आमदार राहुल ढिकले, महापौर सतीश कुलकर्णी, महाराष्ट्र केसरी हर्षवर्धन सदगीर, गजानन शेलार, शाहू खैरे आदी मान्यवरांची उपस्थिती होती. यावेळी हर्षवर्धन सदगीर यांचा सन्मान करण्यात आला.

    मोबाइल अॅप डाउनलोड करा आणि राहा अपडेट


    0 0

    महापौर सतीश कुलकर्णी यांचे प्रतिपादन

    एक भारत-श्रेष्ठ भारत चित्र प्रदर्शनाचे उद्घाटन

    म. टा. प्रतिनिधी, नाशिक

    देशाच्या स्वातंत्र्यासाठी आपल्या प्राणाची आहुती देणाऱ्या हुतात्मांची माहिती नवीन पीढीला होणे गरजेचे आहे, त्यासाठी हे चित्र प्रदर्शन ठिकठिकाणी आयोजित करणे गरजेचे आहे, असे प्रतिपादन महापौर सतीश कुलकर्णी यांनी केले. भारत सरकारच्या माहिती आणि प्रसारण मंत्रालयांतर्गत येणाऱ्या क्षेत्रीय लोकसंपर्क ब्युरोतर्फे भोसला सैनिकी शाळेच्या प्रांगणात आयोजित 'एक भारत-श्रेष्ठ भारत' चित्र प्रदर्शनाच्या उद्घाटनप्रसंगी ते बोलत होते.

    यावेळी लक्ष्मण सावजी, भाजप शहराध्यक्ष गिरीश पालवे, वंद्य वंदे मातरम् संयोजन समितीचे अध्यक्ष शेदुराम रुंग्ठा, सचिव सुधीर मुतालिक, नववर्ष स्वागत समितीचे अध्यक्ष प्रफुल्ल संचेती उपस्थित होते. चित्र प्रदर्शनात महात्मा गांधी यांच्या जीवन व कार्यांवर विस्तृत माहिती देण्यात आली आहे. तसेच सशस्त्र क्रांतीच्या माध्यमातून स्वातंत्र्याच्या लढ्यात सामिल होणारे आणि या साठी फाशीवर चढणाऱ्या निवडक क्रांतिविरांची माहितीसुद्धा या चित्र प्रदर्शनात मांडण्यात आली आहे. या शिवाय स्वातंत्र्य संग्रामाचा जणू मंत्र म्हणून प्रसिद्ध झालेले 'वंदे मारतम्' या राष्ट्रीय गीताविषयी माहिती या प्रदर्शनात चित्र-पोस्टरच्या माध्यमतातून देण्यात आली आहे. नाशिकातील स्थानिक क्रांतिकारकांची माहिती आणि नाशिक येथील वंदे मातरम् खटला याची माहितीही येथे मांडण्यात आली आहे. या सोबतच ३२ क्रांतीकारकांचे रांगोळीचित्र या प्रदर्शनाचे एक आगळे-वेगळे वैशिष्ट्य आहे. या चित्र प्रदर्शनाला अधिकाधिक लोकांनी भेट देऊन लाभ घ्यावा, असे आवाहन क्षेत्रीय प्रचार अधिकारी पराग मांदळे, सेंट्रल हिंदू एज्यूकेशन सोसायटीचे महासचिव दिलीप बेलगावकर, सचिव हेमंत देशपांडे आदींनी केले आहे.

    मोबाइल अॅप डाउनलोड करा आणि राहा अपडेट


    0 0

    म. टा. वृत्तसेवा, पंचवटी

    विविधरंगी पारंपरिक वेशभूषा करून संगीताच्या गजरात पारंपरिक लोकनृत्यातून संस्कृतीचे प्रदर्शन घडवित निघालेल्या शोभायात्रेतील भक्तगणांनी सद्गुरू माता सुदीक्षाजी महाराजांचे स्वागत केले. विविध क्षेत्रांतून आलेल्या भक्तांनी विविधतेतून एकतेचे दर्शन घडविले. शुक्रवारी (दि. २४) शिस्तबद्धतेने निघालेल्या या शोभायात्रेने भक्तिमय वातावरणात संत समागमाला प्रारंभ झाला.

    समागमाच्या मुख्य प्रवेशद्वाराजवळ सत्य, प्रेम व एकत्वाचे प्रतीक म्हणून रंगीत फुगे सोडण्यात आले. त्यावेळी 'धन निरंकार'चा जयघोष करण्यात आला. नाशिकमध्ये ५३ व्या वार्षिक निरंकारी संत समागमानिमित्त होत असलेल्या भव्य आध्यात्मिक कार्यक्रमाचा प्रारंभ शोभायात्रेने झाला. सुमारे दीड किलोमीटरच्या या शोभायात्रेचा प्रारंभ धरमपूर, पेठरोड येथून झाला. या शोभायात्रेत महाराष्ट्रासह इतर राज्यांतून आलेले भक्तगण सहभागी झाले होते. म्हसरूळ-दिंडोरी मार्गावर सद्गुरू माताजी या एका फुलांनी सजविलेल्या वाहनात विराजमान झाल्या होत्या. शोभायात्रेत सहभागी झालेले भक्तगण त्यांना अभिवादन करीत होते. माताजी भक्तगणांच्या अभिवादनाचा स्वीकार करीत होत्या.

    --

    विविधरंगी वेशभूषेने वेधले लक्ष

    संत निरंकारी मंडळाचे राज्यातील विविध क्षेत्रांचे प्रतिनिधित्व करणारे महिला व पुरुष भक्तगण विविध रंगांतील पारंपरिक वेशभूषा परिधान करून शोभायात्रेत सहभागी झाले होते. त्यात नाशिकचे गुलाबी, सोलापूरचे श्वेत, पुण्याचे जांभळा, साताऱ्याचे नारंगी, डोंबिवलीचे पोपटी, कोल्हापूरचे अबोली, औरंगाबादचे लाल, गडचिरोलीचे जांभळा, चिपळूणचे सोनेरी, रायगडचे हिरवा असे विविध रंगांचे फेटे बांधून निघालेल्या भक्तगणांनी खऱ्या अर्थाने शोभायात्रेची शोभा वाढविली. विविधरंगी वेशभूषा लक्षवेधी ठरली.

    --

    पारंपरिक लोककलेचे दर्शन

    पारंपरिक लोकनृत्य आणि लोककलांच्या सादरीकरणाने शोभायात्रेची रंगत चांगलीच वाढली. नाशिक ढोल, आदिवासी तारफा, लेझीम पथक, बँड, हलगी, दिंडी, मंगळागौर, आदिवासी पावरा, ढोल-ताशा या वाद्यांच्या गजरात कोळीनृत्य, पौडनृत्य, बंजारानृत्य, भांगडा, आदिवासी रेला यांद्वारे लोककलेचे दर्शन घडविण्यात आले. त्याचबरोबर मिशनची शिकवण दर्शविणारी आणि मानवतेचे पुनरुत्थान करणारी पथनाट्ये यांचेही सादरीकरण करण्यात आले. सेवा दलाच्या बँडने शोभायात्रेचे नेतृत्व केले. शोभायात्रेत बालभक्तही मोठ्या उत्साहाने सहभागी झाले होते.

    --

    सेवादलाचा उत्स्फूर्त सेवाभाव

    संत निरंकारी मंडळाच्या सेवादलात नाशिकच्या सोहळ्यासाठी सुमारे ५० हजार महिला आणि पुरुष सहभागी झालेले आहेत. या सेवादलाची रॅली आज, शनिवारी (दि. २५) सकाळी ११ वाजता काढण्यात येणार आहे. सेवादलाचे कार्य व्यवस्थापन एक महिना अगोदर करण्यात आले आहे. नियोजनानुसार त्यांची कामे शिस्तीत सुरू आहेत. पुरुष सेवादलाचा खाकी, तर महिला सेवादलाचा आकाशी रंगाचा कुर्ता असा गणवेश आहे. विविध वयोगटांतील पुरुष व महिलांचा यात समावेश आहे. सेवाभावीवृत्तीने सेवादलात काम करणारे महिला आणि पुरुष यांना मिशनतर्फे महिनाभरातून दोनदा प्रशिक्षण दिले जाते. क्षेत्रीय संचालकाच्या आदेशाने युनिट संचालक व सहायक संचालिका कामे करीत असतात. सेवादलाच्या श्रमदानाच्या माध्यमातून संत समागम कार्यक्रमाची व्यवस्था होत असते.

    मोबाइल अॅप डाउनलोड करा आणि राहा अपडेट


    0 0

    अज्ञातांवर गुन्हा दाखल; मालेगावातील प्रकार

    म. टा. वृत्तसेवा, मालेगाव

    शहरानजीक असलेल्या सायने बु. शिवारातील खानपट्टा तपासणीसाठी गेलेल्या जिल्हा खनिकर्म अधिकारी आनंद पाटील यांच्यासह पथकावर १२ ते १२ जणांनी दगडफेक केल्याचा धक्कादायक प्रकार गुरुवारी (दि. २४) सायंकाळी घडला. दरम्यान अधिकारी व पथकाने तेथून पळ काढल्याने कोणालाही इजा झाली नाही. मात्र या घटनेने पुन्हा एकदा अवैधरित्या गौणखनिज उत्खनन करणाऱ्यांची मुजोरी वाढल्याचे समोर आले असून, महसूल विभागात खळबळ उडाली आहे. दरम्यान गुरुवारी रात्री उशिरा याप्रकरणी तालुका पोलिस ठाण्यात गुन्हा दाखल करण्यात आल्याची माहिती तहसीलदार चंद्रजीत राजपूत यांनी दिली.

    गुरुवारी खनिकर्म अधिकारी आनंद पाटील हे सायने बु. शिवारातील गट नंबर २७५, ३७६ येथील खानपट्टा तपासणीसाठी आले होते. त्यांच्यासमवेत तलाठी नामदेव पवार, कोतवाल नाना उशिरे, मंडळ अधिकारी ए. डी. काळे, रवी शेवाळे व विधाते आदींसह महसूल कर्मचाऱ्यांचे पथक होते. घटनास्थळी असलेल्या खानपट्टा १ व २ मध्ये दगडांनी भरलेले ६ ट्रॅक्टर व १२ ते १२ अनोळखी उसम उभे होते. यावेळी पथकातील कर्मचाऱ्यांनी त्यांची विचारपूस केली असता त्यांच्याकडे गौण खनिज उत्खनन व वाहतुकीचे कोणतेही परवाने नसल्याचे आढळून आले. तसेच त्या अज्ञात इसमांनी आपली ओळख देण्यास नकार दिला. अखेर पथकाने ट्रक्टर जप्त करण्याची कारवाई सुरू करतात एका खानपट्ट्यातून अज्ञातांनी अधिकारी पाटील व पथकावर दगडफेक करायला सुरुवात केली व जप्त केलेले ट्रक्टर पळवून नेले. अखेर अधिकारी व पथकाने जीव वाचवत तेथून पळ काढला. सायंकाळी उशिरा घडल्या प्रकारची माहिती जिल्हाधिकारी सूरज मांढरे, तहसीलदार चंद्रजीत राजपूत यांना देण्यात आली.

    अज्ञातांवर गुन्हा दाखल

    रात्री उशिरा याप्रकरणी तलाठी नामदेव पवार यांच्या फिर्यादीवरून १२ जणांवर गुन्हा दाखल करण्यात आला आहे. पुढील तपास पोलिस करीत आहेत.

    मोबाइल अॅप डाउनलोड करा आणि राहा अपडेट


    0 0

    डेडलाइनची धास्ती; तांत्रिक कामे पूर्ण होण्याआधीच उद्यापासून वापरासाठी उपलब्ध

    ...

    म. टा. खास प्रतिनिधी, नाशिक

    शहराच्या वाहतूक कोंडीला कारणीभूत ठरलेला आणि वर्दळीचा रस्ता असलेल्या अशोकस्तंभ ते त्र्यंबक नाका या स्मार्ट रोडच्या पूर्णत्वाची २६ जानेवारीची डेडलाइन पाळण्यासाठी स्मार्ट सिटी कंपनीने धावपळ सुरू केली आहे. रोडचे काम अपूर्णावस्थेत असतानाच उद्या, रविवारी आता स्मार्ट रोड खुला केला जाणार आहे. आज (दि. २५) या रोडची क्यूब आणि स्ट्रेन्थ चाचणी केली जाणार आहे. या चाचणीनंतर रविवारपासून स्मार्ड रोड वाहतुकीला खुला केला जाणार असल्याची माहिती कंपनीने दिली. त्यामुळे अपूर्ण का होईना रविवारपासून स्मार्ट रोडचा आनंद नाशिककरांना घेता येणार आहे.

    स्मार्ट सिटी अभियानांतर्गत साकारण्यात येत असलेला त्र्यंबकरोड ते अशोकस्तंभ हा १.१ किलोमीटर लांबीच्या स्मार्ट रोडच्या दिरंगाईमुळे नाशिककर मेटाकुटीला आले आहेत. एक किलोमीटरच्या स्मार्ट रोडचे काम तब्बल पावणेदोन वर्षापासून सुरू असून, अद्यापही पूर्ण झालेले नाही. रस्त्याचा खर्च हा १७ कोटींवरून २१ कोटी रुपयांपर्यंत पोहचला असताना, स्मार्ट रोडमुळे वर्दळीचा परिसर वाहतूक कोंडीमुळे दीड वर्षापासून ठप्प झाला आहे.

    स्मार्ट रोडच्या कामाचा शुभारंभ मार्च २०१८ मध्ये करण्यात आला होता. या कामासाठी सर्वप्रथम सहा महिन्यांची मुदत देण्यात आली होती. परंतु, मुदतीत केवळ २० टक्केच काम पूर्ण झाले होते. या रस्त्यासंदर्भात अनंत अडचणी उभ्या राहिल्याने रस्ते कामासाठी मुदतवाढ देण्याची मागणी ठेकेदाराने केली. त्यामुळे पुन्हा मार्च २०१९ पर्यंत ठेकेदाराला मुदतवाढ देण्यात आली. परंतु, या मुदतीतही केवळ ४० ते ५० टक्केच काम पूर्ण झाले होते. त्यामुळे ठेकेदाराकडून पुन्हा मुदतवाढ देण्याचा आग्रह धरण्यात आला. आयुक्त राधाकृष्ण गमे यांनी ३१ मार्चची डेडलाइन दिली. मात्र तरीही रस्त्याचे काम संथ गतीने सुरू होते. त्यामुळे आयुक्तांनी एप्रिल २०१५ पासून ०.५ टक्के दंड सुरू केला आहे. डिसेंबर लोटला तरी ठेकेदाराकडून काम होत नसल्याने आयुक्तांनी ठेकेदाराला २६ जानेवारीची डेडलाइन दिली होती. त्यामुळे रोड खुला करण्याचा दबाव ठेकेदारासह कंपनीच्या अधिकाऱ्यांवर वाढला होता. अजूनही स्मार्ट रोडचे काम पूर्ण झाले नसले तरी डेडलाइन पाळण्यासाठी ठेकेदार आणि कंपनीने अखेरीस २६ जानेवारीला रोड खुला करण्याचा निर्णय घेतला आहे.

    ...

    आज दोन चाचण्या

    २६ जानेवारीपासून रोड खुला होणार असला तरी, आज (दि. २५) या रस्त्याच्या दोन चाचण्या केल्या जाणार आहेत. पहिली चाचणी ही क्यूब चाचणी असून, दुसरी चाचणी रोड स्ट्रेन्थची असणार आहे. या दोन चाचण्यांच्या अहवालानंतर २६ पासून रोड खुला केला जाणार आहे. अशोकस्तंभ परिसरात रस्त्याचे काम सुरू असले तरी नागरिकांचा तसेच संचालकांचा रोष ओढावू नये, यासाठी अहवाल येण्याआधीच रस्ता खुला करण्याचा निर्णय घेण्यात आला आहे.

    ...

    ...ही कामे अपूर्णच

    स्मार्ट रोडवर आयटीएमएससह एएनपीआर, आरएलव्हीडी, फिक्स बॉक्स आणि पीटीझेड असे २७ सीसीटीव्ही कॅमेरे बसविण्यात येत आहेत, तसेच पब्लिक ॲड्रेस सिस्टम एन्व्हायरमेंट सेंसर्स बसविण्यात येत आहेत. त्याचे काम अद्यापही सुरूच आहे. स्ट्रीट लाइटिंग, सायकल ट्रॅकचे कामही अद्याप अपूर्णच आहे. तरीही स्मार्ट रोड स्मार्ट होण्याआधीच त्याचा शुभारंभ केला जाणार आहे.

    मोबाइल अॅप डाउनलोड करा आणि राहा अपडेट


    0 0

    साडेचार हजार थकबाकीदारांवर महापालिकेची कारवाई

    ....

    म. टा. खास प्रतिनिधी, नाशिक

    शहरातील २८ हजार पाणीपट्टी ग्राहकांकडे जवळपास ४० कोटींची थकबाकी आहे. त्यामुळे पाणीपट्टीची थकबाकी ५९ कोटींवर पोहचली असून, ही थकबाकी वसुलीसाठी महापालिका आक्रमक झाली आहे. वारंवार सूचनापत्र देऊनही थकबाकी न भरणाऱ्या तब्बल ४,६०० थकबाकीदारांचे नळकनेक्शन महापालिकेने खंडित केले आहेत. यात सिडकोतील थकबाकीदारांचा आकडा मोठा असून, येथे १,२४० थकबाकीदारांचे नळकनेक्शन खंडित करण्यात आले आहे. थकीत पाणीपट्टीसह चालू आर्थिक वर्षातील थकबाकी मिळून ५९ कोटी रुपये वसुलीचे आव्हान अडीच महिन्यांत राहणार आहे.

    शहरात पाणीपट्टीचे एक लाख ९६ हजार ५५६ ग्राहक आहेत. त्यात निवासी एक लाख ८८ हजार ३९७, व्यावसायिक ३,९११, अव्यावसायिक ४,२४८ एवढे ग्राहक आहेत. पाणीगळती मोठ्या प्रमाणावर असल्याने तोट्यातील पाणीपुरवठा विभागात थकबाकीदारांची संख्याही दिवसेंदिवस वाढतच चालली आहे. सन २०१९-२० या आर्थिक वर्षात पाणीपट्टीचे ६३ कोटींचे उद्दिष्टे होते. त्यापैकी आतापर्यंत जेमतेम ४३ कोटी वसूल झाले आहेत. उद्दिष्टामुळे हे प्रमाण केवळ ४९ टक्के एवढेच आहे. थकबाकीदारांची संख्या २८ हजार ५५७ एवढी आहे. या थकबाकीदारांकडेच ४० कोटी २५ लाखांची थकबाकी आहे. त्यामुळे या थकीत करवसुलीसाठी महापालिकेने थकबाकीदारांविरोधात कारवाईचा बडगा उगारला आहे. त्यांना वारंवार थकबाकीची नोटीस बजावूनही त्यांनी दुर्लक्ष केल्याने गेल्या एप्रिलपासून थेट नळकनेक्शन खंडित करण्याचे काम सुरू केले आहे. आतापर्यंत ४,६०० थकबाकीदारांचे नळकनेक्शन तोडण्यात आले आहेत. नळकनेक्शन तोडण्यात आल्यानंतर ते पुन्हा परस्पर जोडण्याचा प्रयत्न संबंधित थकबाकीदाराने केल्यास गुन्हा दाखल करण्याचे आदेश आयुक्त राधाकृष्ण गमे यांनी दिले आहेत.

    ...

    थकबाकीत वाढच

    बडे थकबाकीदार आणि चालू आर्थिक वर्षातील थकबाकीचा आकडा हा ५९ कोटींपर्यंत पोहचला आहे. त्यात दिवसेंदिवस वाढच होत असून, आर्थिक वर्ष संपण्यासाठी आता जेमतेम दोन महिने शिल्लक राहिले आहेत. त्यामुळे या दोन महिन्यांच्या कालावधीत तब्बल ५९ कोटी रुपयांची थकीत पाणीपट्टी वसुलीचे आव्हान प्रशासनासमोर आहे. थकीत कर भरण्यासाठी घंटागाडीवरील ध्वनिक्षेपकाद्वारे शहरभर आवाहन केले जात आहे.

    मोबाइल अॅप डाउनलोड करा आणि राहा अपडेट


    0 0

    - लाखो आदिवासी विद्यार्थ्यांची सुरक्षा धोक्यात

    - 'पायलट प्रोजेक्ट' तीन वर्षांपासून लालफितीत

    ....

    विनोद पाटील

    vinod.patil@timesgroup.com

    Tweet : vinodpatilMT

    नाशिक : भ्रष्टाचार आणि वादंगांच्या अजगरी विळख्यात सापडलेल्या राज्याच्या आदिवासी विकास विभागाच्या असंवेदनशील कारभाराने कळस गाठल्याचा आणखी एक प्रत्यय आला आहे. राज्यभरातील आश्रमशाळांमध्ये सीसीटीव्ही बसविण्याचा पथदर्शी प्रकल्प तीन वर्षांपासून लालफितीत अडकल्याने तब्बल साडेचार लाख आदिवासी विद्यार्थ्यांची सुरक्षाच धोक्यात असल्याचे वास्तव उजेडात आले आहे. महत्त्वाचे म्हणजे १६ वर्षांत तब्बल आश्रमशाळांमध्ये १,३०६ विद्यार्थ्यांचा मृत्यू झाल्याची बाबही नोकरशाहांनी नजरेआड केली.

    बुलडाण्यात २०१६ मध्ये आदिवासी आश्रमशाळेतील विद्यार्थिनींवर अत्याचार झाल्याचे प्रकरण उजेडात आले होते. त्यानंतर राज्यातील ५११ शासकीय आश्रमशाळांमध्ये सीसीटीव्ही बसविण्याचा निर्णय एप्रिल २०१७ मध्ये तत्कालीन आदिवासी विकासमंत्री विष्णू सावरा यांनी घेतला होता. त्यासाठी पायलट प्रोजेक्ट म्हणून नाशिक प्रकल्पाची निवड करून २७ शाळांमध्ये ही योजना राबविण्याचे आदेश काढण्यात आले. परंतु, मंत्रालय आणि आयुक्तालयात वावरणारे ठेकेदार आणि अधिकाऱ्यांच्या साखळीने आदिवासी विद्यार्थ्यांच्या सुरक्षेसंबंधी फक्त कागदी घोडे नाचविले. सावरांच्या आदेशानंतर ५२९ आश्रमशाळांमध्ये सीसीटीव्ही यंत्रणा कार्यान्वित करण्यासाठी २२ कोटींची तरतूदही करण्यात आली. त्यानंतर निविदा प्रक्रियेचे सोपस्कार पार पडण्यात आले. परंतु, विशिष्ट ठेकेदारांना स्थान मिळत नसल्याने पुन्हा ६ जानेवारी २०१८ मध्ये निविदा प्रक्रिया थांबविण्यात आली. त्यानंतर आश्रमशाळांचे सर्वेक्षण करून सीसीटीव्ही लावण्याचा निर्णय घेण्यात आला. त्यासाठी पीडब्लूसी या कन्सल्टंट कंपनीला सहा विभागांत सर्वेक्षण करण्याचे काम देण्यात आले. या कंपनीवर लाखोंची उधळपट्टी केल्यानंतर नाशिक अप्पर आयुक्तालयातील नाशिक प्रकल्प कार्यालयांतर्गत येणाऱ्या २७ आश्रमशाळा आणि वसतिगृहांमध्ये प्रायोगिक तत्त्वावर (पायलट प्रोजेक्ट) सीसीटीव्ही बसविण्याचा निर्णय २०१८ च्या अखेरीस घेण्यात आला. त्यासाठी तीन कोटींची तरतूदही करण्यात आली. मात्र अद्याप ही प्रक्रिया पुढे सरकू शकलेली नाही. प्रकल्पाची निविदा प्रक्रिया होऊन सहा महिने उलटले तरी तांत्रिक पूर्तता न झाल्याने अद्याप ठेकेदारच मंजुरीच्या प्रतीक्षेत आहेत.

    ...

    अत्याचारानंतरच घेतली दखल

    बुलढाणा येथे सन २०१६ मध्ये आश्रमशाळांमधील विद्यार्थिनींवर लैंगिक अत्याचार झाल्याचे उजेडात आल्यानंतर हा विषय चांगलाच तापला होता. त्यानंतर राज्य सरकारने आश्रमशाळांची आदिवासी विभाग आणि महसूल विभागाच्या अधिकाऱ्यांमार्फत तपासणी केली. या पाहणीत विद्यार्थी सुरक्षेसह शाळांच्या कारभारात अनेक त्रुटी आढळल्या. विद्यार्थ्यांवर लैंगिक अत्याचार, शिक्षक व कर्मचाऱ्याची गैरहजेरी, विद्यार्थ्यांना निकृष्ट आहार, वर्गखोल्यांची दयनीय अवस्था, आरोग्य सुविधेचा बोजवारा, आश्रमशाळांना कुंपण नसणे, निवासव्यवस्थेच्या उणिवा, पायाभूत सुविधांचा अभाव अशा या त्रुटी दिसून आल्या. त्यानंतर ८ एप्रिल २०१७ मध्ये राज्य सरकारने आश्रमशाळांमध्ये सीसीटीव्ही यंत्रणा बसविण्याचा निर्णय घेतला.

    ...

    आश्रमशाळांमधील विद्यार्थ्यांना सुविधा मिळाव्यात, त्यांची सुरक्षितता अबाधित राहावी याबाबत २०१२ पासून एक याचिकाही दाखल आहे. न्यायालयाने वेळोवेळी विद्यार्थ्यांची सुरक्षा निश्चित करण्याचे आदेश विभागाला दिले असतानाही केवळ प्रशासकीय उदासीनता आणि राजकीय इच्छाशक्तीच्या अभावाने गोरगरीब आदिवासी मुलांचा बळी जात आहे. शासनाने आधी प्रशासकीय यंत्रणेची जबाबदारी निश्चित करावी.

    - रवींद्र तळपे, याचिकाकर्ते, पुणे

    ...

    सीसीटीव्ही बसविण्याचे काम थेट मंत्रालयातून करण्यात येत आहे. त्यासाठी पीडब्ल्यूसी कन्सल्टन्सी कंपनी नियुक्ती करण्यात आली आहे. त्याची संपूर्ण कार्यवाही या कंपनीकडूनच केली जात आहे. केवळ या 'पायलट प्रोजेक्ट'ची अंमलबजावणी नाशिक प्रकल्पात केली जात आहे. मात्र, यात आमच्या कार्यालयाची कोणतीही भूमिकी नाही.

    - कुमार आशीर्वाद, प्रकल्प अधिकारी, नाशिक

    .....

    दृष्टिक्षेपात…...

    राज्यातील आश्रमशाळा - १,०५३

    शासकीय आश्रमशाळा - ५११

    खासगी अनुदानित आश्रमशाळा - ५४२

    एकूण विद्यार्थी- साडेचार लाख

    मोबाइल अॅप डाउनलोड करा आणि राहा अपडेट


    0 0

    म. टा. खास प्रतिनिधी, नाशिक

    उत्तम व्यवस्थापन कौशल्य, सेवाभावीवृत्ती अन् विनयशीलता कशी असावी याचे दर्शन बोरगडमध्ये भरलेल्या संत निरंकारी समागमात घडत आहे. सुमारे अडीच ते तीन लाख भाविकांचा मेळाच येथे भरला असून, या परिसराला एका नगरीचेच रूप प्राप्त झाले आहे. जगण्यासाठी हवे ते या नगरीत उपलब्ध असून, हा सोहळा अनुभवण्यासाठी आता सेवेकऱ्यांव्यतिरिक्त शहर आणि जिल्हावासीयांची पावलेही बोरगडकडे वळू लागली आहेत.

    नाशिक ही कुंभमेळ्याची नगरी. २०१५ मध्ये नाशिक आणि त्र्यंबकेश्वरमध्ये मोठ्या संख्येने संत-महंत दाखल झाले. शाहीस्नानाबरोबरच दर्शनाची पर्वणी लाखो भाविकांनी अनुभवली. धार्मिक आणि आध्यात्मिक परंपरा लाभलेल्या नाशिकनगरीत धन निरंकारचा संत समागम पहिल्यांदाच होत असून, ही गुरुआज्ञा शिरसावंद्य मानून लाखो भाविक या सोहळ्यात सहभागी झाले आहेत. गुरुसेवा हाच धर्म मानणारा मोठा सेवेकरीवर्ग या नगरीत दाखल झाला आहे. छोटे बालक असो अथवा वृद्ध व्यक्ती एकमेकांची भेट घेताना प्रत्येकाच्या चरणांना स्पर्श करण्याच्या संस्कृतीचे येथे दर्शन घडत आहे. राज्यातील कानाकोपऱ्यांतून, इतकेच नव्हे तर देश-विदेशांतून भाविक या सोहळ्यासाठी नाशिकनगरीत दाखल झाले आहेत. सद्गुरू माता सुदीक्षाजी यांच्या आज्ञेने नाशिकनगरीत हा ५३ वा संत समागम होत असून, सेवेची उत्तम संधी म्हणून जो तो आपापल्या परीने सेवा देण्याचा प्रयत्न करीत आहे. सेवेतून केवळ गुरुमाताच नव्हे, तर आलेला प्रत्येक भाविक खूश व्हावा आणि पुन्हा नाशिककरांना सेवा करण्याची संधी मिळावी या तळमळीनेच येथे सेवेकरी सेवा देत आहेत.

    ---

    उत्तम व्यवस्थापनाचा वस्तुपाठ

    एकाच ठिकाणी आलेल्या अडीच ते तीन लाख भाविकांची गैरसोय होऊ नये याकरिता उत्तम व्यवस्थापन कसे असावे याचे धडे या कार्यक्रमाच्या ठिकाणी गिरवावयास मिळत आहेत. विमानतळ, रेल्वे स्टेशन किंवा बसद्वारे येणारा प्रत्येक भाविक येथे सहजतेने पोहोचू शकेल अशी व्यवस्था नियोजन समितीने केली आहे. प्रत्येक भाविकाच्या स्नानापासून निवासापर्यंतची आणि चहापानापासून भोजनापर्यंतची व्यवस्था येथे करण्यात आली. प्रत्येक सेवेकऱ्याला त्याची जबाबदारी ठरवून देण्यात आली आहे. सोपविलेली ही जबाबदारी गुरुआज्ञा मानून त्यानुसार कर्तव्य बजावण्यास येथे प्राधान्य दिले जात आहे. सकाळपासून रात्री अकरापर्यंत येथे अन्नदान सुरू असून, माफक दरात कॅन्टीनमध्ये नाश्त्याची सुविधाही उपलब्ध करून देण्यात आली आहे. रात्री लखलखत्या दिव्यांच्या प्रकाशात हा परिसर उजळून निघत असून, हा सर्व माहोल डोळ्यांत आणि हृदयात साठविण्यासाठी नाशिककरांची पावलेही या कार्यक्रमस्थळाकडे वळू लागली आहेत.

    मोबाइल अॅप डाउनलोड करा आणि राहा अपडेट


    0 0

    फोटो - पंकज चांडोले

    - -

    बाजारपेठ बंद, जनजीवन सुरळीत

    बंदला अल्प प्रतिसाद; ठिकठिकाणी निदर्शने

    म. टा. प्रतिनिधी, नाशिक

    सीएए, एनआरसी, एनपीआर आणि देशाच्या आर्थिक परिस्थितीचा निषेध नोंदविण्यासाठी वंचित बहुजन आघाडीने दिलेल्या महाराष्ट्र बंदच्या हाकेला नाशिकमध्ये संमिश्र प्रतिसाद मिळाला. शहरातील काही ठिकाणच्या बाजारपेठेतील दुकाने बंद होती. मात्र, जनजीवनावर बंदचा कोणताही परिणाम जाणवला नाही. ठिकठिकाणी केंद्र सरकार विरोधात निदर्शने करीत आघाडीतर्फे निषेध नोंदविण्यात आला.

    सीएए, एनआरसीसह केंद्र सरकारच्या काही निर्णयांबाबत निषेध नोंदविण्यासाठी वंचित बहुजन आघाडीचे नेते प्रकाश आंबेडकर यांच्या आदेशानुसार आघाडीतर्फे शुक्रवारी (दि.२४) महाराष्ट्र बंद पुकारण्यात आला होता. यामुळे शालीमार, सारडा सर्कल, जुने नाशिक, नाशिकरोड, जेलरोड, गंजमाळ, सातपूर येथील दुकाने बंद होती. जुने नाशिक, द्वारका, बागवानपुरा भागातील शाळा-कॉलेजही बंद ठेवण्यात आले होते. वाहतूक व्यवस्था सुरळीत सुरू असल्याने सामान्यांना त्रास झाला नाही. शहरातील विविध ठिकाणी केंद्र सरकारविरोधात निदर्शने करण्यात आली. दुपारी दोन वाजेच्या सुमारास जुने नाशिक भागातून शालीमारपर्यंत आंदोलकांनी मोर्चा काढला. यावेळी केंद्र सरकार विरोधात घोषणाबाजी करण्यात आली. दुकाने बंद करण्याचे आवाहन केले गेले. पोलिसांनी काही कार्यकर्त्यांना ताब्यात घेत सोडून दिले.

    - -

    बंदचे आवाहन

    सकाळी अकरा वाजेच्या सुमारास नाशिकरोड आणि शालीमार येथील डॉ. बाबासाहेब आंबेडकर यांच्या पुतळ्याजवळ आघाडीच्या कार्यकर्त्यांनी निदर्शने केली. यानंतर बाजारपेठेत सुरू असलेली दुकाने बंद करण्याचे आवाहन केले गेले. दुकानदारांनी देखील बंदला प्रतिसाद देत बाजारपेठ बंद ठेवली. मात्र, कोठेही अनुचित प्रकार घडला नाही. शिवाय सायंकाळी बंद मागे घेण्यात आल्यानंतर बाजारपेठेतील व्यवहारही सुरळीत झाले.

    - -

    पोलिसांची नजर

    सकाळी सहा वाजेपासून शहरातील प्रत्येक चौकात पोलिसांचा मोठा फौजफाटा तैनात करण्यात आला होता. शालीमार, जुने नाशिक, द्वारका, नाशिकरोड भागात पोलिसांची सातत्याने पेट्रोलिंग सुरू होते. आंदोलक एकत्र आल्यावर त्यांच्या हालचालींवर लक्ष ठेवण्यात आले. वरिष्ठ पोलिस अधिकाऱ्यांसह कर्मचाऱ्यांच्या तुकड्यांचा ठिकठिकाणी बंदोबस्त लावण्यात आला होता.

    - -

    मोबाइल अॅप डाउनलोड करा आणि राहा अपडेट


    0 0

    म. टा. वृत्तसेवा, नाशिकरोड

    संत गाडगेबाबा ग्राम स्वच्छता अभियानांतर्गत राष्ट्रसंत तुकडोजी महाराज स्वच्छ ग्राम स्पर्धेचा २०१८-१९ या वर्षासाठीचा निकाल विभागीय आयुक्त राजाराम माने यांनी जाहीर केला आहे. या स्पर्धेत विभागस्तरावरील स्पर्धेत दिंडोरी तालुक्यातील लोखंडेवाडी ग्रामपंचायतीने प्रथम पारितोषिक पटकावले आहे. या ग्रामपंचायतीस दहा लाख रुपयांच्या बक्षिसाने गौरविले जाणार आहे.

    स्वच्छतेबाबत जनजागृती व्हावी या उद्देशाने राज्य शासनाच्या पाणीपुरवठा व स्वच्छता विभागातर्फे राज्यातील ग्रामपंचायतींसाठी संत गाडगेबाबा ग्राम स्वच्छता अभियानांतर्गत राष्ट्रसंत तुकडोजी महाराज स्वच्छ ग्राम स्पर्धा राबविली जाते. या स्पर्धेत सहभागी ग्रामपंचायतींची तपासणी करण्यासाठी विभागीय स्तरावर विभागीय आयुक्तांच्या अध्यक्षतेखाली सहा सदस्यीय समिती नेमलेली असते. विभागीय आयुक्त राजाराम माने यांच्या अध्यक्षतेखालील सहाय्यक आयुक्त राजन पाटील, मनीष सांगळे, आरोग्य उपसंचालक रत्ना रावखंडे, महाराष्ट्र जीवन प्राधिकरणाचे मुख्य अभियंता देवेंद्र लांडगे, उपायुक्त प्रतिभा संगमनेरे, अरविंद मोरे या सदस्यांच्या समितीने या स्पर्धेत सहभागी ग्रामपंचायतीची मूल्यांकन निकषांनुसार तपासणी करून विजेत्या ग्रामपंचायतीची निवड केली आहे.

    विजेत्या ग्रामपंचायती

    प्रथम क्रमांक- बक्षीस १० लाख रुपये - लोखंडेवाडी, ता. दिंडोरी, जि. नाशिक

    द्वितीय क्रमांक (विभागून)- बक्षीस ८ लाख रुपये- कडवान लहान (ता. नवापूर, जि. नंदुरबार) आणि चिंचोल (ता. मुक्ताईनगर, जि. जळगाव)

    तृतीय क्रमांक (विभागून)- बक्षीस ६ लाख रुपये- शिरसाणे (ता. चांदवड, जि. नाशिक) आणि साकुर (ता. संगमनेर, जि. अहमदनगर)

    मोबाइल अॅप डाउनलोड करा आणि राहा अपडेट


    0 0

    म. टा. वृत्तसेवा, पंचवटी

    बोरगड येथील सुमारे दोनशे एकर जागेत प्रारंभ झालेल्या निरंकारी संत समागम सोहळ्यात देशभरातील विविध भागातून आलेल्या लाखोंच्या संख्येतील भक्तगणांच्या लंगर (भोजन)ची चोख व्यवस्था करण्यात आलेली आहे. एकाच वेळी हजारो भक्तांचे भोजन तयार करण्यासाठी येथे चोवीस भव्य कढया आणि तेरा मोठे तवे वापरण्यात येत आहेत. सेवादलातील महिला आणि पुरुष यांच्या सेवाकार्यातून भोजन तयार करणे आणि आलेल्या भक्तांना ते वाढणे, ताटांची स्वच्छता करणे आदी कामे उत्स्फूर्तपणे केली जात आहेत.

    भक्तीच्या माध्यमातून सेवाभावीवृत्तीने कामे करताना प्रेम आणि त्यागाची वृत्ती या लंगरच्या माध्यमातून बघायला मिळत आहे. येथे आलेल्या भक्तांच्या मोफत भोजनाची व्यवस्था करताना भोजन शिजविताना चोवीस भव्य कढया वापरण्यात येत आहेत. एका कढईत सुमारे पाचशे किलो तांदूळ शिजविण्यात येत आहे. विविध प्रकारच्या डाळी, भाज्या आणि भात या कढयांच्या माध्यमातून शिजविण्यात येत आहे. या लोखंडी कढया सिमेंटच्या बांधकामात व्यवस्थित बसविण्यात आलेल्या असून, गॅस, तसेच डिझेलच्या इंधनावर त्या सुरू करण्याची व्यवस्था आहे.

    --

    तासाला हजार पोळ्या!

    रोटी अर्थात, पोळी बनविण्यासाठी सेवादलातील महिलांचे हजारो हात झटत आहेत. या महिला पोळ्या लाटून त्या तेरा मोठ्या तव्यांवर भाजत आहेत. एकावेळी सेवादलातील सुमारे चारशे महिला पोळ्या तयार करीत असून, एका तासाला एक हजार पोळ्या तयार होत आहेत. पोळ्या लाटणाऱ्या चारशे महिलांची बॅच दर चार तासांनी बदलत आहे. चुकून एखादी पोळी जास्त भाजून जळाली तर अशा पोळ्या फेकून दिल्या जात नाहीत, त्या बारीक करून त्यात तूप आणि गुळ घालून त्यांचे लाडू बनविण्यात येत आहेत. ते प्रसाद म्हणूनही वाटले जात आहेत. पोळ्या तयार करण्यासाठी एक मशिनही आहे. मात्र, तेवढे पुरेसे नसल्यामुळे हाताने जास्त प्रमाणात पोळ्या तयार करीत आहेत.

    --

    लाखो ताटांची व्यवस्था

    सकाळी साडेआठ ते मध्यरात्री एक वाजेपर्यंत भोजन तयार करण्यात येत आहे. भोजनासाठी लाखो ताटांची व्यवस्था असून, तसेच भोजनानंतर ही ताटे स्वच्छ करण्याचे काम सेवादलातील पुरुष करीत आहेत. सिमेंटच्या बांधकामातील तीन वेगवेगळ्या हौदांतून ही ताटे स्वच्छ करून पुढे पाठविली जातात. तेथे स्वच्छ कपड्याने ती पुसली जातात. त्यानंतर ती पुढे भोजनासाठी पाठविली जातात. भोजनासाठी स्वतंत्र मंडपाची उभारणी करण्यात आलेली आहे. त्यात बसलेल्या लाखो भक्तांना भोजन वाढण्याचे काम सेवादलाचे पुरुष करीत आहेत.

    मोबाइल अॅप डाउनलोड करा आणि राहा अपडेट


    0 0

    म. टा. खास प्रतिनिधी, नाशिक

    राज्यात भाजपचे सरकार पायउतार करून शिवसेना-काँग्रेस-राष्ट्रवादी या महाविकास आघाडीचे सरकार स्थापन करण्यात मोलाची कामगारी बजावणारे शिवसेना नेते खासदार संजय राऊत यांची आज, शनिवारी (दि. २५) नाशिकमध्ये प्रकट मुलाखत होणार आहे.

    महापालिकेतील विरोधी पक्षनेते अजय बोरस्ते यांच्या ऊर्जा युवा प्रतिष्ठानतर्फे या प्रकट मुलाखतीचे आयोजन करण्यात आले असून, मुलाखतकार राजू परुळेकर हे राऊत यांना 'बदलती शिवसेना' आणि राज्यातील विविध विषयांवर बोलते करणार आहेत. महाकवी कालिदास कलामंदिरात सायंकाळी ६ वाजता ही प्रकट मुलाखत होईल. शिवसेना नेते संजय राऊत सध्या राज्याच्या केंद्रस्थानी असून, विविध वादग्रस्त वक्तव्यांवरून ते सध्या चर्चेत आहेत. भाजपसोबत शिवसेनेचे २५ वर्षांचे संबंध तोडत त्यांनी शिवसेनेला भाजपऐवजी काँग्रेस-राष्ट्रवादी या आतापर्यंत विरोधक असलेल्या पक्षांसोबत सत्ता स्थापन करण्यात मोलाची कामगिरी पार पडली आहे. त्यामुळे दिल्ली आणि राज्यातही सध्या राऊत चर्चेत आहेत.

    नाशिकसह उत्तर महाराष्ट्रातील शिवसेनेच्या पक्षवाढीची जबाबदारी राऊतांवर असून, नाशिककरांबद्दल त्यांना विशेष प्रेम आणि आस्था आहे. राऊत यांना मानणारा मोठा वर्ग नाशिकमध्ये आहे. या पार्श्वभूमीवर राऊतांना जाणून घेण्याची संधी नाशिककरांना चालून आली आहे. यावेळी नाशिककर, तसेच शिवसेनेतर्फे राऊत यांचा जाहीर सत्कारही केला जाणार आहे. या कार्यक्रमाला उपस्थित राहणाचे आवाहन प्रतिष्ठानचे अध्यक्ष बोरस्तेंनी केले आहे.

    ---

    काय बोलणार याकडे लक्ष!

    शिवसेनेचे बदलते रूप या विषयावर राजू परुळेकर राऊतांना बोलते करणार आहेत. शिवसेनेने स्थापनेपासून स्वीकारलेली आक्रमकता काहीशी बाजूला पडली असून, शिवसेनेने थेट काँग्रेस-राष्ट्रवादीशी घरोबा केल्याने भाजप, मनसेकडून शिवसेनेवर हल्लाबोल केला जात आहे. त्याला राऊतांकडून या मुलाखतीच्या माध्यमातून उत्तर दिले जाणार आहे. त्यामुळे या मुलाखतीत राऊत काय बोलतात याकडे सर्वांचे लक्ष लागले आहे.

    मोबाइल अॅप डाउनलोड करा आणि राहा अपडेट


    0 0

    म. टा. खास प्रतिनिधी, नाशिक

    महापालिकेत स्वेच्छा निवृत्तीचे वारे घोंगावण्यास सुरुवात झाली असून, प्रभारी शहर अभियंता संजय घुगे यांनी पुन्हा एकदा स्वेच्छा निवृत्तीसाठी अर्ज प्रशासनाला सादर केल्याने खळबळ उडाली आहे. पालिकेतील सत्ताधारी भाजपच्या पदाधिकाऱ्यांकडून होणारा जाच अधिकच वाढल्याने अधिकाऱ्यांमध्ये अस्वस्थता आहे. त्यामुळे पालिकेतील जवळपास दहा अधिकारी हे स्वेच्छा निवृत्तीच्या मानसिकतेत असल्याची चर्चा आहे.

    महापालिकेत भाजपची सत्ता आल्यानंतर पहिल्या सत्रात अधिकारी व कर्मचाऱ्यांच्या स्वेच्छा निवृत्तीचे वारे आले होते. अतिरिक्त कामाचा ताण असला तरी त्यापेक्षा अधिक कामाची अपेक्षा सध्या केली जात आहे. त्यातच पदाधिकाऱ्यांकडून होणारा जाच अधिकाऱ्यांना असह्य होत चालला आहे. तत्कालीन आयुक्त तुकाराम मुंढे महापालिकेत आल्याने अधिकारी वर्ग सुखावला होता. परंतु, आता पुन्हा अधिकाऱ्यांवरील दडपण वाढल्याने स्वेच्छा निवृत्तीचे लोन पुन्हा सुरू झाले आहे. विशेष म्हणजे प्रभारी शहर अभियंता संजय घुगे यांनीच स्वेच्छा निवृत्तीसाठी अर्ज दाखल केला आहे. अतिरिक्त काम आणि पदाधिकाऱ्यांचे अवाजवी दडपण यामुळे यापूर्वी शहर अभियंता पदावर कार्यरत असलेले मोहन रानडे, अरुण उमाळे, सुनील खुने यांनी स्वेच्छा निवृत्ती घेतली होती. त्यानंतर आलेल्या यू. बी. पवार रितसर सेवानिवृत्त झाल्यानंतर प्रभारी शहर अभियंता पदाचा कार्यभार संजय घुगे यांच्याकडे होता. मुंढेंच्या काळातही त्यांनी स्वेच्छनिवृत्तीचे प्रयत्न केले होते. आता पुन्हा १३ जानेवारी रोजी स्वेच्छा निवृत्तीचा घुगेंनी अर्ज सादर केला आहे. त्यामुळे या अर्जावर आता महासभा काय निर्णय घेते, याकडे लक्ष लागून आहे.

    मोबाइल अॅप डाउनलोड करा आणि राहा अपडेट


    0 0

    म. टा. खास प्रतिनिधी, नाशिक

    बोरगड येथे भरलेल्या निरंकारी संत समागमात सहभागी भाविकांच्या आरोग्याची पुरेपूर काळजी सेवेकऱ्यांकडून घेतली जाते आहे. त्यांच्या आरोग्यविषयक तक्रारी दूर करण्यासाठी फिजिओथेरपी कक्ष, बाह्य रुग्ण विभागापासून अगदी रुग्णाला दाखल करून घेण्यापर्यंतची सुविधा येथे नि:शुल्क उपलब्ध करून देण्यात आली आहे. ताण गेला.. शीण गेला.. अवघा झाला आनंद... असे भाव येथे उपचार घेणाऱ्यांच्या चेहऱ्यांवर उमटत आहेत.

    संत निरंकारी मंडळातर्फे आयोजित बोरगड येथील ठक्कर मैदानावरील समागमासाठी गरिबांपासून श्रीमंतांपर्यंत सर्व स्तरांतील भाविक नाशिकमध्ये दाखल झाले आहेत. बदलते वातावरण, दूरवरचा प्रवास यासह कोणत्याही कारणामुळे शारीरिक तक्रारी उद्भवू शकतात. अशा तक्रारींवर वेळीच उपचार करून त्यांना आवश्यक ती औषधे मोफत पुरविण्याची सेवा येथे उपलब्ध करून देण्यात आली आहे. दररोज साधारत: चार ते पाच हजार भाविक या सेवेचा लाभ घेत आहेत.

    --

    तज्ज्ञ डॉक्टरांद्वारे उपचार

    बाह्य रुग्ण विभागापासून अगदी कान, नाक, घसातज्ज्ञ, बालरोगतज्ज्ञ, दंतरोगतज्ज्ञ, हृदयविकारतज्ज्ञ यांसारख्या तज्ज्ञ डॉक्टरांद्वारे विविध प्रकारच्या शारीरिक तक्रारींवर येथे नि:शुल्क उपचार करण्यात येत आहेत. याशिवाय त्यांना येथेच डॉक्टरांच्या सल्ल्याने मोफत औषधेही उपलब्ध करून देण्यात येत आहेत. सलाईन व तत्सम उपचारांची गरज असलेल्या भाविकांना दाखल करून घेण्यासाठी ५० बेडची व्यवस्थाही येथे करण्यात आली आहे. राज्याच्या विविध भागातून आलेले डॉक्टर्स, परिचारिका येथे नि:स्वार्थ भावनेने सेवा देत आहेत. याशिवाय होमिओपॅथी, फिजिओथेरपी यांसारख्या सेवाही येथे उपलब्ध करून देण्यात आल्या आहेत. या सेवांचा लाभ घेण्यासाठी येथे भाविकांची गर्दी पाहावयास मिळत आहे.

    --

    २५० परदेशी भाविकांची नोंदणी

    या संत समागमासाठी केवळ देशातूनच नव्हे, तर परदेशांतूनही भाविक आले आहेत. युरोप, अमेरिका, कॅनडा यांसारख्या देशांमधून आतापर्यंत २५० भाविक दाखल झाले आहेत. त्यांची निवासाची व्यवस्थाही याच परिसरात करण्यात आली आहे. आतापर्यंत २५० परदेशी भाविकांची नोंदणी येथे करण्यात आली असून, पुढील दोन दिवसांत ही संख्या आणखी वाढणार असल्याची माहिती नियोजन समितीच्या वतीने देण्यात आली.

    मोबाइल अॅप डाउनलोड करा आणि राहा अपडेट


    0 0

    भारताची विकासनिती चुकीची

    अर्थतज्ज्ञ अच्युत गोडबोले यांचे प्रतिपादन

    म. टा. प्रतिनिधी, नाशिक

    भारताने निवडलेली विकासनिती चुकीची असून त्यामुळे बेरोजगारी, प्रदुषण व विषमता यामध्ये सातत्याने वाढ होत आहे. या विकासनितीमध्ये बदल करण्याची आवश्यकता असल्याचे प्रतिपादन ज्येष्ठ अर्थतज्ज्ञ अच्युत गोडबोले यांनी केले. नाशिक जिल्हा सरकारी व परिषद कर्मचारी बॅँकेच्या सुवर्ण महोत्सवी वर्षानिमित्त आयोजित व्याख्यानमालेच्या सामारोपप्रसंगी ते बोलत होते.

    परशुराम साईखेडकर नाट्यगृह येथे शुक्रवारी झालेल्या व्याख्यानाचा 'शिक्षण, आरोग्य बेरोजगारी' हा विषय होता. यावेळी गोडबोले म्हणाले की, भारत हा अॅटोमेशनच्या मागे लागलेला देश असून त्यामुळे बेरोजगारीचा राक्षस समोर उभा राहिला आहे. आज अनेक शहरांमधील युवक नोकऱ्यांच्या प्रतीक्षेत आहेत. या अर्थव्यवस्थेने सर्व सामान्य लोकांना गृहीत धरले आहे. त्यांच्या उदरनिर्वाहाचा या व्यवस्थेत कुठेही विचार केलेला आढळत नाही. या अर्थव्यवस्थेची घडी, आज विस्कळीत झालेली नाही. ती १९९१ पासून खालावत चालली आहे. आम्ही जागतिकीकरणाच्या मागे लागलो आहेत. याला आमचा विरोध नाही, मात्र विकास होताना तो सर्वाच्या उपयोगी पडला पाहिजे असे आमचे म्हणणे आहे. कुणा एका व्यक्तीला हाताशी धरुन राष्ट्राचा विकास होत नसतो. बेकारी, प्रदुषण आणि विषमता हा फोफावत चाललेला रोग आहे. आज भारतात बेकारीचा राक्षस निर्माण झाला आहे. मानवनिर्मित प्रदुषणाने हाहाकार माजवला आहे. कोल्हापूर, सांगली, पुणे परिसरात चेरापुंजी सारखा पाउस पडतो आहे. शेकडो लोक मृत्युमुखी पडता आहेत हे प्रदुषणाचे लक्षण आहे. याला मानवच जबाबदार आहे. आज अॅमेझॉनच्या जंगलाला आग लागली आहे. शेकडो प्राणी मृत्यूमुखी पडत आहेत. वातवरण बदलाचा तांडव सुरु आहे. संपूर्ण जग जी़डीपी वाढीच्या मागे लागले आहे असे ते म्हणाले. यावेळी उपस्थितांच्या हस्ते दिपप्रज्वलन करण्यात आले. यावेळी मोठ्या संख्येने कर्मचारी, ठेविदार, नागरिक उपस्थित होते.

    मोबाइल अॅप डाउनलोड करा आणि राहा अपडेट


    0 0

    देवळाली बंद यशस्वी

    देवळाली कॅम्प : वंचित बहुजन आघाडीने पुकारलेल्या बंदला देवळालीतील व्यापाऱ्यांसह नागरिकांनी शंभर टक्के प्रतिसाद दिला.

    बहुजन विकास आघाडीचे रामदास निकम, शहराध्यक्ष लखन डांगळे, उपशहराध्यक्ष विक्रम पगारे, विशाल काळे, मोसीन शेख, अतिष साळवे, हुजेफ शेख, अजिंक्य भवार आदींसह कार्यकर्त्यांनी आवाहन केले होते.

    मोबाइल अॅप डाउनलोड करा आणि राहा अपडेट


    0 0

    करंजगव्हाण येथील भावेशने मागितली होती सुट्टी

    म. टा. वृत्तसेवा, मालेगाव

    सध्या बॉक्स ऑफिसवर हिट असलेला तानाजी सिनेमा पाहायला मिळावा म्हणून तालुक्यातील करंजगव्हाण येथील बालसंस्कार सेमी इंग्लिश स्कूल मध्ये शिकत असलेल्या भावेश पापालाल रहाड या विद्यार्थ्याने सुट्टी मिळावी यासाठी अर्ज केला होता. सोशल मीडियावर हा अर्ज चांगलाच व्हायरल झाला होता. 'मटा'नेही त्याचे सविस्तर वृत्त प्रकाशित केले होते. भावेशच्या 'त्या' सुट्टीच्या अर्जामुळे मात्र तानाजी सिनेमा शाळेतील सगळ्याच विद्यार्थ्यांना दाखवण्याचा निर्णय मुख्याध्यापक किरण शिंदे यांनी घेतला आणि शुक्रवारी (दि. २४) २०० हून अधिक विद्यार्थ्यांनी मालेगावी थ्रीडी इफेक्टमध्ये हा सिनेमा पहिला.

    भावेश तानाजी मालुसरे यांच्याविषयी वाचले होते. त्याने वडिलांकडे हा सिनेमा पाहण्यासाठी हट्ट केला होता. शाळेतून यासाठी सुटी मिळावी म्हणून त्याने केलेला अर्ज चांगलाच व्हायरल झाला होता व शाळेने सुटी देखील देऊ केली होती. मात्र छत्रपती शिवाजी महाराजांच्या स्वराज्य स्थापनेच्या कार्यातील तानाजीचे योगदान विद्यार्थ्यांना कळावे यासाठी मुख्याध्यापक शिंदे व शिक्षकांनी सर्वच विद्यार्थ्यांना हा सिनेमा दाखवण्याचा निर्णय घेतला. भावेशच्या त्या पत्राने सर्वच विद्यार्थ्यांना तान्हाजी सिनेमागृहात पाहण्याची संधी मिळाली.

    शुक्रवारी सकाळी १० वाजता ही मुले मालेगावी आली होती. विशेष म्हणजे सिनेमा सुरू होण्यापूर्वी पारंपरिक वेशभूषा करून, नरवीर तानाजी असे फलक हाती घेत विद्यार्थ्यांनी सिनेमातील गाण्यावर नृत्य सादर करून उपस्थित प्रेक्षकांचे लक्ष वेधून घेतले.

    मोबाइल अॅप डाउनलोड करा आणि राहा अपडेट


    0 0

    म. टा. खास प्रतिनिधी, नाशिक

    तत्कालीन आयुक्त तुकाराम मुंढे यांनी करवाढ रद्द करण्यासंदर्भातील महासभेचा ठराव दप्तरी दाखल करण्याच्या निर्णयावर शुक्रवारी (दि. २४) उच्च न्यायालयात सुनावणी झाली. मनपा अधिनियम ४५१ चा वापर न करता आयुक्तांनी कोणत्या अधिकारात ठराव दप्तरी दाखल केला याची विचारणा न्यायालयाने राज्य शासनाकडे केली आहे.

    करवाढ रद्द करण्याचा ठराव मुंढे यांनी राज्य शासनाकडे कलम ४५१ अंतर्गत विखंडित करण्यासाठी पाठवणे अपेक्षित होते. प्रत्यक्षात मुंढे यांनी ठराव दप्तरी दाखल करून घेत आपल्याच निर्णयाची अंमलबजावणी केली होती. त्याला न्यायालयात आव्हान देण्यात आले असून, मुंढे यांनी कोणत्या अधिकारात आपल्याच निर्णयाची अंमलबजावणी केली याचा जाब न्यायालयाने विचारला आहे. त्या संदर्भातील माहिती २८ जानेवारीला न्यायालयात सादर करण्याचे निर्देश न्यायमूर्ती कोथावाला यांच्या पीठाने दिले आहेत. याचिकाकर्त्यांच्या वतीने अॅड. संदीप शिंदे यांनी बाजू मांडली.

    मोबाइल अॅप डाउनलोड करा आणि राहा अपडेट


    0 0

    महिलेस आत्महत्या करण्यास भाग पाडल्याचे प्रकरण

    ...

    म. टा. वृत्तसेवा निफाड

    महिलेस आत्महत्या करण्यास प्रवृत्त केल्याप्रकरणी गुन्हा दाखल असलेल्या संशयित आरोपीचा शोध घेण्यासाठी ग्रामीण पोलिसांची पथके रवाना झाली आहेत. या प्रकरणी इंदिरानगर पोलिस ठाण्याचे वरिष्ठ पोलिस निरीक्षक महेंद्र चव्हाण, सहायक पोलिस निरीक्षक जगताप यांच्यासह महिलेचे पती बाळू जाधव आदींविरोधात गुन्हा दाखल करण्यात आला आहे.

    पीडित महिला ज्योती जगधने यांनी आठ दिवसांपूर्वी चांदोरी येथील गोदावरी नदीत उडी घेऊन आत्महत्या केली होती. घटनास्थळावर सापडलेल्या महिलेच्या डायरीत तिच्यावर झालेल्या अत्याचारासह आत्महत्या करण्यास भाग पाडणाऱ्या वरील संशयित आरोपींची नावे नमूद करण्यात आली होती. इंदिरानगर पोलिस ठाण्याचे पोलिस निरीक्षक चव्हाण व सहाय्यक जगताप यांनी सहाय्य न करता मानसिक त्रास दिला. आरोपींना अटक करणार नाही, अशी भूमिका महिलेसह तिच्या काकांपुढे स्पष्टपणे मांडण्यात आली. यामुळे ज्योती जगधने या मनाने खचल्यात. त्याच कारणातून त्यांनी आत्महत्या केल्याचे सकृतदर्शनी दिसून आले. या प्रकरणी महिलेच्या चुलत्याने दिलेल्या तक्रारीनुसार सायखेडा पोलिस स्टेशनमध्ये आत्महत्येस प्रवृत्त केल्याप्रकरणी गुन्हा दाखल करण्यात आला आहे. सूत्रांनी दिलेल्या माहितीनुसार आरोपींना अटक करण्यासाठी आवश्यक असलेले पुरावे संकलीत केले जात असून, दुसरीकडे संशयितांच्या शोधासाठी पथके रवाना करण्यात आली आहेत. दरम्यान, चव्हाण आणि जगताप यांनी अटकपूर्व जामिनासाठी अर्ज केल्याचे समजते.

    ..

    पोलिसांकडून टाळाटाळ

    पोलिस सूत्रांकडून मिळालेल्या माहितीनुसार मृत महिलेला गुंगीचे औषध देऊन बाळू गिरीधर जाधव याने तिच्यावर बलात्कार केला. त्याचे शूटिंग करून ते तिच्या पतीच्या मोबाइलवर पाठवले. त्यामुळे महिलेला पतीने बाहेर काढून दिले. सप्टेंबर महिन्यातील हा प्रकार असून, यानंतर ती नाशिक येथील रचना ट्रस्ट येथे राहण्यासाठी आली. कौटुंबिक हिंसाचार आणि बलात्काराची तक्रार देण्याचा प्रयत्न महिलेने केला. मात्र, इंदिरानगर पोलिसांनी महिलेकडे दुर्लक्ष केले. महिलेने हायकोर्टात पाठपुरावा केला. कोर्टाने महिलेच्या बाजूने कौल दिला. मात्र यानंतरही इंदिरानगर पोलिसांनी आरोपींना अटक करण्यास टाळाटाळ केली.

    मोबाइल अॅप डाउनलोड करा आणि राहा अपडेट


    0 0

    जनतेसमोर श्वेतपत्रिका ठेवा, भुजबळांचा सत्ताधाऱ्यांना सल्ला

    ...

    म. टा. खास प्रतिनिधी, नाशिक

    शहर बससेवेची प्रक्रिया अंतिम टप्प्यात असून, पालिका खूप पुढे गेली आहे, करार रद्द केल्यास ठेकेदाराला ८० टक्के रक्कम द्यावी लागणार असल्याचे गाऱ्हाणे भाजपच्या सत्ताधाऱ्यांनी शनिवारी नगरविकास मंत्री एकनाथ शिंदे आणि पालकमंत्री छगन भुजबळ यांच्यासमोर मांडले. तर, बससेवेमुळे वर्षाला ५५ कोटींचा तोटा होणार आहे, ८० कोटी पायाभूत सुविधांवर खर्च होणार आहेत. त्यामुळे तुमच्याकडे अन्य विकासकामांसाठी पैसे शिल्लक राहणार का, असा सवाल भुजबळांनी उपस्थित केला असून, बसमुळे होणाऱ्या आर्थिक नुकसानीची माहिती जनता आणि महासभेसमोर ठेवा, मग काय निर्णय घ्यायचा तो घ्या असा सल्लाच महापौर, आयुक्तांना दिला आहे. त्यामुळे बससेवेचे त्रांगडे कायम आहे.

    राज्यात सत्तांतर झाल्यामुळे माजी मुख्यमंत्री देवेंद्र फडणवीस यांची शहर बससेवा राज्य शासन आणि महापालिकेच्या वादामुळे अडकण्याची चिन्हे निर्माण झाली आहेत. पालिकेची आर्थिक स्थिती चांगली नसल्याने छगन भुजबळांनी बससेवेबाबत अभ्यास करून निर्णय घेण्याचा सल्ला दिला होता. तरीही सत्ताधारी भाजपने बससेवेला डबलबेल दिली आहे. त्यामुळे संतप्त भुजबळांनी शुक्रवारी नगरविकास मंत्री शिंदे यांच्याकडे बससेवेबाबत बैठक आयोजित केली होती. त्यामुळे शिंदे, भुजबळ यांच्या उपस्थितीत शनिवारी महापौर सतीश कुलकर्णी, स्थायी समिती सभापती उद्धव निमसे, सभागृहनेता सतीश सोनवणे, गटनेता जगदीश पाटील, आयुक्त राधाकृष्ण गमे यांची बैठक झाली. या बैठकीत कुलकर्णी आणि निमसेंनी बससेवेबाबत माहिती देत, महापालिका बससेवेबाबत खूप पुढे गेल्याचा दावा केला. तसेच आता करार रद्द केला, तर ठेकेदाराला ८० टक्के रक्कम द्यावी लागणार आहे. ती रक्कम राज्य शासन देत असेल तर ठेका रद्द करता येईल असा दावा केला. त्यावर भुजबळांनी पदाधिकाऱ्यांचीच मग शाळा घेतली. या बससेवेमुळे महापालिकेला वर्षासाठी ५५ कोटींचा तोटा येणार आहे. प्रतिबस महापालिकेला दररोज ठेकेदाराला १३ हजार रुपये देणे आहे. ८० कोटी रुपये पायाभूत सुविधांवर खर्च करावे लागणार आहेत. त्यामुळे मनपा एवढा आर्थिक खर्च सहन करणार का, असा जाब त्यांनी पदाधिकाऱ्यांना विचारला. या प्रकल्पामुळे रस्ते, वीज, पाणीसह अन्य नागरी सुविधांवर परिणाम होणार नाही का, अशी उलटतपासणी केली. त्यामुळे पदाधिकारी निरुत्तर झाले. प्रकल्पातील तोटा डोळ्यादेखत असून, त्यानंतरही तुम्हाला मंजूरच करायचा असेल तर मात्र प्रथम शहराचे विश्वस्त असलेल्या नगरसेवकांसमोर ही आकडेमोड करा. त्यासाठी महासभा बोलवा, त्यांच्यासमोर तोटा सादर करा, मगच काय तो निर्णय घ्या अशा शब्दात सत्ताधाऱ्यांना भुजबळांनी सुनावल्याचे समजते. दरम्यान, शिंदेंनी केवळ निवेदन घेऊन या बैठकीतून पाय काढल्याचे समजते.

    ...

    महापालिका बससेवेबाबत पुढे गेली असून, ठेका रद्द केला तर ठेकेदाराला ८० टक्के रक्कम द्यावी लागणार असल्याचे भुजबळांच्या लक्षात आणून दिले. त्यामुळे भुजबळांनी माझा बससेवेला विरोध नसल्याचे सांगत तुम्हीच निर्णय घ्या असे सांगितले आहे.

    - सतीश कुलकर्णी, महापौर, नाशिक

    ...

    बससेवेमुळे होणारा आर्थिक तोटा हा महासभा आणि जनतेसमोर ठेवण्याचा सल्ला मी पदाधिकारी आणि आयुक्तांना दिला आहे. बससेवेच्या खर्चामुळे अन्य सुविधांवर ताण येऊ नये, याची काळजी सत्ताधाऱ्यांनी घ्यावी. मगच काय तो निर्णय घ्यायला हवा.

    - छगन भुजबळ, पालकमंत्री

    मोबाइल अॅप डाउनलोड करा आणि राहा अपडेट


    0 0

    आदिवासी विभागाची भ्रष्टाचार प्रकरणी कारवाई

    म. टा. खास प्रतिनिधी, नाशिक

    आदिवासी विभागातील भ्रष्टाचार प्रकरणी नियुक्त केलेल्या न्या. गायकवाड समितीच्या अहवालानुसार, आदिवासी विभागाने भ्रष्टाचारात सहभागी असलेल्या १०५ पुरवठादार व स्वयंसेवी संस्थांना काळ्या यादीत टाकले आहे. यात नाशिकमधील चार संस्थांचा समावेश आहे. त्यांच्यावर भ्रष्टाचार प्रकरणी गुन्हा दाखल होण्याची शक्यता आहे.

    राज्यात २००४ ते २००९ या काळात आदिवासींसाठी राबविण्यात आलेल्या योजनांमध्ये कोट्यवधींचा भ्रष्टाचार झाला होता. तत्कालीन आदिवासी मंत्री व विद्यमान भाजप आमदार डॉ. विजयकुमार गावित यांच्यावर भ्रष्टाचाराचे आरोप झाले होते. याप्रकरणी थेट उच्च न्यायालयात याचिका दाखल करून पुरावे सादर करण्यात आले. न्यायालयाने न्या. गायकवाड समिती स्थापन करून चौकशीचे आदेश दिले. या समितीने चार वर्षे चौकशी केल्यानंतर जवळपास ७८ कोटींचा भ्रष्टाचार झाल्याचे मान्य केले. समितीने अनेक बड्या अधिकाऱ्यांसह राजकीय नेत्यांवर ठपका ठेवला होता. परंतु, फडणवीस सरकारने यात भाजपचे पदाधिकारी अडकणार असल्याने चौकशी अहवाल दडपला होता. त्यामुळे याचिकाकर्त्यांनी न्यायालयात धाव घेतली. न्यायालयाने थेट प्रधान सचिव मनीषा वर्मा यांची झाडाझडती घेतली. तसेच कारवाईचा अहवाल २७ जानेवारीपर्यंत सादर करण्याचे आदेश दिले. त्यानंतर विभागाने पहिल्या टप्प्यात २१ कनिष्ठ अधिकाऱ्यांचे निलंबन केले होते. त्यानंतर आता या भ्रष्टाचारात सहभागी असलेल्या १०५ ठेकेदार आणि त्यांच्या संस्थांना काळ्या यादीत टाकले आहे. त्यामुळे या संस्थांना आता कोणतेही शासकीय काम यापुढे मिळणार नसल्याचे चित्र आहे. विशेष म्हणजे यातील बहुतांश संस्था या राजकीय नेत्यांशी संबधित आहेत.

    नाशिकमधील पाच संस्था

    आदिवासी विभागाने काळ्या यादीत टाकलेल्या १०५ ठेकेदार संस्थामध्ये नाशिकमधील पाच संस्थांचा समावेश आहे. यात नाशिक शहरातील सायन्स अॅकॅडमी, करियर अॅकॅडमी, जोशाबा स्वयंरोजगार संस्था, एमडी डीएसएच कन्स्ट्रक्शन कंपनी तसेच ग्रामीण शिक्षण संस्था, तळवडे (ता. मालेगाव) यांचा समावेश आहे.

    मोबाइल अॅप डाउनलोड करा आणि राहा अपडेट


    0 0

    क्षण कसोटीचे

    अद्दल घडली

    संदीप खिस्ते, निफाड

    का कुणास ठाऊक पण सचिनच्या वडिलांना आम्ही खरेच अभ्यास करत आहोत का हे बघावेसे वाटले व ते शेतांमधून लपत-लपत आमच्या दिशेने येऊ लागले. आम्ही सगळे खेळात मग्न असताना त्यांनी झाडाआडून आमची गंमत पहिली.

    -----

    सचिन, अनिल, दत्तू आणि मी आम्ही जिवाभावाचे मित्र होतो. एकाच शाळेत आणि एकाच वर्गात असल्याने आम्ही सोबत शाळेत जायचो. आमच्या चौघांमध्ये हे तिघे तसे खोडकर होते. मी शिक्षकाचा मुलगा व अभ्यासात हुशार असल्याने या तिघांचा व त्यांच्या घरच्यांचा माझ्यावर विश्वास होता. त्यामुळे त्यांच्या घरच्यांनी त्यांना कधी माझ्यासोबत जाण्या येण्यास मनाई केली नाही. माझ्याबरोबर राहिल्याने तेही अभ्यासात हुशार होतील असा त्यांना विश्वास होता.

    आम्ही सहावी किंवा सातवीत असू तेव्हाचा हा प्रसंग. मार्च महिन्याचे दिवस होते. उन्हाळा चांगलाच कडक जाणवत होता. आमच्या सर्वांची घरे पत्र्याच्या छपराची असल्याने दुपारी घरात खूप उकडायचे. त्यात वार्षिक परीक्षाही जवळ आलेली होती. आमच्या पिंपरी गावालगत चिंचेची दाट झाडे हाती. त्या ठिकाणी दुपारी थंडगार सावली असायची. माझ्या या ३ मित्रांनी दुपारी त्या ठिकाणी अभ्यासासाठी जाण्याचा बेत आखला. घरच्यांचा विरोध होऊ नये म्हणून त्यांनी मलाही सोबत घेतले आणि घरच्यांची मर्जी जिंकली.

    पहिल्या दिवशी आम्ही पुस्तके, नवनीत वगैरे घेऊन चिंचेच्या बनात अभ्यासाला निघालो. तिथे गेल्यावर झाड्याच्या फांद्यावर बसून अभ्यास करायचे ठरले. प्रत्येक जण वेगवेगळ्या फांद्यांवर जाऊन वाचन करायला लागलो. थोड्यावेळाने हळुच तिघांनी खिशातून मीठ काढून चिंचा खायला सुरुवात केली. नंतर ते खाली उतरून सुरपारंब्या खेळायला लागले. मी त्यांचे मन अभ्यासाकडे वळविण्याचा प्रयत्न केला. नंतर मी पण त्यांच्या खेळात रमलो. ऊन थोडे कमी झाल्यावर आम्ही घराकडे परतलो आणि घरच्यांना तिथे कशाप्रकारे चांगला अभ्यास होतो ते खोटे-खोटे सांगू लागलो.

    दुसऱ्या दिवशी पुन्हा दुपारी आम्ही अभ्यासाचे निमित्त करून चिंचेच्या बनाकडे निघालो. तिथे गेल्यावर आदल्या दिवशीप्रमाणेच खेळ खेळायला लागलो. का कुणास ठाऊक पण सचिनच्या वडिलांना आम्ही खरेच अभ्यास करत आहोत का हे बघावेसे वाटले व ते शेतांमधून लपत-लपत आमच्या दिशेने येऊ लागले. आम्ही सगळे खेळात मग्न असताना त्यांनी झाडाआडून आमची गंमत पहिली. त्यांनी झाडाची एक काठी उचलली व गपचूप आमच्यासमोर येऊन उभे राहिले. आम्हाला काय करावे, काय बोलावे काहीच उमजेना. त्यांनी त्या काठीने आम्हाला चांगलाच चोप दिला. आम्ही रडत-रडतच आपापल्या घरी परतलो. घरी आल्यावर पुन्हा घरच्यांचा ओरडा व मार मिळाला. आम्हाला चांगलीच अद्दल घडली होती. त्या दिवसापासून आम्ही पुन्हा कधीही एकत्र येऊन अभ्यास करण्याचा प्रयत्न केला नाही.

    मोबाइल अॅप डाउनलोड करा आणि राहा अपडेट


    0 0

    ३८ सायकलवीरांनी कापले १४०० किलोमीटर अंतर

    म. टा. वृत्तसेवा, पंचवटी

    कादंबरीकार विश्वास पाटील यांच्या 'पानिपत' कादंबरीवरून प्रेरणा घेत पानिपत ते नाशिक अशी तब्बल १४०० किलोमीटरची सायकल रॅली ३८ सायलिस्टनी अवघ्या नऊ दिवसांत यशस्वीपणे पूर्ण केली. प्रतिकूल हवामानात ही मोहीम यशस्वी केल्याबद्दल सायकलिस्टचे पंचवटी कारंजा येथे जल्लोषात स्वागत करण्यात आले.

    सायकलिस्ट डॉ. आबा पाटील यांनी तीन वर्षांपूर्वी या मोहिमेचा विचार केला होता. १४ जानेवारी १७६१ रोजी पानिपतचे तिसरे युद्ध झाले. त्यात आपले वंशज हरले. त्यांना अभिवादन करून पानिपत ते नाशिक अशी सायकल रॅली पूर्ण करण्याचा या वेळी प्रण करण्यात आला. त्यानुसार सूक्ष्म नियोजनास सुरुवात करण्यात आली. पहिल्याच बैठकीत ११ सायकलिस्ट होते. रोज सकाळी सहा वाजता राष्ट्रगीत व मराठा स्फूर्तिगीत गाऊन मोहीम सुरू व्हायची. रोज सरासरी १६० किलोमीटरचे अंतर पार केले. दोन दिवस १८० किलोमीटर अंतर कापले.

    सुरुवातीच्या सात दिवसांत तर ३ ते ४ डिग्री तापमान होते. त्या वेळी दाट धुक्याचा सामना करावा लागला. शेवटचे दोन दिवस कडाक्याचे ऊनवारा आणि चढा यांचा सामना केला. महाराष्ट्रात पाऊल ठेवताच मातीचा सुगंध दरवळला आणि थकवा नाहीसा झाला, अशी भावना डॉ. पाटील यांनी व्यक्त केली. १४ जानेवारी रोजी सुरू झालेला हा सायकल प्रवास २२ जानेवारी रोजी सायंकाळी सहाला नाशिक येथील पंचवटी कारंजा येथे थांबला.

    ही मोहीम सुरू करताना रामशेजचा किल्ल्यावरून माती आणि रामकुंडाचे जल नेण्यात आले होते. ते पानिपत येथील कालाआम स्मारकावर अर्पण करण्यात आले. पानिपत युद्धाच्या प्रसंगी आंब्याचे झाड तोफांमुळे काळे पडले होते, म्हणून त्याला कालाआम नाव पडले आहे. मोहिमेच्या सुरुवातीला बाजीराव मस्तानीचे वंशज शादब अली बहाद्दर, उदोजी राजेभोसले, पानिपतचे संघटक वीरेंद्र मराठा, राजबीर चोपडे यांच्या उपस्थितीत ध्वज दाखविण्यात आला. मातीचे आदानप्रदान करण्यात आले. कालाआम ते काळाराम अशी ही मोहीम पूर्ण झाली.

    सायकल रॅलीतून पानिपतचा इतिहास लोकांपर्यंत पोहोचावा, हा उद्देश सफल झाला. महाराष्ट्रातून पानिपतला गेलेले मराठे हरले तर महाराष्ट्रातून सायकलिंग करीत पानिपत जिंकून मराठे आले, हा इतिहास आम्ही दाखविला.

    - डॉ. आबा पाटील, सायकलिस्ट

    मोबाइल अॅप डाउनलोड करा आणि राहा अपडेट


    0 0

    नाशिक : शालेय स्तरावर मुलींच्या क्रीडा क्षेत्रातील प्रगतीला महाविद्यालयीन पातळीवर खीळ बसते. थोडक्यात म्हणजे, मुलींचा खेळातील सहभाग कमी होत जातो. हा सहभाग कमी होऊ नये, त्याचा आलेख चढता राहावा, यासाठी महाराष्ट्र सरकारच्या क्रीडा व युवक सेवा संचालनालयाने 'गो-गर्ल-गो' मोहीम नुकतीच सुरू केली आहे. या मोहिमेद्वारे मुलींना खेळात टिकवून ठेवण्यावर भर दिला जाणार आहे.

    सविस्तर वृत्त...९

    मोबाइल अॅप डाउनलोड करा आणि राहा अपडेट