भरधाव वेगात जाणाऱ्या टेम्पो ट्रॅक्सचे टायर फुटून झालेल्या अपघातात चालकाचा मृत्यू झाला. गिरणारे रोडवर शनिवारी सकाळी १० वाजेच्या सुमारास हा अपघात झाला. यात १२ जण जखमी झाले असून, त्यांच्यावर सिव्हिल हॉस्पिटलमध्ये उपचार सुरू आहेत.
अर्जुन सोळे (वय ४५) असे मृत्युमुखी पडलेल्या व्यक्तीचे नाव आहे. त्र्यंबकेश्वर तालुक्यातील जातेगाव येथून १० ते १२ नागरिक व काही मजूर हे गिरणारे येथे जाण्यासाठी टेम्पो चालक सोळे यांच्या वाहनांत बसले होते. गिरणारे रस्त्याने हा टेम्पो जात असताना ड्रायव्हरच्या पुढील भागाजवळील टायर फुटले. यामुळे टेम्पो ट्रॅक्स (एमएच ११ एके २०६३) उलटला. यात टेम्पोच्या कॅबिनमध्ये दबल्याने वाहनचालक सोळेचा जागीच मृत्यू झाला. या घटनेची माहिती मिळाल्यानंतर पोलिसांनी मदतकार्य सुरू केले. सर्व जखमींवर सिव्हिल हॉस्पिटलमध्ये उपचार सुरू आहेत. या अपघातात परशुराम साळधावे, रामदास जामू सोळे, भीमा गणपत पवार, भास्कर राजाराम
पवार, यादव मारूती वाघेरे, शंकर पवार, कृष्णा मोहन लोखंडे, अंबादास रायडे, दीपक वाघेरे हे जखमी झाले आहेत. या अपघाताबाबतच अधिक तपास सहायक पोलिस निरीक्षक सोलंके करीत आहेत.
मोबाइल अॅप डाउनलोड करा आणि राहा अपडेट
