घनकचरा आणि सांडपाण्यामुळे मृतवत बनत चाललेल्या नंदिनी नदीचे पुनरुज्जीवन करण्याचा निर्धार शुक्रवारी याच नदीकाठी एका सभेत करण्यात आला. महाराष्ट्र टाइम्स आणि टाइम्स ऑफ इंडियाच्या पुढाकाराने घेण्यात येत असलेल्या या उपक्रमाला महापालिका प्रशासनासह नगरसेवक, सामाजिक संस्थांनी पुरेपूर पाठबळ देण्याचा संकल्प सोडला. नंदिनीची रुपडं खुलविणारी ही मोहीम लवकरच हाती घेण्यात येणार आहे.
नाशिकमधील सुजाण आणि चिकित्सक वाचकांचा भरघोस प्रतिसाद महाराष्ट्र टाइम्सचे शक्तिस्थान राहिले आहे. सामाजिक बांधिलकीचे भान जपणाऱ्या आणि विधायक उपक्रमांना बळ देणाऱ्या महाराष्ट्र टाइम्सने नासर्डी नाला बनलेल्या नंदिनी नदीला तिचे पूर्ववैभव प्राप्त करून देण्याचा संकल्प सोडला आहे. याच उपक्रमाला पुढे घेऊन जाण्यासाठी शुक्रवारी (दि. ३ जून) एका तिडके कॉलनीतील ऋग्वेद मंगल कार्यालयात एका विशेष बैठकीचे आयोजन करण्यात आले होते. या बैठकीला महापौर अशोक मुर्तडक, उपमहापौर गुरमित बग्गा, सभागृह नेत्या सुरेखा भोसले, भाजपचे गटनेते सतीश कुलकर्णी, सातपूर प्रभाग समितीच्या सभापती सविता काळे, नाशिक पश्चिमचे सभापती शिवाजी गांगुर्डे, महापालिकेचे अतिरिक्त आयुक्त जीवन सोनवणे यांच्यासह अनेक नगरसेवक, सामाजिक संस्थांचे पदाधिकारी उपस्थित होते.
अस्वच्छतेमुळे नंदिनीला प्राप्त झालेल्या बकाल रुपाकडे उपस्थित सर्वांचेच लक्ष वेधण्यात आले. बेळगाव ढगा ते टाकळी असा नंदिनीचा उगम ते संगमापर्यंतच्या प्रवास असून प्रत्येक टप्प्यावर नदीला प्रवाहीत करून तिला पुनर्वैभव प्राप्त करून देण्याचा संकल्प 'मटा' चे निवासी संपादक शैलेंद्र तनपुरे यांनी व्यक्त केला. नाशिककरांच्या जिव्हाळ्याचा आणि शहराच्या सौंदर्यात, भर घालणारा उपक्रम 'मटा' ने हाती घेतल्याबद्दल उपस्थित सर्वांनीच मनस्वी आनंद व्यक्त केला. या उपक्रमाचे शिवधनुष्य मटा आणि टाइम्स ऑफ इंडिया ही दैनिकच पेलू शकतात, असा विश्वास यावेळी व्यक्त केला. पर्यावरणप्रेमी राजेश पंडित आणि सुनील मेंढेकर यांनी दक्षिण कोरियाच्या सेऊल शहरातील चेआँग्येचेऑन नदीचे स्वच्छता मोहीमेद्वारे पालटलेले रुप प्रेझेंटेशनद्वारे सादर केले. त्यानंतर बेळगाव ढगा ते टाकळी या दरम्यान नंदिनीच्या झालेल्या वाताहतीची माहिती देण्यात आली.
यांची होती उपस्थिती या उपक्रमाला पाठबळ देण्यासाठी नगरसेवक गुलजार कोकणी, राहुल दिवे, यशवंत निकुळे, राजेंद्र महाले, याखेरीज रंजन ठाकरे, कैलास मोरे, मायको कामगार संघटनेचे प्रवीण पाटील, ऑर्ट ऑफ लिव्हींगचे विजय हाके, सीताराम ठोंबरे, प्रकाश चव्हाण, अॅड. मुग्धा सापटनीकर, नितीन हिंगमिरे, अॅड. शिरीष दणदणे, संकेत मेंढेकर, ओमप्रकाश मलानी, आदी उपस्थित होते.
अशा आल्या सूचना... रेड आणि ब्ल्यू लाइन ही पूररेषा निश्चित करा घंटागाडी नियमित यायला हवी नाले जिवंत करावे करणाऱ्या कंपन्यांवर कठोर कारवाई करा पूल, दोंदे पूल अशा ठिकाणांवर जाळ्या बसवा स्वच्छतेबाबत फलक लावा रहिवाशी परिसरात सायंकाळी देखील घंटागाडी पाठवा कचरा टाकणाऱ्यांवर दंडात्मक कारवाई करा स्वच्छता करणाऱ्यांना प्रोत्साहन द्या प्रत्येकाला जबाबदारी निश्चित करून द्या महापालिका, राज्य व केंद्र सरकारची मदत घ्या मोहिमेचा मायक्रो प्लॅन तयार करा स्लम एरियात नगरसेवकांनी अधिक प्रबोधन करावे
आम्ही नंदिनीचे सफाईसेवक आहोत. नंदिनी पूर्णपणे प्रवाहित करून ती प्रदूषणमुक्त करण्यासाठी महापालिकेने पावले उचलली आहेत. नदीच्या स्वच्छतेसाठी आसपासच्या नगरसेवकांनी जास्त लक्ष दिले पाहिजे. 'मटा'चा उपक्रम स्तुत्य असून त्याचा पाठपुरावा कायम हवा. दर महिन्याला याच्या बैठका घेवून महापालिका व लोकसहभागातून नंदिनीला पुनर्वैभव प्राप्त करून देवू. - अशोक मर्तडक, महापौर
'मटा'च्या उपक्रमासाठी मोठ्या प्रमाणावर निधी लागेल. त्यासाठी महापालिकेबरोबर राज्य व केंद्र सरकारचेही सहकार्य घ्यावे. या उपक्रमासाठी काँक्रिट प्लॅन तयार करावा. - गुरमित बग्गा, उपमहापौर
'मटा'च्या उपक्रमाचा मायक्रो प्लॅन तयार करून तो तडीस नेण्यासाठी ठराविक टप्पे करावे लागतील. सांडपाणी पात्रात जाणार नाही याची काळजी घेतल्यानंतर नदीच्या सुशोभीकरणाचा विचार करावा लागेल. - जीवन सोनवणे, अतिरिक्त आयुक्त
'नॉट मी बट यू' हा मूलमंत्र लक्षात ठेऊन कामाला सुरुवात करावी लागेल. सामाजिक बांधिलकीच्या भावनेतून लोकांनी या उपक्रमात सहभागी व्हावे. - प्रकाश चव्हाण
आम्ही नव्हे मी करणार असा संकल्प करा. प्रत्येकाने संकल्प करून प्रत्यक्ष कामास सुरुवात केली तर मोहीम यशस्वी होईल. आम्ही या उपक्रमासाठी मशिनरी पुरविण्यासह सर्वतोपरी मदत करू. - विजय हाके, पदाधिकारी, आर्ट ऑफ लिव्हींग
नंदिनी नदीत कोणीही घाण टाकू नये यासाठी सर्वप्रथम संरक्षक भिंत उभारली पाहिजे. काही ठिकाणी संरक्षण भिंतीला महापालिकेने मंजुरी दिली आहे. मात्र, ही भिंत नदीच्या कडेलाच झाली पाहिजे. - गुलजार कोकणी, नगरसेवक
घंटागाडी नियमित सर्वत्र फिरत नसल्याने आणि जनप्रबोधनाअभावी नंदिनी लगत कचरा टाकला जातो. महापालिकेने स्वच्छतेबाबत कठोर नियम केले पाहिजे. लोकांमध्ये स्वच्छतेबाबत प्रबोधन होणे आवश्यक आहे. - सतीश कुलकर्णी, भाजपा गटनेते
नदीपात्रात सोडले जाणारे ड्रेनेजचे पाणी सर्वप्रथम बंद करावे लागेल. यासाठी लोकांचे सहकार्य असून त्यांचे प्रबोधन करणे आवश्यक आहे. लोकसहभागातून लोकचळवळ उभी केल्यास नासर्डीची नंदिनी होईल. - सुरेखा भोसले, सभागृह नेत्या
निश्चयाच्या बळातूनच ही मोहीम यशस्वी होईल. दक्षिण कोरिया, राजस्थान येथे नदी स्वच्छता आणि ती प्रवाहित करण्याची मोहीम यशस्वी होऊ शकते तर नाशिककरही ती यशस्वी करू शकतात. - सुनील मेंढेकर
नैसर्गिक नाले व विहिरी बंद झाल्यामुळे तसेच अशुद्ध पाणी सोडले जात असल्याने नंदिनी दूषित झाली आहे. औद्योगिक क्षेत्रातील सांडपाणी व नागरिकांकडून कचरा टाकला जाणार नाही यासाठी पुढाकार घेतला पाहिजे. - यशवंत निकुळे, नगरसेवक
सातपूर एमआयडीसीतील दूषित पाणी मोठ्या प्रमाणात नंदिनीत सोडले जाते; ते प्रथम थांबविले पाहिजे. नंदिनीवरील प्रत्येक पुलाला जाळी बसविली पाहिजे त्यामुळे नागरिक कचरा टाकू शकणार नाही. - राजेंद्र महाले, नगरसेवक
नंदिनीची नियमित स्वच्छता करणे गरजेचे आहे. यासाठी महापालिका व स्थानिक रहिवाशांचा लोकसहभाग हवा. नदीचे पावित्र जपण्यासाठी महापालीकेने प्रबोधन करणे गरजेचे आहे. - सविता काळे, सभापती, सातपूर प्रभाग
विविध मंडळांना बरोबर घेऊन नंदिनीची स्वच्छता करण्याबाबत प्रबोधन करण्यावर भर देणार आहोत. तसेच शक्य त्या ठिकाणी कचरा टाकणाऱ्यांना महापालिका यंत्रणेने रोखणे गरजेचे आहे. - शिवाजी गांगुर्डे, नगरसेवक
महापालिकेकडून स्वच्छतेबाबत नेहमीच आवाहन केले जाते. मात्र, अनेक मोकळ्या जागांवर नागरिकांकडून कचरा टाकला जातो. डेब्रिज व कचऱ्याच्या ढिकाऱ्यांमुळे नंदिनीचे पात्र कमी झाले आहे. - प्रवीण पाटील, सदस्य, बॉश (मायको) कामगार संघटना
'पाणी अडवा पाणी जिरवा' या धर्तीवर काम करण्याची गरज आहे. शहरी भागातून वाहणाऱ्या नंदिनीच्या स्वच्छतेसाठी सर्वच सामाजिक व राजकीय संघटनांनी पुढे आले पाहिजे. - सिताराम ठोंबरे, सिटू कामगार संघटना
नंदिनीच्या स्वच्छतेसाठी कामगार विकास मंचच्या सर्व सदस्यांना बरोबर घेऊन स्वच्छतेचे आवाहन केले जाणार आहे. नदीत कचरा टाकला जातो अशा ठिकाणी प्रबोधनपर फलक लावण्याचा आम्ही प्रयत्न करू. - कैलास मोरे, संस्थापक, कामगार विकास मंच
महापालिका व नगरसेवकांनी लोकसहभागातून वर्षभर स्वच्छता मोहीम राबविल्यास नंदिनी नदी नक्कीच कचरामुक्त होऊ शकेल. स्थानिक रहिवाशांना नंदिनी स्वच्छतेबाबत आम्ही आवाहन करणार आहोत. - रंजन ठाकरे, पदाधिकारी राष्ट्रवादी काँग्रेस
नंदिनीच्या स्वच्छतेसाठी आम्ही अगोदरच पुढाकार घेतला आहे. परंतु, परत कचरा टाकत जात असल्याने नदीकाठावरील नागरिकांचे प्रबोधन सातत्याने करणे गरजेचे आहे. - अॅड. मुग्धा सापटनीकर, नंदिनी पुनर्भरण समिती
लोकसहभागातून सेऊल नदी स्वच्छ होवू शकते. सेऊलसारखीच रचना ही नंदिनीची आहे. लोकसहभागातून राजस्थानात बारा नद्या प्रवाहित करण्यात आल्या. नासर्डीची पुन्हा नंदिनी करण्यासाठी सर्वांचेच प्रयत्न आवश्यक आहेत. - राजेश पंडित, पर्यावरण प्रेमी
मोबाइल अॅप डाउनलोड करा आणि राहा अपडेट
