राजस्थान आणि पाकिस्तानच्या सीमेवर राहणाऱ्या बंजारांचे खंजरी नृत्य, राजस्थानी होळीमध्ये प्रसिद्ध असलेले स्त्री-पुरुषांचे डांगलीला, हंड्यांवर हंडे ठेवून केले जाणारे मनमोहक भवई नृत्य यांबरोबरच घुमर, गोरबंद, बाजूबंद, ढोलकडी, आगचरी, कालबेलिया, फुलचरी, हासामारी, हरिओ रुमाल यांसारख्या राजस्थानमधील प्रचलित नृत्यांच्या सादरीकरणाने राजस्थानमधील पारंपरिक नृत्यसंस्कृतीचे दर्शन घडविले. निमित्त होते नाशिक जिल्हा अग्रवाल महिला मंडळ प्रस्तुत ‘राजस्थानी लोकनृत्य’ या कार्यक्रमाचे. गंगापूर रोड येथील रावसाहेब थोरात सभागृहात रविवारी हा कार्यक्रम झाला.
महाराष्ट्र टाइम्स कल्चर क्लबच्या सदस्यांना या कार्यक्रमाचे मोफत पासेस देण्यात आले होते. या कार्यक्रमासाठी १३ दिवस राजस्थानमधील प्रख्यात नृत्यांगणा पंडित गुरूमाँ शकुंतला पवार यांनी महिलांना विविध राजस्थानी नृत्यप्रकारांचे प्रशिक्षण दिले होते. यामध्ये शिकविण्यात आलेल्या नृत्यप्रकारांचे सादरीकरण या भव्य कार्यक्रमात करण्यात आले. नाशिकमध्ये पहिल्यांदाच राजस्थानी नृत्याचे आयोजन करण्यात आले होते. ‘एकदंताय वक्रतुंडाय’ या गणेशवंदनेने कार्यक्रमाला प्रारंभ झाला. त्यानंतर ब्रज की होली, तिरंगा, धमाल, रुणझुण अशा विविध १४ नृत्य प्रकारांच्या सादरीकरणाने प्रेक्षकांची मने जिंकली. सहा वर्षीय मुलींपासून ६० वर्षांपर्यंतच्या महिलांपर्यंत सर्व वयोगटातील महिलांनी या नृत्यप्रकारांचे सादरीकरण केले. या वेळी गुरू शकुंतला पवार यांनी प्रत्येक नृत्यप्रकाराचा परिचय करून दिला. पाश्चात्त्य संस्कृतीचा प्रभाव आपल्याकडे वाढत आहे. अशा वेळी राजस्थानी लोकनृत्यातून भारतीय संस्कृती टिकवून ठेवण्याचा प्रयत्न यामार्फत करीत असल्याचे शकुंतला पवार या वेळी म्हणाल्या.
महापौर अशोक मुर्तडक यांनी मनोगत व्यक्त करताना, अग्रवाल महिला मंडळाच्या सामाजिक उपक्रमांचे कौतुक केले. मनपा शाळांमध्येही त्यांनी शालेय साहित्याचे वाटप करून गरजूंसाठी मदतीचा हात दिला असल्याचे सांगत त्यांच्या कार्यास मुर्तडक यांनी प्रोत्साहन दिले. या वेळी नेमिचंद पोद्दार, पत्रकार किरण अग्रवाल, मंडळाच्या जिल्हाध्यक्ष सपना अग्रवाल, जिल्हा महामंत्री ममता अग्रवाल, अलका अग्रवाल, संगीता अग्रवाल आदी उपस्थित होते.
मोबाइल अॅप डाउनलोड करा आणि राहा अपडेट