सरसकट सर्वच शेतकऱ्यांना कर्जमाफी जाहीर झाली...तातडीची मदत म्हणून १० हजार रु.चा दिलासाही जाहीर झाला. मात्र बळीराजाला तोही आधार अपुरा वाटू लागला की काय, अशी शंका येणाऱ्या घटना बुधवारी समोर आल्या. गेल्या २४ तासांत सहा शेतकऱ्यांनी जीवन संपवले; त्यातही धक्कादायक ठरले या शेतकऱ्यांनी त्यासाठी शोधलेले मार्ग!
नाशिकच्या चांदवड तालुक्यातील शिऊर येथील कचरू पुंजा आहेर (वय ६५, तीन लाखांचे कर्ज) यांनी मंगळवारी विष पिऊन आत्महत्या केली. बागलाण तालुक्यातील ब्राह्मणगाव येथे हरिश्चंद्र वसंत आहिरे यांनी बुधवारी सकाळी विहिरीत उडी घेत आत्महत्या केली. मालेगावच्या वडनेर खाकुर्डी येथील वयोवृद्ध शेतकऱ्याने स्वतःची चिता रचून मंगळवारी रात्री दोन वाजेच्या सुमारास आत्महत्या केली. सुपडू भिका पवार असे या शेतकऱ्याचे नाव असून, त्यांच्यावर सावकारी तसेच हात उसनवारीचे दोन लाख रुपये व पत्नी सखुबाई सुपडू पवार हिच्या नावे सोसायटीचे ८० हजार रुपयांचे सन २०१२ पासूनचे कर्ज होते. या कर्जबाजारीपणाला कंटाळून सुपडू पवार यांनी त्यांच्या राहत्या घराच्या पाठीमागे स्वतःची चिता रचून व अंगावर रॉकेल ओतून आत्महत्या केली. दरम्यान, ही घटना गावातीलच एका तरुणाने बघितल्याने त्याने आरडाओरड केल्याने समोर आली. मात्र तोपर्यंत सुपडू पवार (वय ७५) हे ८० ते ९० टक्के भाजल्याने त्यांचा मृत्यू झाला. चांदवडमधील बोराळे येथील ३२ वर्षीय आप्पासाहेब खंडेराव जाधव (५० हजारांचे कर्ज) यांनी कर्जाला कंटाळून मंगळवारी रात्री वीज प्रवाहाची तार हातात पकडून आत्महत्या केली.
परभणी जिल्ह्यातील पाथरी तालुक्यातील आनंदनगर येथील अल्पभूधारक शेतकरी पती-पत्नीने विष पिऊन आत्महत्या केली. ही घटना बुधवारी दुपारी अडीचच्या सुमारास घडली. लक्ष्मण जेसू पवार (वय ६०), चपलाबाई लक्ष्मण पवार (वय ५५) अशी त्यांची नावे आहेत. लक्ष्मण यांच्या नावे आनंदनगर शिवारात ४ एकर जमीन आहे. २७ मे रोजी त्यांच्या नातीचे लग्न झाले. त्यांच्याकडे बँक व खासगी सावकारी कर्ज होते. त्यातच पेरणीसाठी पैसे नसल्याने दोघे नैराश्यात होते. त्यांनी बुधवारी दुपारी घरी विष पिऊन आत्महत्या केली. ही बाब पुतण्या राजेभाऊ धनसिंग पवार यांच्या लक्षात येताच त्यांनी दोघांनाही पाथरी येथील ग्रामीण रुग्णालयात नेले. उपचारापूर्वीच त्यांचा मृत्यू झाला. त्यांच्या मागे मुलगा, चार मुली असा परिवार आहे.
* चांदवड : स्वत:चीच चिता रचून घेतली उडी
* बागलाण : विहिरीत उडी घेऊन केला अंत
* बोराळे : विजेची उच्चदाबाची तार हाती धरली
* परभणी : दाम्पत्याने विष पिऊन जीवन संपवले
* शिऊर : विष पिऊन स्वतःला संपवले.
मोबाइल अॅप डाउनलोड करा आणि राहा अपडेट