टीम मटा
अनेक वर्षांपासूनच्या प्रलंबित मागण्यांसह राज्य सरकारी कर्मचाऱ्यांप्रमाणे सर्व सेवांचा लाभ मिळावा या मागणीसाठी सटाणा, निफाड, येवला येथील नगरपरिषद कर्मचाऱ्यांनी सामूहिक रजा आंदोलन केले.
सेवेत समावेश करण्याची मागणी
निफाड : नवनिर्मित नगरपरिषद व नगरपंचायतीत तत्कालीन ग्रामपंचायत कर्मचाऱ्यांचा समावेश करावा, या मागणीसाठी निफाड नगरपंचायतीच्या सर्व कर्मचाऱ्यांनी बुधवारी सामुदायीक रजेच्या आंदोलनात सहभाग घेतला. यावेळी उपस्थित कर्मचाऱ्यांनी नगरपंचायतीचे मुख्याधिकारी किशोर चव्हाण व तहसीलदार विनोद भामरे यांना निवेदन दिले.
निवेदनात नऊ मागण्यांचा समावेश आहे. ग्रामपंचायत कर्मचाऱ्यांना नगरपंचायत सेवेत सामावून घ्यावे, कर्मचारी समावेशनसाठी विहीत अर्हता ही सरळसेवा भरतीच्या अर्हतेसारखी न ठेवता ज्या पदावर कामावर आहे त्याच पदावर ठेवावे, कर्मचाऱ्यांना पात्रता पूर्ण करण्यासाठी दोन वर्षांचा कालावधी द्यावा, यापूर्वी नागरपरिषद प्रशासन संचनालयाचे नवनिर्मित नगरपरिषदेच्या कर्मचारी समावेशन प्रक्रियेप्रमाणे सर्व कर्मचाऱ्यांचे समावेशन करावे, आश्वाशीत प्रगती योजना व इतर सेवा सवलतींचा लाभ द्यावा आदी मागण्यांचा समावेश आहे.
या आंदोलनात नवनिर्मित नगरपंचायत कर्मचारी अन्याय निवारण कृती समितीचे विभागीय अध्यक्ष बाबुलाल थोरात, जिल्हा सरचिटणीस अनिल कुंदे, जिल्हा सदस्य दिनेश सोनवणे, उज्ज्वल चव्हाण, शरद काकुळते, बापू कुंभार्डे, जालिंदर पवार, रामदास कराटे, हिराबाई धारराव व कर्मचारी उपस्थित होते. निफाड नगरपंचयातीच्या खाली पेंडॉल टाकून सर्व कर्मचारी आंदोलनात सहभागी झाले होते.
काळ्या फिती लावून निषेध
सटाणा : सटाणा नगरपरिषद कर्मचाऱ्यांनी आपल्या विविध मागण्यांसाठी गुरुवारी काळ्या फिती लावून सामूहिक रजा आंदोलन केले. पालिकेच्या मुख्य प्रवेशद्वारावर हे आंदोलन करण्यात आले. यावेळी राज्य नगरपालिका, नगर पंचायत, मुख्याधिकारी, कर्मचारी, संवर्ग कर्मचारी आणि संघर्ष समितीच्या माध्यमातून विविध मागण्यांसाठी आंदोलन पुकारण्यात आल्याचे सांगण्यात आले.
राज्यातील नगर परिषद कर्मचाऱ्यांना राज्य शासकीय कर्मचाऱ्यांबरोबर २००६ पासून सातवा वेतन आयोग लागू करावा, १०० टक्के वेतन शासनामार्फत देण्यात यावे, जि. प. व पं. सं. कर्मचाऱ्यांप्रमाणे सर्व लाभ पालिका कर्मचाऱ्यांना द्यावा, नगरपरिषद कर्मचाऱ्यांना २४ वर्ष आश्वासित प्रगती योजनेच्या लाभ विनाअट लागू करावी, रोजदारी कर्मचाऱ्यांना विनाअट कायम करावे आदी मागण्यांचा समावेश करण्यात आला आहे.
आंदोलनात कामगार युनियनचे अध्यक्ष सुभाष पाटील, सरचिटणीस पोपटराव सोनवणे, अनिल सोनवणे, संजय सोनवणे, शालीग्राम कोर, प्रशांत पाठक, हिरालाल कापडणीस, किशोर सोनवणे, दीपक सोनवणे, सुनील सोनवणे, विजय सोनवणे, संजय कुलकर्णी, जितेंद्र पवार, हेमंत बोरसे, खंडेराव जाधव, पोपट सोनवणे, कर्मचारी, कामगार सहभागी झाले होते.
आंदोलनाला पाठींबा
नगराध्यक्ष मुकुंद होळकर, उपनगराध्यक्षा चारुशीला कर्डीने, माजी नगराध्यक्ष राजाभाऊ शेलार, नगरसेवक अनिल कुंदे, शिवसेना शहर प्रमुख संजय कुंदे, सुनील निकाळे, विक्रम रंधवे, असिफ पठाण, सुनील श्रीवास्तव, दीपक गाजरे आदींनी या ठिकाणी भेट देऊन आंदोलनकर्त्यांच्या मागण्यांना पाठिंबा दिला.
येवल्यात घोषणाबाजीने दणाणले तहसील
येवला ः गेली अनेक वर्षे सातत्याने रेटा लावूनही विविध मागण्या प्रलंबित असल्याकडे शासनाचे लक्ष वेधण्यासाठी भारतीय मजदूर संघाच्या नेतृत्त्वाखाली येवला नगरपालिकेतील कर्मचाऱ्यांनी बुधवारी शहरातून मोर्चा काढला. हाती मागण्यांचे फलक घेत अन् जोरदार घोषणाबाजी करत शहराच्या विविध भागातून मार्गस्थ झालेला हा मोर्चा येवला तहसीलवर थडकला. तहसीलदारांना मागण्यांचे निवेदन देण्यात आले.
पालिकेच्या जुन्या कार्यालयापासून निघालेल्या या मोर्चात पालिकेचे सर्व कर्मचारी, अधिकारी तसेच सेवानिवृत्त कर्मचारी सहभागी झाले होते. महागाई भत्ता फरक मिळालाच पाहिजे, सफाई कामगारांना त्वरित घरे मिळावीत, अनुकंपा तत्त्वावरील नेमणुका द्या, रोजंदारीचे
थकीत वेतन अदा करा आदी अनेक मागण्यांचे फलक हाती घेत या मोर्चात पुरुष व स्त्री कर्मचारी सहभागी झाले होते. तहसीलमध्ये नायब तहसीलदार तुरुंगले यांनी निवेदन स्वीकारले. भारतीय मजदूर संघाच्या वतीने शशिकांत मोरे व प्रशांत पाटील यांनी मार्गदर्शन केले. यावेळी संजय पोंदे, दत्तात्रय गुंजाळ,किशोर भावसार,श्रीकृष्ण हंडी हे संघटनेचे पदाधिकारी उपस्थित होते.
मोबाइल अॅप डाउनलोड करा आणि राहा अपडेट
