म. टा. खास प्रतिनिधी, नाशिक
माणसाला माणूस जोडून छत्रपती शिवरायांनी स्वराज्याचे स्वप्न पाहिले आणि ते प्रत्यक्षातही आणले. प्रामाणिकपणा, स्वराज्याप्रतीची निष्ठा मनात ठेवून शिवरायांचे मावळे प्राणपणाने लढले. धर्म, जात या पलीकडे जाऊन एतदेशीयांचे राज्य निर्माण करण्यात महाराजांनी आपले समग्र जीवन समर्पित केले. हा इतिहास साक्षात उभा राहिला आणि रसिक त्यात न्हाऊन निघाले. निमित्त होते ‘प्रभो शिवाजीराजा’ या शिवजागराचे.
श्री साईबाबा हार्ट इन्स्टिट्यूट अॅण्ड रिसर्च सेंटर आणि शब्दमल्हार प्रकाशननिर्मित ‘प्रभो शिवाजीराजा’ हा शब्दसंगीत कार्यक्रम रावसाहेब थोरात सभागृहात झाला. श्री साईबाबा हार्ट इन्स्टिट्यूटचे संचालक डॉ. अनिरुद्ध धर्माधिकारी, डॉ. पल्लवी धर्माधिकारी व हॉस्पिटलच्या सर्व मान्यवर डॉक्टरांच्या हस्ते दीपप्रज्ज्वलन झाले. ‘मराठी पाऊल पडते पुढे’ या गाण्याने कार्यक्रमास प्रारंभ झाला. त्यानंतर शिवछत्रपतींच्या स्वराज्य निर्मितीचा इतिहास व त्याला जोडूनच छत्रपतींची गौरवगीते प्रस्तुत करण्यात आली. प्रतापराव गुर्जर यांचे शौर्य आणि त्यावर आधारलेले कविश्रेष्ठ कुसुमाग्रजांचे ‘वेडात मराठे वीर दौडले सात’ हे गीत, बाजीप्रभू देशपांडे यांचा पावनखिंडीतील पराक्रमावर लिहिलेली कुसुमाग्रजांचे ‘सरणार कधी रण प्रभो तरी’ हे गीत उपस्थितांचे डोळे पाणावून गेले. शिवारायांच्या दरबारातील कविभूषण याने लिहिलेल्या गितांच्या सादरीकरणानंतर सभागृहात चैतन्य पसरले. स्वातंत्र्यवीर सावरकर यांनी शिवरायांना दैवत मानले. ‘हे हिंदू नृसिंहा प्रभो शिवाजीराजा’ हे गीत लिहिले. त्यांनीच लिहिलेली छत्रपतींनी ‘जयदेव जयदेव जय जय शिवराया’ ही आरतीदेखील सादर करण्यात आली. स्वराज्यासाठी प्राणांचे बलिदान देणाऱ्या मावळ्यांचे मोठेपण, शिवछत्रपतींची राजनीती, हेरनीती, युध्दनीती, जलनीती, गडनीती कशी होती यावरही प्रकाशझोत टाकण्यात आला.
यांनी केले सादरीकरण
स्वानंद बेदरकर यांनी गितांच्या रसग्रहणासह शिवरायांचा उभा केलेला इतिहास श्रोत्यांचे स्फुल्लिंग चेतवणारा ठरला. मकरंद देशपांडे, प्रीती तळवलकर या दोघांनी सर्व गाणी प्रस्तुत केली. त्यांना अनिल धुमाळ (की बोर्ड), जयेश धारगळकर (तबला), विनोद पडगे (हार्मोनियम), सदानंद मुळीक (पखवाज) आणि महेंद्र फुलफगर (तालवाद्य) यांनी संगीतसाथ केली. विनोद राठोड यांनी प्रकाशयोजना तर राम नवले यांनी ध्वनीचे काम पाहिले. यावेळी डॉ. अनिरुध्द धर्माधिकारी यांच्या हस्ते उपस्थित मान्यावरांचा प्रातनिधिक सन्मान करण्यात आला.
मोबाइल अॅप डाउनलोड करा आणि राहा अपडेट