म. टा. वृत्तसेवा, पिंपळगाव बसवंत
पिंपळगाव बसवंत ग्रामपंचायतच्या थेट सरपंच आणि १७ सदस्यांच्या निवडीसाठी शनिवारी मतदान होत असून, दिलीप बनकर यांच्या नेतृत्वाखालील परिवर्तन पॅनल आणि भास्कर बनकर यांच्या नेतृत्वाखालील प्रगती पॅनलमध्ये थेट ासामना होणार आहे.
दोन्ही पॅनलच्या वतीने गत आठ दहा दिवसांपासून शहरातील प्रत्येक घर आणि प्रत्येक मतदारांपर्यंत पोहोचण्याचा प्रयत्न करण्यात आला. शहरातील ज्येष्ठ नेते प्रत्यक्ष निवडणुकीच्या रिंगणात नसले तरी प्रचारात सक्रिय असल्यामुळे दोन्ही पॅनलला ज्येष्ठ नेत्यांचे चांगले पाठबळ मिळाले आहे. गत आठ दिवसांपासून सुरू असलेली प्रचाराची रणधुमाळी गुरुवारी सांयकाळी थांबली. मात्र ग्रामपंचायतवर वर्चस्व मिळविण्यासाठी दोन्ही पॅनलकडून प्रचाराची राळ उडविण्यात आली होती.
प्रत्यक्ष भेटी, चौकसभा, जाहीर सभा, सोशल मीड‌ियावर झालेला प्रचार व अपप्रचार यामुळे निवडणुकीचे वातावरण चांगलेच तापले होते. पिंपळगाव ग्रामपंचायतवर गत तीस वर्षांपासून भास्कर बनकर यांची एकहाती सत्ता आहे. १९९७ चा अपवाद वगळता ग्रामपंचायतच्या प्रत्येक निवडणुकति भास्कर बनकर यांच्या साथीला कधी दिलीप बनकर तर कधी तानाजी बनकर होते. एक निवडणूक तर बिनविरोध पार पडली होती. या निवडणुकीत मात्र भास्कर बनकर यांना सत्तेवरून खाली खेचण्यासाठी शहरातील मातब्बर नेते एकत्र आले आहेत. त्यातच थेट सरपंच पदाच्या निवडणुकीत दिलीप बनकर यांनी आपल्या भावजय अलका बनकर यांनाच रिंगणात उतरवल्यानंतर निवडणुकीतील चुरश कमालीची वाढली. दिलीप बनकर यांच्यासोबत ज्येष्ठ नेते प्रताप मोरे, तानाजी बनकर, अशोक शहा, सोहनलाल भंडारी, सुरेश खोडे, सपंत विधाते विश्वास मोरे, सोमनाथ मोरे आदी मातब्बर नेते सक्रिय झाल्याने भास्कर बनकर काहीसे एकाकी पडले असले, तरी निवडणुकीत मतदाराचां कैाल महत्त्वाचा असल्याने भास्कर बनकर यांची भिस्त मतदारांवरच आहे.
अॅड. शातांराम बनकर, पढंरीनाथ देशमाने, चंद्रकांत खोडे, रामराव डेरे, जयमरा खोडे आदी मान्यवरासह दिलीप मोरे यांच्यासारखा हुकुमी एक्का भास्कर बनकर यांच्या साथीला आहे. तर युवा कार्यकर्त्यांमध्ये चांगला प्रभाव असलेले युवा नेते राजेश पाटील सुजीत मोरे, दीपक बनकर, आशिष बागुल, राज गांगुर्डे, रामराव मोरे, विक्रम मोरे, नकुल शिंदे, राहुल बनकर, संदीप बनकर अशी युवा नेत्यांची फौज भास्कर बनकरांच्या पाठ‌िशी आहे. सत्यजीत मोरे, महेंद्र गांगुर्डे, किरण लभडे, लक्ष्मण खोडे, रामराव बनकर आदी बिनीचे शिलेदार भास्कर बनकर यांच्या पॅनलमधुन उमेदवारी करीत आहेत. शिवाय संपन्न राजकीय वारसा असलेल्या नामवंत घराण्यातील महिला संध्या मोरे, शितल बनकर, छाया पाटील, सविता खोडे, सुवर्णा देशमाने आदी भास्कर बनकर यांच्या पॅनलच्या उमेदवार आहेज.
दिलीप बनकर यांच्या पॅनलमधून सतीश मोरे, संजय मोरे, सुनिल गांगुर्डे, गणेश बनकर, सुहास मोरे असे प्रभावी युवा नेते उमेदवारी करीत आहेत. प्रचार काळात दोन्ही पॅनलने आपली भूमिका मतदारापर्यंत पोहचविली आहे. युवा नेत्यांची उमेदवारी दिलीप बनकरांना विजयापथावर पोहचवणार की एकाकी पडूनही भास्कर बनकर मतदारांची सहानुभूती मिळवतात हे निवडणुकीनंतर स्पष्ट होर्इल.
पिंपळगावात ३६ बूथ
पिंपळगाव बसवंत ग्रामपंचायतीच्या थेट सरपंच आणि १७ सदस्य निवडीसाठी शनिवारी मतदान होणार आहे. निवडणूक विभागाकडून मतदानाची तयारी पूर्ण झाली असल्याची माहिती मुख्य निवडणूक अधिकारी एस. ए. शेख यांनी दिली. पिंपळगाव ग्रामपंचायतसाठी यंदा प्रथमच थेट सरपंच निवड होत असून सहा वॉर्डातून १७ सदस्य उभे आहेत. सहा वॉर्डात ३६ मतदान बूथची व्यवस्था करण्यात आली आहे. या साठी बुथ अधिकाऱ्यांसह तीस महिला कर्मचारी परिश्रम घेत आहेत. पिंपळगाव ग्रामपंचायत निवडणुकीसाठी सहा वॉर्डातून एकूण मतदार संख्या २७ हजार ९०४ इतकी आहे.
मोबाइल अॅप डाउनलोड करा आणि राहा अपडेट
