आमदारांचे प्रगतिपुस्तक
--
निधी कोट्यवधींचा, पण शहराचे बकालपण कायम
मतदारसंघ ः मालेगाव मध्य
जिल्ह्यातील एकमेव मुस्लिमबहुल मतदारसंघ अशी ओळख असलेल्या मालेगाव मध्य मतदारसंघातील मतदारांनी वारंवार लोकप्रतिनिधी बदलले, तरी त्यांचे प्रश्न आजही कायम आहेत. आसिफ शेख यांच्या रुपाने मालेगावला तरुण चेहरा मिळाला असला, तरी विरोधी पक्षात असल्याचा फटका तीन वर्षांपासून त्यांना बसला आहे. तीन वर्षांत मतदारसंघात मोठा प्रोजेक्ट येण्याऐवजी मालेगावची रोजीरोटी असलेला हातमाग व्यवसाय मात्र संकटात आला आहे. शहरात अस्वच्छता, अतिक्रमणे, बकालपणा या समस्या कायम असल्या, तरी भुयारी गटार योजना, उड्डाणपूल, क्रिकेट स्टेडियम, अल्पसंख्याक शिष्यवृत्ती यांसारखी विकासकामे मार्गी लावण्यात मात्र त्यांना यश आले आहे. मालेगाव शहराचा चेहरामोहरा बदलावा यासाठी मतदारांनी त्यांच्यावर विश्वास दाखविला असून, त्या विश्वासावर खरे उतरण्याची जबाबदारी आगामी दोन वर्षांत त्यांच्यावर असेल.
भुयारी गटार, उड्डाणपूल मार्गी
मुस्लिमबहुल व संवेदनशील शहर म्हणून ओळख असलेल्या मालेगाव मध्य मतदारसंघाचे प्रतिनिधित्व काँग्रेसचे आमदार अासिफ शेख करीत आहेत. माजी आमदार व शहराचे विद्यमान महापौर रशीद शेख यांचे चिरंजीव असलेल्या अासिफ यांना राजकीय वारसा लाभला आहे, तसेच आमदारकीच्या आधीदेखील नगरसेवक, महापौरपदाचा अनुभव असल्याने मुस्लिम समुदायाच्या प्रश्नांची त्यांना जाण आहे. राज्यात सध्या भाजप-शिवसेनेचे सरकार असताना विरोधी पक्षात असूनदेखील मतदारसंघातील कामे मार्गी लावण्यासाठी ते प्रयत्नशील आहेत. शहरात अस्वच्छता, अतिक्रमणे, बकालपणा या समस्या कायम असल्या, तरी भुयारी गटार योजना, उड्डाणपूल, क्रिकेट स्टेडियम, अल्पसंख्याक शिष्यवृत्ती यांसारखी कामे मार्गी लावण्यात त्यांना यश आले आहे.
यंत्रमागधारकांप्रश्नी सजगता
मालेगाव हे यंत्रमागधारकांचे शहर असून, विविध कारणांमुळे या उद्योगाला गेल्या काही दिवसांपासून समस्यांनी ग्रासले आहे. या यंत्रमागधारकांच्या समस्या सोडविण्यास आमदार शेख यांनी निवडून आल्यानंतर प्राधान्य दिले असून, विजेचा प्रश्न मार्गी लावण्यासाठी इन्फ्रा २ अंतर्गत शहरात शंभर नवीन ट्रान्सफॉर्मर बसविण्यात आले असून, उर्वरितचे काम सुरू आहे, तसेच वीज अनुदान मिळावे यासाठीही त्यांनी आवाज उठविला आहे. यंत्रमाग कामगारांसाठी महामंडळ, घरकुल योजना व्हावी यासाठी त्यांनी भव्य मोर्चा काढला होता. दोन वर्षांत अल्पसंख्याक विद्यार्थ्यांसाठी आयटीआय, भुयारी गटार पूर्ण करणे, महिलांसाठी ५०० खाटांचे रुग्णालय व जिल्हानिर्मितीच्या प्रश्नावर पाठपुरावा करावा लागणार आहे.
शैक्षणिक विकासासाठी पुढाकार
मुस्लिम मुले, मुली, युवती यांना शिक्षणाच्या प्रवाहात आणण्यासाठी पुढाकार घेतानाच शाळांना २०० संगणक वाटप, दहावी ते बारावीच्या विद्यार्थ्यांना मोफत पाठ्यपुस्तके वाटप, स्वतंत्र अभ्यासिका, नवीन उर्दू शाळा, अल्पसंख्याक शिष्यवृत्तीचा लाभ मिळवून देणे अशी कामे सातत्याने सुरू आहेत. गेल्या तीन वर्षांत ठळक म्हणता येतील अशी कामे म्हणजे शहरातील वाहतूक कोंडी कमी व्हावी यासाठी उड्डाणपुलासाठी ३१.७२ कोटींच्या निधीला मंजुरी मिळविली असून, चार कोटी रुपये खर्चातून उर्दू घर, दीड कोटी रुपये खर्चातून क्रिकेट स्टेडियम साकारण्यासह भुयारी गटार योजनेसाठी केंद्राकडून १०० कोटींच्या निधीसही मंजुरी मिळविली आहे. यातील उड्डाणपूल व भुयारी गटारीच्या कामाचा प्रारंभ अद्याप झालेला नाही.
मार्गी लावलेली कामे
--
-उड्डाणपुलासाठी ३१.७२ कोटी
-उर्दू घरासाठी ४ कोटी
-क्रिकेट स्टेडियमसाठी १.५ कोटी
-भुयारी गटारींसाठी १०० कोटी
-महिला रुग्णालयासाठी पाठपुरावा
--
या प्रश्नांकडे दुर्लक्ष
शहरात आजही स्वच्छता, अतिक्रमणे, रोगराई, बेरोजगारी आदी समस्या कायम आहेत. यंत्रमाग उद्योग असला, तरी त्यात नवनवीन तंत्रज्ञान यायला हवे. टेक्स्टाइल पार्क, स्पिनिंग जिनिंग मिल्स, गारमेंट उद्योग नसल्याने कापडावरील प्रक्रिया उद्योगाचा आभाव असून, हे शक्य झाल्यास मोठ्या प्रमाणात रोजगारनिर्मिती होणे शक्य आहे. अल्पसंख्याक समुदायासाठीच्या विविध योजनांची प्रभावी अंमलबजावणी झाल्यास मुस्लिम समाज मुख्य प्रवाहात येऊ शकेल.
--
विधिमंडळ कामकाजात सहभाग
आमदार शेख यांनी विरोधी पक्षात असतानादेखील विकासाच्या प्रश्नांवर विधिमंडळात सातत्याने आवाज उठविला आहे. यासह मराठा, मुस्लिम आरक्षण, सच्चर समिती, गोरक्षण कायदा यांसारख्या प्रश्नांवर सातत्याने जनआंदोलने करून मुस्लिम समुदायाचे नेतृत्व त्यांनी केले आहे. त्यांच्या नेतृत्वात महापालिकेवर काँग्रेसने सत्ता मिळविली असून, ते स्वतः आमदार, वडील रशीद शेख महापौर, तर आई ताहेरा शेख विद्यमान नगरसेविका असून, सत्तेची अनेक पदे हाती असल्याने शहरातील मुस्लिम बांधवांच्या त्यांच्याकडून विकासाबाबत अपेक्षा वाढल्या आहेत.
--
आमदार म्हणतात...
विकास साधण्याचा प्रयत्न
गेल्या निवडणुकीत मतदारांनी माझ्यावर विश्वास दाखवत नेतृत्वाची संधी दिली. विरोधी पक्षात असतानादेखील विकास साधण्याचा माझा प्रयत्न आहे. शहराची स्वच्छता व वाहतुकीच्या दृष्टीने भुयारी गटार व उड्डाणपूल ही महत्त्वाची दोन कामे मार्गी लावण्यात यश आले आहे. यंत्रमागधारकांसाठीदेखील सातत्याने आवाज उठविला आहे. मुस्लिमांना शिक्षण व नोकरीत आरक्षण मिळावे यासाठी पाठपुरावा सुरू आहे. जिल्हानिर्मिती व्हावी यासाठी प्रयत्नशील आहोत.
-आसिफ शेख, आमदार, मालेगाव मध्य
--
विरोधक म्हणतात...
जुन्या कामांचे घेताहेत श्रेय
विद्यमान आमदार शेख यांच्या तीन वर्षांच्या कार्यकाळात कोणतीही ठोस विकासकामे झालेली नाहीत. आमच्या कार्यकाळात मंजूर झालेल्या विकासकामांचे श्रेय घेण्याचा प्रयत्न ते करीत आहेत. प्रत्यक्षात मात्र विकासकामे सुरूच झालेली नाहीत. शहरातील रोजगारनिर्मिती, आरोग्य, शिक्षण, रस्ते आदी प्रश्न अद्यापदेखील प्रलंबित आहेत. यंत्रमाग उद्योग संकटात असताना त्यासाठी ठोस काहीच झालेले नाही. टेक्स्टाइल पार्क, गारमेंट उद्योगही आलेले नाहीत.
-मौलाना मुफ्ती इस्माईल, माजी आमदार, राष्ट्रवादी काँग्रेस
--
शब्दांकन ः तुषार देसले
----------------------
मतदारसंघ ः चांदवड-देवळा
‘जलयुक्त’मध्ये तिसरा; तरीही तहानलेला...
ज्या तालुक्याच्या भाग्यातच दुष्काळ लिहिलेला आहे, अशा चांदवड-देवळा मतदारसंघात नवीन सरकार येऊन तीन वर्षे झाली तरी पाण्याचा प्रश्न कायम आहे. भाजपचे आमदार राहुल आहेर यांनी दुष्काळाच्या शापातून मतदारसंघाला मुक्त करण्यासाठी जलयुक्त शिवार योजनांची भरपूर पेरणी केली. त्यामुळे अनेक गावांची तहान भागली असली, तरी आगामी दोन वर्षांत उर्वरित गावांचीही पाण्याची चिंता मिटविण्याचे आव्हान डॉ. आहेर यांच्यासमोर आहे. मुंबई-आग्रा महामार्गावर वसलेला हा तालुका राजकीयदृष्ट्यादेखील तितकाच महत्त्वाचा आहे. आमदार आहेर यांना ज्येष्ठ नेते शिरीष कोतवाल यांनी निवडणुकीत कडवी झुंज दिली. राज्य दुष्काळमुक्त करण्यासाठी सरकारने सुरू केलेल्या जलयुक्त शिवार योजनेची सर्वांत जास्त कामे चांदवड तालुक्यात झाली. या योजनेत चांदवड तालुका राज्यात तिसऱ्या क्रमांकावर आहे. मात्र, तरीही या तालुक्यातील काही भागांत पाणीसाठा आहे, तर काही भागांत अजिबात पाणी नाही. जलयुक्त शिवारच्या कामांमुळे अनेक भागात पाणी पोहोचले; परंतु काही गावांमध्ये अद्यापही पाणीटंचाई आहे.
रस्त्यांच्या कामांवर भर
‘वसाका’च्या पुनर्वसनाकामी आमदार आहेरांनी पुढाकार घेतला आहे. तालुक्यात खेळाडूंची संख्या मोठ्या प्रमाणात असल्याच्या पार्श्वभूमीवर उमराणा येथे २ कोटी रुपये खर्च करून अद्ययावत क्रीडा संकुल बांधले आहे. तालुक्यातील काही रस्ते राज्यात रोल मॉडेल ठरावेत असे आहेत. तिसगाव ते जोपूळ हा रस्ता ५० कोटी रुपये खर्च करून तयार केला आहे. चांदवड शहराला सुरळीत पाणीपुरवठा व्हावा यासाठी ६७ कोटी रुपयांचा प्रकल्प मार्गी लागला आहे. चांदवड-निफाड मार्गावर मोठ्या प्रमाणात वाहतूक असते, अनेक शेतकरी या भागातून आपला माल विक्रीसाठी नेत असतात. या ठिकाणचा रस्ता अत्यंत खराब झाल्याने तो आमदार आहेरांनी आपल्या निधीतून तयार केला आहे. त्यासाठी तब्बल ६७ कोटी रुपये खर्च करण्यात आले.
डायलिसीस सेंटरची उभारणी
आरोग्याच्या सुविधा ग्रामीण भागात कमी असतात. मात्र, देवळा येथील प्राथमिक आरोग्य केंद्रात आमदार आहेर यांच्या निधीतून डायलिसीस सेंटर तयार करण्यात आले आहे. त्याचा उपयोग परिसरालाच नव्हे, तर इतर तालुक्यांनाही होत आहे. राज्यात तालुक्याच्या ठिकाणी सर्वांत प्रथम डायलिसीस सेंटर सुरू करण्याचा मान आमदार आहेरांनी मिळविला आहे. रामेश्वर धरणाजवळ असलेल्या २० एकर जागेमध्ये अद्ययावत उद्यान तयार करण्यात आले आहे. त्याद्वारे करमणुकीच्या साधनांची कमतरताही आमदारांनी भरून काढली आहे. तालुक्यातील नागरिकांना विरंगुळ्याचे ठिकाण म्हणून ते प्रसिद्ध झाले आहे.
नियोजित पूर्ण करण्याचे लक्ष्य
गेल्या तीन वर्षांत जी कामे झाली नाहीत, ती कामे दोन वर्षांत मार्गी लावण्याचे त्यांचे लक्ष्य आहे. त्यामध्ये प्रामुख्याने चांदवड-देवळा बस स्टॅँडची सुधारणा करणे, चांदवड हाय राइस कॅनॉल सर्वेक्षण करणे, चणकापूर आरबीसी वहन क्षमता वाढविणे, म्हसाड नाला पाणी सीआरबीसीमध्ये वळविणे, परसूल तलावाची उंची वाढविणे आदी कामांचा समावेश आहे. आमदार आहेर यांच्याकडे कामाचा उरक असून, विविध योजनाही त्यांच्याकडे आहेत.
मार्गी लावलेली कामे
-उर्ध्व गोदावरी प्रकल्पांना मान्यता ९१७ कोटी रुपये
-आयआरसी मॉडेलरोड तिसगाव-जोपूळ ५० कोटी रुपये
-चांदवड शहर स्वतंत्र पाणीपुरवठा योजना ६७ कोटी रुपये
-चांदवड निफाड रस्ता ६७ कोटी रुपये
-रामेश्वर धरण येथे २० एकरांमध्ये अद्ययावत उद्यान
-नाबार्ड योजनेंतर्गत भऊर-खामखेडा उड्डाणपुलाचे काम ४ कोटी रुपये
-चांदवड व देवळा येथे आधुनिक वाचनालय ५० लाख व १ कोटी रुपये
-‘एमएमजेएसवाय’अंतर्गत ३५ कोटींची कामे
-नदी पुनरुज्जीवनअंतर्गत चांदवडला गोई नदीसाठी ४.६५ कोटी
-नदी पुनरुज्जीवनअंतर्गत देवळ्यात कोलती नदीसाठी ३.४५ कोटी
-चांदवड शहर नगरोत्थानमधून १२ कोटी रुपये
-उमराणा येथे तालुका क्रीडा संकुल २ कोटी रुपये
--
या प्रश्नांकडे दुर्लक्ष
मतदारसंघातील शिक्षण, आरोग्य, रोजगार, पर्यटन या प्रश्नांकडे अधिक लक्ष देण्याची गरज आहे. ग्रामीण भागापर्यंत आरोग्याच्या सुविधा मात्र कमी पोहोचल्या आहेत. तालुक्यातील गावांमध्ये प्राथमिक आरोग्य केंद्रात ज्या प्रमाणात सुविधा मिळायला हव्यात त्या प्रमाणात मिळत नसल्याचे नागरिकांचे म्हणणे आहे. चांदवड तालुक्यात पर्यटन केंद्र होऊ शकते. या ठिकाणी रेणुका देवीच्या दर्शनाला राज्यातील अनेक भागातून भाविक येतात. परंतु, येथे मिळणाऱ्या सुविधा अपुऱ्या आहेत. या परिसराचा विकास होणे गरजेचे आहे. चांदवडमध्येच अहिल्यादेवी होळकर यांचा रंगमहाल आहे. या ठिकाणी पर्यटनाला चालना देण्यासाठी उपाययोजना होणे आवश्यक आहे. अनेक भागात अजूनही टँकर सुरू आहेत, तेथे कायमस्वरूपी पाण्याची व्यवस्था व्हावी.
--
विधिमंडळ कामकाजात सहभाग
विधिमंडळात विविध प्रश्नांवर डॉ. आहेर सातत्याने मत मांडत असतात. शेतकऱ्यांच्या कर्जमाफीबाबत त्यांनी अभ्यासपूर्वक मतप्रदर्शन केले. त्याचप्रमाणे आपल्या मतदारसंघातील नागरिकांच्या अडीअडचणी सोडविण्यासाठी ते नागरिकांना सदैव उपलब्ध असतात. अनेक लोकांना त्यांनी वैद्यकीय सुविधा उपलब्ध करवून दिल्या आहेत. लक्षवेधींद्वारे मतदारसंघातील विविध प्रश्नांची सोडवणूक करण्यावरही त्यांनी भर दिला आहे.
--
आमदार म्हणतात...
इतर गावांचाही विकास
गेल्या तीन वर्षांत चांदवड आणि देवळा तालुक्यात झपाट्याने विकास झाला आहे. अनेक प्रलंबित कामे मार्गी लागली आहेत. विकासकामे करताना परिसरातील इतर गावेही विकासाच्या प्रवाहात कशी येतील याचा साकल्याने विचार झाला आहे. आगामी पाच वर्षांत चांदवड आणि देवळा तालुका विकासात अग्रेसर असेल यात शंका नाही. काही दिवसांतच देवळा बस स्टॅँडचे काम सुरू होणार आहे. त्याचप्रमाणे दोन्ही तालुक्यांतील जलसिंचनाची कामे मार्गी लागणार आहेत.
-डॉ. राहुल आहेर, आमदार
--
विरोधक म्हणतात...
ठोस कामांची वानवा
भाजप-शिवसेना सरकारला तीन वर्षे पूर्ण झाली. मात्र, अजूनही ठोस कामे झालेली नाहीत. आमदार राहुल आहेर यांना करण्यासारखे खूप काम होते. परंतु, त्यांच्या कामाचा वेग व आवाका कमी आहे. चांदवड मतदारसंघात सर्वांत मोठा प्रश्न पाण्याचा आहे. अनेक ठिकाणी पिण्यासाठी, तसेच शेतीसाठी पाणी नाही. त्यासाठी आमदारांनी विविध योजना अंमलात आणायला हव्या होत्या. काळडोह धरणाचा प्रश्न प्रलंबित आहे. जांबुटके धरणप्रश्नी आमदारांनी काहीही केलेले नाही.
-शिरीष कोतवाल, माजी आमदार
--
शब्दांकन ः फणिंद्र मंडलिक
मोबाइल अॅप डाउनलोड करा आणि राहा अपडेट
