सिडको परिसरातील गरवारे पॉइंटवर रास्ता रोको आंदोलनाचा प्रयत्न झाला. मात्र, पोलिसांच्या सतर्कतेमुळे तो होऊ शकला नाही. मात्र, आयटीआय पुलावरून जाणाऱ्या शालेय बससह दोन कारवर दगडफेक झाली. बसमध्ये विद्यार्थी नसल्याने अनर्थ टळला. अन्यत्र दगडफेकीत कोणीही जखमी झाले नसले तरी वाहनांचे नुकसान झाले. अंबड पोलिसांचा सकाळपासून बंदोबस्त तैनात ठेवला होता. बाजारातील व्यवहारही सुरळीत सुरू होते. रास्ता रोको आंदोलनाचा प्रयत्न केल्याप्रकरणी पोलिसांनी एका व्यक्‍तीला ताब्यात घेतल्याचे समजते. आयटीआय पुलावर दुपारी शालेय बसवर दगडफेक झाली. दगडफेकीत दोन कारच्या काचा फुटल्या. त्यामुळे परिसरात काही काळ तणावाचे वातावरण होते. या प्रकरणी अंबड पोलिस ठाण्यात गुन्हा दाखल करण्याचे काम सुरू होते.
नाशिकरोडला तीन वाहनांवर दगडफेक
सिन्नर फाटा ः भीमा कोरेगाव येथील कथित घटनेच्या निषेधार्थ मंगळवारी दुपारी नाशिकरोड येथे रिपब्लिकन पार्टी ऑफ इंडिया (आठवले गट) या पक्षाच्या वतीने विभागीय आयुक्तालयावर मोर्चा काढण्यात आला. या घटनेस कारणीभूत असणाऱ्या समाजकंटकांवर कडक कायदेशीर कारवाई करण्याची मागणी करणारे निवेदन प्रशासनाला दिले. जेलरोडला अज्ञात इसमांनी केलेल्या दगडफेकीच्या घटनांमध्ये तीन वाहनाचे नुकसान झाले.या घटनेमुळे जेलरोड भागात दुपारी अडीच वाजेच्या सुमारास तणावसदृश परिस्थिती निर्माण झाली होती.
दोषींवर अॅट्रॉसिटी कायद्याखाली कायदेशीर कारवाई करण्याची मागणी या मोर्चेकऱ्यांनी प्रशासनाकडे केली. मोर्चेकऱ्यांचे निवेदन अप्पर आयुक्त ज्योतिबा पाटील यांनी स्वीकारले. मोर्चात आरपीआयचे जिल्हाध्यक्ष प्रकाश लोंढे, संपर्क प्रमुख सुनील वाघ, युवक जिल्हा प्रमुख अमोल पगारे यांच्यासह विलास पवार, अनिल गांगुर्डे, शकील पठाण, दिनेश जाधव आदींसह आरपीआयचे कार्यकर्ते सहभागी झाले होते. मोर्चाची कुणकुण लागताच विभागीय आयुक्तालयाला पोलिस छावणीचे स्वरुप प्राप्त झाले होते. मोर्चाप्रसंगी कायदा व सुव्यवस्था राखण्यासाठी नाशिकरोडचे वरिष्ठ पोलिस निरीक्षक पंढरीनाथ ढोकणे यांच्या नेतृत्वाखाली पोलिसांनी चोख बंदोबस्त ठेवला होता.
जेलरोडला बसवर दगडफेक
विभागीय महसुल आयुक्तालयावर आरपीआय पक्षाने काढलेला मोर्चा शांततेत पार पडला असला तरी नाशिकरोडमधील जेलरोड परिसरात अज्ञात इसमांनी शहर वाहतूक बससह इतर काही खासगी वाहनांवर दगडफेक केल्याने वातावरण तणावग्रस्त बनले होते. त्यामुळे जेलरोडवरील महालक्ष्मीनगर, सैलानीबाबा चौक, जनार्दन स्वामी पूल या भागातील संशयास्पद हालचालींवर पोलिस नजर ठेवून होते. पंचवटीकडून नाशिकरोडच्या दिशेने येणाऱ्या शहर बसवर (एमएच १२, ईएफ-६६१८) काही अज्ञात व्यक्तींनी दगडफेक करून या बसच्या पुढील आणि खिडक्यांच्या काचा फोडल्या. याशिवाय या बसच्या मागून येत असलेल्या शहर बससह (एमएच १५, एके ८०३४), डंपर ट्रकवरही (एमच १५, सीके ८९३१) या व्यक्तींनी दगडफेक केल्याने या वाहनांच्याही काचा फुटल्या. या दगडफेकीत सुदैवाने कोणी जखमी झाले नाही. बसचालक सुनील दौलत जगताप यांच्या फिर्यादिनुसार नाशिकरोड पोलिस ठाण्यात अज्ञात व्यक्तींविरोधात गुन्हा दाखल करण्यात आला आहे.
मोबाइल अॅप डाउनलोड करा आणि राहा अपडेट
