नाशिक : वेतन आयोगासह विविध मागण्यांसाठी शिक्षकांच्या संघटना रस्त्यावर उतरल्या आहेत. शनिवारी प्राथमिक शिक्षक संघटनांची समन्वय समिती, महाराष्ट्र राज्य शिक्षक परिषद, तसेच नाशिक जिल्हा माध्यमिक शिक्षक संघ व नाशिक जिल्हा टीडीएफतर्फे शहरात ठिकठिकाणी निदर्शने, आंदोलने करून प्रशासनाविरोधात आक्रमक भूमिका घेतल्याचे दिसून आले.
राज्य शिक्षक परिषदेचे धरणे
नाशिक : केंद्रीय कर्मचाऱ्यांप्रमाणेच दि. १ जानेवारी २०१६ पासून सातवा वेतन आयोग लागू करण्यात यावा, यासह विविध मागण्यांसाठी महाराष्ट्र राज्य शिक्षक परिषदेच्या वतीने शनिवारी जिल्हाधिकारी कार्यालयासमोर धरणे आंदोलन करण्यात आले. देशभरात शिक्षणाच्या क्षेत्रात महाराष्ट्राचा क्रमांक सतरावरून आता पहिल्या तीनमध्ये आला आहे. त्यासाठी शिक्षकांनी दिलेले योगदान विचारात घेऊन मागण्या मान्य करण्यात याव्यात, अशा आशयाचे निवेदन जिल्हाधिकारी राधाकृष्णन बी. यांना देण्यात आले.
या निवेदनात समाविष्ट मागण्यांमध्ये सन २००५ नंतर सेवेत रुजू झालेल्या शिक्षक व शिक्षकेतर कर्मचाऱ्यांना जुनी पेन्शन योजना लागू व्हावी, केंद्रीय कर्मचाऱ्यांप्रमाणे सातवा वेतन आयोग लागू व्हावा, कॅशलेस मेडिक्लेम योजना जिल्हा परिषद शिक्षकांना लागू व्हावी, २३ ऑक्टोबर २०१७ चा वरिष्ठ वेतनश्रेणी व निवडश्रेणीसाठी लादलेला शासननिर्णय रद्द करण्यात यावा, ऑनलाइन कामाचे प्रमाणे २० टक्क्यांवर आणावे, शाळांची वीजदेयके शासनाने परस्पर वीज कंपनीस अदा करावीत, २००५ नंतरच्या मृत शिक्षक व शिक्षकेतरांच्या वारसांना मुख्यमंत्री निधीतून मदत मिळावी, १ आणि २ जुलैच्या घोषित शाळांना अनुदान मिळावे, शालार्थ आयडी प्रस्तावांवर कार्यवाही करून योग्य प्रस्तावांना मार्चअखेर आयडी मिळावा व शालार्थ प्रणाली अद्ययावत करावी, दर महिन्यास १ तारखेला वेतन मिळायला हवे, बोगस दिव्यांग व बोगस दुर्धर आजारग्रस्तांची सक्षम प्राधिकरणाकडून शारीरिक तपासणी करावी त्यात कुणीही बोगस आढळल्यास कारवाई करावी, प्राथमिक विभागासाठी चट्टोपाध्याय व वरिष्ठ वेतनश्रेणी त्वरित लागू करावी, पदवीधर शिक्षकांना बी. एड. करण्यास मान्यता मिळावी, आकृतिबंध त्वरित जाहीर करावा, सर्व अशैक्षणिक कामे, पोषण आहार, बांधकाम ही कामे काढून घेऊन सक्षम विभागाकडे द्यावीत, शिक्षकेतरांना आश्वासित प्रगत योजना लागू करावी, पदवीधर ग्रंथपालांना प्रशिक्षित पदवीधर वेतनश्रेणी लागू करावी आदी मागण्यांचा समावेश आहे. निवेदनावर राज्य शिक्षक परिषदेचे नाशिक विभाग कार्यवाहक डी. यू. अहिरे, जिल्हाध्यक्ष दत्ता वाघे-पाटील, जिल्हा कार्यवाह शरद निकम, गुलाब भामरे, सुमन हिरे आदींच्या स्वाक्षऱ्या आहेत.
प्राथमिक शिक्षकांचा एल्गार
नाशिक : वेतन आयोगासह विविध मागण्यांसाठी शिक्षकांच्या संघटना आंदोलनाच्या भूमिकेत असताना शनिवारी या संघटनांमध्ये प्राथमिक शिक्षक संघटनांच्या समन्वय समितीचीही भर पडली. प्राथमिक शिक्षकांच्या विविध प्रलंबित प्रश्नांवर नाशिक पंचायत समितीसमोर धरणे आंदोलन करण्यात आले.
जून २०१३ ते डिसेंबर २०१५ या कालावधीतील एकस्तर व प्रोत्साहनभत्ता फरक बिले त्वरित मिळावीत, पाचव्या वेतन आयोगाप्रमाणे काल्पनिक वेतनवाढ देऊन १५ नुसार प्रोत्साहन भत्त्यात दर वर्षी वाढ देण्यात यावी, कार्यालयीन कर्मचाऱ्याप्रमाणे एलआयसी कपात पगारातून व्हावी, ३९ ब प्रलंबित बिले त्वरित मिळावीत, प्रलंबित वैद्यकीय बिले मंजुरीसाठी त्वरित पाठवावीत, नाशिक तालुक्यातील आदिवासी परिसरातील सर्व गावे अवघड क्षेत्र म्हणून घोषित व्हावीत, एमएससी आयटी प्रकरण न्यायप्रविष्ट असल्याने या अभ्यासक्रमाची सक्ती करू नये, सहाव्या वेतन आयोगाच्या फरकाचे पाच हप्ते काही शिक्षकांच्या फंडात जमा नाहीत, ते जमा करावेत आदी प्रश्न या धरणे आंदोलनात मांडण्यात आले. या आंदोलनात सुभाष अहिरे, अशोक ठाकरे, तुकाराम पोटिंदे, प्रदीप पेखळे, बाळू भोये, रामनाथ सानप आदींचा सहभाग होता.
मोबाइल अॅप डाउनलोड करा आणि राहा अपडेट
